Inatsisartuni ajornartorsiut: Nunatsinni innuttaasut inuunerissaarnerat peqqinnerallu imaluunniit niuernermik ingerlatsineq pitsaasoq

Partii Siumut, Inatsisartut 2022-mi ukiaanerani ataatsimiinneranni nalunaaquttap aalajangersarneqarnera pillugu Inatsisartut inatsisissaatut siunnersuut pillugu naatsukullaaqqamik oqaaseqaateqarpoq, Kuno Fencker (S) oqaaseqartoralugu:

- Siumumiik Naalakkersuisut nalunaaquttap aalajangersarneqartarneranut akisussaaffiup tingunissaanut siunnersuutaat alloriarnertut pitsaasutut isigivarput, tassami akisussaaffik annertoorsuunngikkaluaq aamma isumaqarpoq. Siumumiillu inatsisissap suliarineqarnera iluarisimaarparput aammalu piffissat aaqqissuunnissaa nutaaq, tassa UTC -2 inatsit atuutilereersimappat malinneqalissasoq, ullumikkullu Ittoqqortoormiit tamanna malereerpaat. Siumumiik tusarniaanermi akissutit suliffeqarfinniik iluarisimaarpagut, taamaasillutimmi timmisartoqatigiiffinni sulisut aammalu kitaani suleqatigisartakkagut akunnernik ikinnerusunik assigiinngiffeqarfigilissangatsigit.

Taamaattorli ilaatigut atsiortitsinikkut akerliussutsimik nittarsaassinerit aammalu  UTC -3-mut utertitsinissamik piumasaqartoqarnera annertummat, partii inatsisissatut siunnersuut saqqummiuppaa, ullumilu pingasunngornermi siullermeerluni taanna suliarineqarpoq.

Siullermeerinnilluni oqallinneq misigissutsikkut aalassassimaarnertaqartutut oqaatigineqartariaqarpoq, aammalu partiit tunuarsimaanngillat oqaluttuarissallugu nalunaaquttap nikisinneqarnikuuneranut atatillugu peqqissutsimut kingunerluutaasimasut amerlasuut pillugit.

Taamaakkaluartoq aamma ilaatigut erseqqissaatigineqarpoq Kalaallit Nunaanni inuussutissarsiutinik ingerlataqartut nalunaaqutaq maannakkut atuuttoq iluaqutigigaat , tassami annerpaamik niueqatiginninnerit Danmarkimut Europamullu ingerlanneqarmata.

Siumut: Seqineq nuigaanngami nuisarpoq

Kisianni maannamut ukiut marluk nutaamik nalunaaqutsersuiffiusumik, isumaqarpoq partiip nalunaaqutsersuiffiup allanngortinneqarnissaa naammaginanngitsoq:

- Seqineq nuigaanngami nuisarpoq. Seqineq tarrikkaanngami tarrittarpoq. Piviusoq taanna qanorluunniit ilioraluarutta allanngortissinnaanngilarput. Ukiakkut 2022-mi Inatsisartut nalunaaqutaq pillugu aalajangersaammata, seqerngup ingerlaarnera uniorujussuarlugu tamatta inuuneqalersimavugut. Inuppassuarnit tamanna iluaagineqartoq Siumup tusaavaa, aamma silarsuatta ingerlaarnera malillugu inuunitta ingerlaqqilernissaa pisariaqarpoq, Siumut Inatsisartuni ilaasortaatitaasa siunnersuutiminni ilaatigut tunngavilersuuteqarput.

Suliap naammassineqarnissaa oktobarip 24-ani 2024 sioqqullugu piumasarineqarpoq

Siumup siunnersuutaani allassimavoq inatsit atuutilersinneqassasoq oktobarip 27-ani 2024, nal. 24.00, aasaanerani nalunaaquttap atorunnaarnera ilutigalugu.

Allatut oqaatigalugu, piaarnerpaamik naammassineqassasoq kissaataavoq.

Kisianni Inatsisartut siulittaasoqarfiat aalajangerpoq aappassaaneerinninneq  pissasoq novembarip 15-iani kiisalu pingajussaaneerinninneq aalajangiiffiusussaasorlu pissasoq decembarip 6-ani 2024.

Taamaalilluni aasaanerani nalunaaquttap atorunnaarneranut atatillugu allannguineq angumerineqarsinnaanngilaq, nalunaaqutarmi sapaammi oktobarip 27-ani aasanerani nalunaaqutaq atorunnaartussaammat. Allannguineq angumerineqarsinnaassanngippat, sapaat 30. marts 2025 nalunaaqutaq 3 tiiminik kinguartinneqanngikkuni, utertitsinissaq aatsaat Inatsisartunik nutaanik qinersereernerup kingorna aatsaat suliarineqaqqittussanngortinneqarsinnaassaaq, tassanilu apeqqutaalissaaq Inatsisartut nutaat piumassuseqassanersut nalunaaqutaq pillugu nutaamik aalajangiinissamut, aammalu aasaanerani nalunaaquttamik atorunnaarsitserusukkumaassanersut.

Taamaattorli Inatsisartuni nalunaaquttap akunnerpaalui oqallittoqareersorlu amerlanerussuteqartut aalajangiuppaat siunnersuut Inatsisartut inatsisit atuutsinneqarnerannut ataatsimiititaliaanut suliassanngortinneqassasoq.