KOMMUNINUT QINERSINEQ 2025
Inatsisartunut ilaasortanngortunit 31-nit 15-it suli qineqqusaarput
Inatsisartunut qinigassanngortittut arlalippassuit aamma kommunalbestyrelsimut qinigassanngortinnissartik toqqarsimavaat. Taamaasillutik Inatsisartunut ilaasortanngortut 15-it suli kommunimut qineqqusaarput.
Qinersisartut aalajangereerput - tassa Inatsisartut qinersinermut tunngatillugu. Maanna kommunimut qinersineq 1. apriili 2025-mi pisussaq tullinnguuppoq. Inatsisartuni ilaasortanngortut 31-nit 15-it kommunalbestyrelsimut qinigassanngortipput, taamaattumik suli qineqqusaarput.
Assiliisoq: Oscar Scott Carl
Assut unamminarsimassannguatsiarpoq partiimi siulittaasuulluni, pingaartumik Inatsisartuni qinersinermi ajugaarujussuartut Demokraatit siulittaasuat, Jens-Frederik Nielsen ulluni makkunani iliuusissaminik pilersaarusiornissaminillu ulapputeqaleruttortumut.
Demokraatimmi Inatsisartuni ilaasortaatitaasa nutaat qulit akornanni arfinillit kommunalbestyrelsimut qineqqusaarnermut suli peqataapput, tassaallutik:
- Margrethe Thaarup Andersen (Kommune Kujalleq)
- Per Berthelsen (Kommuneqarfik Sermersooq)
- Minik Serano Frederiksen (Kommune Kujalleq)
- Justus Hansen (Kommuneqarfik Sermersooq)
- Simigaq Heilmann (Kommune Qeqertalik)
- Nivi Olsen (Kommuneqarfik Sermersooq)
Naleqqap affai aamma suli qineqqusaarnermi peqataapput
Qinersinermi ajugaasut tullersortaat, Naleraq, aamma taamaak inissisimavoq. Tassani partiip Inatsisartuni ilaasortaatigiligaasa nutaat arfineq pingasuusut affaat suli qineqqusaarnermi peqataapput, partiip siulittaasua ilanngullugu.
- Pele Broberg (Qeqqata Kommunia)
- Jens NapãtôK' (Avannaata Kommunia)
- Mette Arqe-Hammeken (Kommuneqarfik Sermersooq)
- Gerth Mikaelsen (Kommuneqarfik Sermersooq)
Taakkununnga ilaapput, tassa Inatsisartunut qinigaarlaajullutik suli kommunalbestyrelsinut qineqqusaartut Aqqaluaq Biilmann Egede (IA) kiisalu Pipaluk Lynge (IA) Kommuneqarfik Sermersuumi kommunalbestyrelsimut qinigassanngortittut.
Kim Kielsen (S) aamma kommunimut iserniuttuni unammilleqataavoq. Taanna Kommuneqarfik Sermersuumi kommunalbestyrelsimut qinigassanngortissimanini aalajangiussimagamiuk suli qineqqusaaqataavoq.
