Inatsisartut ataatsimiinnissaat siulleq sioqqullugu tunuartoq

Inatsisartunut kommunimullu qinigassanngortittoq Nanortalimmiu Minik Serano Frederiksen (D) Inatsisartut inissitsiternissaat sioqqullugu Inatsisartunut tunuarluni aalajangerpoq.

Facebookimi quppernermini taama allappoq.

Minik Serano Frederiksenip inuttut nammineq pissuteqarluni Inatsisartunit tunuassalluni kommunalbestyrelsimilu sulilernissani pingaarnerutillugu Facebookimi quppernermini sisamanngormat apriilip pingajuanni nassuiaatigaa.

Minik Serano Frederiksen Inatsisartunut 77-inik taaguunneqarpoq kommunalbestyrelsimullu 78-init qinerneqarluni. Kommune Kujallermi kommunalbestyrelsimiissalluni paasissutissiissutigaa.

Sinniisoq siulleq aggersarneqassanngilaq

Aamma Leo P. Jørgensen, Inatsisartuni Demokraatit sinnerlugit sinniisuutitaq siulleq, Inatsisartunut aggersarneqassanani pingasunngormat apriilip aappaanni nalunaarpoq.

Suli aggersarneqartigani Inatsisartunit tunuarniuteqarsimalluni Facebookimi quppernermini nassuiaavoq.

Aalakoorluni 2022-mi biilersimanini pissutigalugu ilaasortanngorsinnaannginnini nassuiaatigaa.

Leo P. Jørgensen Inatsisartunut qineqqusaarnermini 69-init qinerneqarpoq.

Demokraatini sinniisoq alla Aasiammioq Aqissiaq Semsen aggersarneqarnissani naatsorsuutiginagu aamma allappoq. Taamaattumik qinigaanerup kingorna Inatsisartunit tunuarniarluni qinnuteqarsimalluni.

Inuunermini qanga pisimasut pissutigalugit taama aalajangerluni aamma malittarisassat pakatsissutigalugit Facebookimi quppernermini allappoq.

Sinniisut siulliit pingasut naalakkersuisoqatigiiliortoqarnerata kingorna sinniisutut isertussaagaluit qinigaasinnaanngitsutut nalilerneqarsimanertik Facebookimi quppernerminni ammasumik saqqummiuppaat.

Taamaattumik Demokraatit sinniisaasa sisamaanniit ilaasortanngortoqassaaq. Bo Martinsen 37-nit qinerneqartoq Inatsisartuni ilaasortanngortussanngorpoq.