47.300 koruunit Elgigantimit tillinneqartut

Ulloq unnuarlu kingulleq Kalaallit Nunaanni Politiinut ulapiffiuvoq. Aserorterinernut, persuttaanernut, ikiaroornartunut ulluuneranilu tillinniarnermut ornigupput. 

Kingulleq Nuummi Elgigantimut tunngavoq, takkulu nal. 10.45 pisiniarfimmi tillinniartoqarnera nalunaarutigaat. 

- 47.300 koruunit nalinginut tillittoqarsimasoq, pigaartut pisortaat Thomas Jeppesen Sermitsiamut oqarpoq. 

Tillinniaq pisiniarfiup ammanerata nalaani pisiniarfimmiissimavoq, nioqqutissallu tuusintilippassuarnik nalillit akilersimanngisani nassarlugit pisiniarfimmit anisimalluni. Suliami pasisaqartoqartoq, pigaartut pisortaata oqaluttuaraa. 

Aasianni persuttaasoqarlunilu aserorterisoqartoq 

Aasianni politiit ulloq unnuarlu kingulleq suliat arlallit pillugit ornigupput. 

Arfininngornermut unnuaani nal. 04.34 Aasianni angerlarsimaffimmi aserorterisoqarneranik politiit kalerrinneqarput. 

Pinerluttut arlallit najukkamiissimapput, tassanilu igalaaq ujaqqamik aserorpaat piffimillu qimagullutik. Suliami pasisaqartoqarlunilu unnerluutigisaqartoqartoq, Thomas Jeppesen oqarpoq. 

Unnuami kingusinnerulaartukkut nal. 05.00 Aasianni persuttaasoqarpoq, tassanilu persuttarneqartoq kiinnamigut tilluarneqarpoq, taamaaliornerullu kiinnakkut ajoqusernerit malitsigai. 

Suliami inuk tigusarineqarpoq. 

Inuit marluk hashimik tigummiartut  

Inuit marluk ikiaroornartunik tigummiartutut aamma tigusarineqarput. 

Inuk tallimanngornermi ualikkut hashimik 288 gramimik tuniniaqqitassamik tigummiartutut tigusarineqarlunilu unnerluutigineqarpoq. 

- Danmarkikkoorluni Kalaallit Nunaannut tikippoq, tigummiaalu mittarfimmi nakkutilliinermi nassaarineqarput, pigaartut pisortaat oqarpoq. 

Ippassaq nal. 16.59 politiit biilerlutik nakkutilliisut biilertumik unitsitsipput, tassanilu biilinik ingerlatsisoq ikiaroornartutorsimalluni biilertut pasineqarpoq, biilillu cannabisisunnittorujussuullutik, pigaartut pisortaat oqaluttuarpoq. 

Biilinik ingerlatsisoq misissuiffigineqarpoq hashimillu 5 gramimik tigummiaanik nassaartoqarpoq. Pineqartoq unnerluutigineqarpoq. 

Tamatuma saniatigut aqqusinermi eqqissiviilliornernik, imigassartorsimalluni pisunik imminornissamillu qunusaarinermik suliaqartoqarpoq.