SILARSUAQ
Indiami timmisartup nakkarneratigut inuit 290-nit amerlanerusut ajunaarput
Inuit 290-it sinnerlugit Indiami timmisartup nakkarnerata kingunerisaanik ajunaarput, Reuters naapertorlugu politiit taamak nalunaarput.
Indiami timmisartup nakkarneratigut inuit 290-nit ikinnerunngitsut ajunaarput, nutaarsiassaqartitsivik Reuters naapertorlugu politiit taamatut nalunaaruteqarput.
Air India-p ilaasartaatia timmisartoq inunnik 242-nik issimasulik sisamanngornermi illoqarfimmi Ahmedabadimi Indiap kitaani nakkarpoq.
Timmisartoq illoqarfiup mittarfianut qanittumi najugaqarfimmut nakkarpoq, sisamanngornermi siusinnerusukkut nalunaarutigineqarpoq, timmisartumi nunamilu inuit ajunaarsimanissaat ilimagineqassasoq.
Sisamanngornermi siusinnerusukkut politiit pisortaat oqarpoq, ilaasut tamarmik ajunaarsimassasut ilimagineqartoq. Kisianni kingusinnerusukkut indiami nutaarsiassaqartitsivik ANI naapertorlugu pisortaq oqarpoq, inuk ataaseq timmisartumi uumasoq nassaarineqarsimasoq. Aniguisimasoq kingusinnerusukkut aamma indiamit tusagassiorfinnut oqaaseqarpoq.
Air India attaveqaqatigiiffimmi X-imi allappoq, timmisartoq normu AI171 Ahmedabadimiit Gatwickimut Londonip avataaniittumut ingerlasoq ajutoornermi akuusimasoq.
Timmisartoq Boeing 787-8 Dreamlinerimik taaneqartartoq matumani pineqarpoq.
Reuters naapertorlugu London Gatwick Mittarfik uppernarsarsaavoq, timmisartoq taanna AI171 mittarfimmut ingerlasimasoq nal. 18.25 tuluit nunaata nalunaaqutaa malillugu mittussaagaluarluni.
Timmisartoq nunamiit qangattaraluaannarluni inuit najugaqarfiannut nakkarpoq.
Timmisartumi issimasut 242-it akornanni 230-it ilaasuupput 12-illu timmisartumi sulisuullutik.
Taakkununnga 169-it indiamiut, 53-it tuluit, portugalimiut arfineq-marluk ataaserlu canadamiuuvoq, Air India X-imi allappoq. ilaasut taakku sinneri 12-it sumiuunersut allassimanngilaq.
Timmisartoq nakkarmat timitaata ilaa illumut nakkarpoq.
- Ajunaarnersuaq Ahmedabadimi pisoq sakkortuumik aalassassutigalugulu aliasuutigaarput. Uummatsitsigut anniaatigaarput, oqaatsit inorsarput, Indiap ministeriunera, Narendra Modi oqarpoq.
Ahmedabadimi mittarfiup oqaaseqartartua Reuters naapertorlugu ilisimatitsivoq, mittarfiup ingerlatsinera unitsinneqarallartoq ajunaarnersuup kingunerisaanik.
Flightradar24, timmisartuutileqatigiiffiit tamarmik malinnaavigisartagaat, X-imi allappoq, Air Indiap timmisartua nalunaaqutaq 13.38 sumiiffimmi nalunaaqutaq naapertorlugu attaveerussimavoq. Tassa, timmisartup qangattarneranit minutsip ataatsip qaangiunnerani attaveerussimavoq.
Piffissap taamaalinerani timmisartoq 190 meterinik portutigisumiippoq.
Danmarkip ministeriunera, Mette Frederiksen (S), X-imi Statsministeriamiit avammut saqqummiunneqartumi oqarpoq:
- Nutaarsiassaq alianangaartoq Ahmedabadimit apuuppoq. Ajunaartunut ajunaartut taakkulu qanigisaannut kiisalu ikiuiartortunut eqqarsaatitsigut najuuppugut. Danmark sinnerlugu India nunallu ajunaartut aggerfii, timmisartup nakkarneranut eqqugaasut, aliasoqatigaagut.
