Inatsisissap akerleriissutaasup suliarinissaanut piffissamik sivisunermik qinnuteqartut
Aalisarnermut inatsisissatut siunnersuutip aappassaaneerneqarnissaa Aalisarnermut, Piniarnermut Nunalerinermullu ataatsimiititaliap kinguartinnissaa qinnutigaa.
Arkivfoto: Leiff Josefsen
Inuppassuit nalunngilaat aalisarnermut inatsisissatut siunnersuut nutaaq Inatsisartuni oqaluuserineqaleruttortoq. Inatsissatut siunnersuut inuiaqatigiinnit oqallisigineqartorujussuuvoq, Kalaallit Nunaannimi inuussutissarsiutit pingaarnerit ilaata sinaakkutai allanngortinneqartussanngormata.
Siunnersuut apriilip aqqarnani siullermeerneqarluni saqqummiunneqarpoq oqaluuserineqarlunilu, tamatumalu kingorna Aalisarnermut, Piniarnermut Nunalerinermullu Ataatsimiititaliamut ingerlateqqinneqarpoq.
Siunnersuut sapaatip-akunnerani tulliuttumi pingasunngornermi maajip arfineq-pingajuanni aappassaaneerneqarnissaa pilersaarutaavoq.
Isumaliutissiissut maajip arfineq-aappaani tunniunniaraat
Maannali ataatsimiititaliaq Naalakkersuisunit apeqqutit suli allat akissutissarsiumallugit piffissaqarnerunissamik noqqaavoq.
Ataatsimiititaliami siulittaasoq Kristian Jeremiassen (IA) tusagassiutinut ima nalunaaruteqarpoq:
- Siunnersuutip aappassaaneerneqarnissaata tallimanngornermi ulloq 10. maj 2024 pinissaa ataatsimiititaliap Siulittaasoqarfimmut qinnutigaa, taamaalilluni ataatsimiititaliap isumaliutissiissutaa Inatsisartunut tunniunneqassalluni marlunngornermi ulloq 7. maj, nal. 12. Inatsisartut Siulittaasoqarfiat siunnersuutip aappassaaneerneqarnissaanut piffissamik nutaamik inaarutaasumik aalajangersaassaaq, ataatsimiititaliami siulittaasoq allappoq.
Siunnersuutip aappassaaneerneqarnissaanik nutaamik ulluliisoqassanersoq Inatsisartut Siulittaasoqarfiata aalajangiiffigissavaa.
