Arfeq kangerlummiittoq aamma arfeq uanniittoq

Kangerlummi arfermik takusaqarpunga.

Timerujussuaq immamiittoq. Eqqissisimasoq, oqimaatsoq angissutsiminillu ajornartorsiuteqanngitsoq. Immamiit puivoq, takutilaariarlunilu aqqaqqilluni, soorlulusooq uninngisaannartoq. Taava imaq kisimi takussaalerpoq, aqqarmat sakkortuumik anersaareersorlu arriitsumik matoqqinneqartoq, anersaarneralu oqimaatsoq imaani minittornertut siammarsimalluni.

Eqqarsaatigisorujussuuara.

Maanna timiga arfermut eqqaanarpoq. Taanna aamma angisoorujussuuvoq, aamma avaqqutiinnarneqarsinnaanngilaq. Tamaaniiginnarpoq nassuiartariaqarnani tuaviuussassaananilu.

Naartuvunga aappassaannillu meerartaarnissara utaqqillugu. Timiga aqussinnaanngisannut ingerlavoq, tamaat malugisinnaavara ilusiali aqussinnaanagu. Qanoq pissanersoq takusinnaanngilara.

Nalunngilara nangit, unnuakkut sinissaarunnerit, milutsitsinerit, isumakuluutit naaffeqanngitsut ulluinnarnilu ileqqulersuutit annikitsunnguit inuunermik nutaamik ingerlatitseqqittussaasut. Misilereersimavara. Taamaattorli arlaanni annertoorujussuup qeqqaniittutut misinnarluni.

Tassami inuiaqatigiinnut qanoruna ittunut meeraara inunngortinniariga?

Arnat amerlanerusunik meerartaaqqullugit kajumissaarneqartuartarput. Inunngortartut ikiliartornerat siunissarlu, inuiaqatigiittut isumakuluutigaavut. Aammali inuiaqatigiit imminut aperisariaqarput, inunngortartut amerlanerusut kissaatigineqartut qanoq atugassaqartitaassanersut.

Aaqqissuussaaneq oqaluuserisorujussuusarparput. Paaqqinnittarfiit. Atugassarititaasut. Ullutsinnilu aamma taakkuninnga isumaginnittussat oqaluuserisorujussuuavut: perorsaasut, amigaatigineqartut, atugassarititaasut akissarsiallu Sermitsiami pineqartut pillugit eqqartorneqartuarsimasunik atugassaqartitaallutik sulisartut. Ajornartorsiutit takorluugaannaanngitsut. Taakkumi kiinaqarput. Assaqarput, angajoqqaat sulineranni meeqqanik mikisunik paaqqinnittussanik. Tuppallersaasussanik, killiliisussanik, toqqissisimanermik pilersitsisussamik nipeqarput.

Ilaannikkulli periaatsit timitut angisuutut qasusutut misinnartarput, arriitsumik anersaartortutut anersaaruluttartullu, immallu qaavaniinniarsarisunut annerusumik qisuariartoqassanani.

Arfeq eqqarsaatigeqqilerpara.

Kangerlummi ingerlaartilluni oqimaassutsini atorlugu ingerlaarpoq. Sukkasuunngilaq, nutaaliatut atortorissaaruteqanngilaq. Immamulli uumaffigisaminut naleqqussarsimavoq. Qanoq immamiinnissani nalunngilaa.

Aamma ilisimaqqissaanngilara inuiaqatigiittut aaqqissuussaanerput meeqqanut taakkununnga peroriartortussanut naleqqussarluagaanersoq.

Meeqqamik perorsaaneq soqutiginartorujussuuvoq. Meerartaarnermi asanningaarneq akisussaassuseqarnerlu misigineqartarput. Meeqqalli angerlarsimaffimmit aninerani inuiaqatigiinni ilaalernerani ikiuisinnaasunik naammattunik assassaqarnersoq isumakuluutigineqarpallaartarluni.

Qanittumiittut angisuullu ataqatigiilluinnarput. Soorlu kangerluk imarlu taamaattut. Soorlu uanga arferlu takusara taamaattugut.

Naluara arfertut taamanikkut takusattut misigisimanerlunga.

Immaqa taamaaliorpunga.

Angisuutut arriitsumik nalusannut ingerlaartutut, suullu tamaasa paasilluarsinnaanagit.

Tamatumalu peqatigisaanik sarfat nammineq aqussinnaanngisakka pinngitsoorsinnaanagit.

Assersuut tamanna tuppallernarlunilu isumakulunnarpoq.

Tassami imarsuaq arfermut naammattumik angissuseqarmat, arferup uumaffigaa.

Taamaalilluni inuiaqatigiit innuttaasunut nutaanut inooqataalersunut naammattumik inissaqartitsinersut apeqqutaaginnarpoq.

Arfeq kangerlummiittoq suli eqqarsaatigaara.

Aamma naalungiarsuk qanittukkut saninni anersaartulersussaq.