Kommunit kalaallinik ilaqutariinnik suliaqarnerminni
immikkoortortaqarfimmik immikkut ittumik VISO-mik (den nationale viden- og
specialrådgivningsorganisation) kalaallit oqaasiinik kulturiannillu immikkut
ilisimasalinnik atuinissaannik pisussaaffiliisussamik inatsisissatut
siunnersuut Isumaginninnermut Ineqarnermullu ministereqarfiup
tusarniaassutigigasuarpaa.
Aammattaaq inatsisissatut siunnersuummi Danmarkimi
meeqqat angerlarsimaffiup avataanut inissinneqarneranni tarnip pissusaanik
misissuutit atorneqarsimappata suliat misissorneqassasut
siunnersuutigineqarpoq.
Kommunit kalaallinik ilaqutariinnik suliaqarnerminni
immikkoortortaqarfimmik immikkut ittumik VISO-mik (den nationale viden- og
specialrådgivningsorganisation) kalaallit oqaasiinik kulturiannillu immikkut
ilisimasalinnik atuinissaannik pisussaaffiliisussamik inatsisissatut
siunnersuut Isumaginninnermut Ineqarnermullu ministereqarfiup
tusarniaassutigigasuarpaa.
Aammattaaq inatsisissatut siunnersuummi Danmarkimi
meeqqat angerlarsimaffiup avataanut inissinneqarneranni tarnip pissusaanik
misissuutit atorneqarsimappata suliat misissorneqassasut
siunnersuutigineqarpoq.
Oqallinneq kissassimaarfiusoq
Tarnip pissusiinik misissuutit isornartorsiorneqartut, ilaqutariit
kalaallit angajoqqaatut piginnaaneqarnerannik misissuinermi atorneqartarnerat,
Kalaallit Nunaanni Danmarkimilu immikkut ilisimasallit eqqartuussissuserisullu
eqqunngitsumik kukkunertullu taallugit oqallinneranni Inatsisissatut
siunnersuut februaarip pingajuanni tusarniaassutigineqarpoq. Inatsisissatut
siunnersuut amerlasuunut tusarniutigineqarput, taakkununnga 14-it
akissuteqarlutik ilaatigut Kalaallit Illuutaat Aarhusimiittoq, Peqatigiiffik
Kalaallit Meerartaat, SILA 360, Meeqqat pillugit siunnersuisoqatigiit, Inuit
Pisinnaatitaaffii pillugit Siunnersuisoqatigiit MAPI-lu ilaapput.
Sermitsiap tusarniaanermut akissutit arlallit pissarsiaraat, taakkulu
amerlanerit misissuutit atorunnaarsinneqarnissaanik sulianilu misissuutinik
atuisoqarsimaneranik misissueqqinnissaq tigulluarpaat. Inatsisilli kikkunnut
atuunnersut, oqalutseqarsinnaaneq suliallu suut misissorneqaqqinnissaat pillugu
tusarniaanermi akissutini arlalinni isumakuluutigineqarpoq.
Inatsisit kikkunnut atuunnera ersarluttoq
Inuit Pisinnaatitaaffii pillugit Siunnersuisoqatigiit tusarniaanermut
akissutaa assersuutigigaanni, tassani "ilaqutariit meeraq, inuusuttoq,
angajoqqaanngortussaq imaluunniit angajoqqaatut oqartussaassuseqartoq Kalaallit
Nunaanni inunngorsimappat peroriartorsimappalluunniit“ ersarlunnera
isorineqarpoq. Kommunit inuk Kalaallit Nunaannut attuumassuteqarnera
nalilersortussaassammassuk ajornartorsiutitut isigineqarpoq, tamannalu aamma
ILO-p nunap inoqqaavi pillugit isumaqatigiissutaani najoqqutassianut akerliummat.
Siunnersuisoqatigiit "VISO-p ataani immikkoortortaqarfiup immikkut ittup
siunertaa annertusarneqassasoq“ siunnersuutigaat.
Oqalutseqarsinnaaneq
Kalaallinut ilaqutariinnut inatsimmi pineqartunut qallunaanut misissuutit
suli atorneqartassanersut nalornissutigineqassasoq Siunnersuisoqatigiit aamma
tikkuarpaat. Meeqqat kalaallinit ilaqutariinneersut angerlarsimaffiup avataanut
inissinneqarnissaannut suliani tamani misissuutit kulturimut
naleqqussarneqarsimanngitsut atorneqanngisaannassasut erseqqissarneqassasoq
Siunnersuisoqatigiit kaammattuutigaat.
Inatsisissatut siunnersuut itigartinneqartariaqarpoq
Peqatigiiffiup MAPI-p inatsisissatut siunnersuutip kikkunnut atuunnissaa
erseqqinngimmat aamma sakkortuumik isoraa, "inatsisissatullu siunnersuut
naggueqatigiinnut inunnut tamanut, sumi inunngorsimanerat
peroriartorsimanerallu apeqqutaatinnagu, atuuttussatut aaqqinneqartariaqartoq“
oqaatigaat.
Inatsit siunnersuutigineqartoq akuerineqartinnagu inuit suliniaqatigiiffii
pineqartunut attuumassuteqartullu suleqatigilluarneqarnissaat, Danmarkimilu
ilaqutariit inuit qanoq pitsaanerpaamik tapersersorneqarsinnaanerat pillugu
oqallinnissaq annertunerusoq qulakkeerneqartariaqartoq, MAPI-p kaammattuutigaa.
Inatsisissatut
siunnersuut Folketingimi februaarip 28-ani siullermeerneqassaaq.
Inatsisissatut siunnersuut marsip aallaqqaataani Københavnimi nalunaaqutaq
12.00 akerliussutsimik
takutitsiffigineqarnissaa peqatigiiffiup MAPI-p aaqqissuuppaa.
