Inissianut nungullarsimasunut iluarsartuussinissamut pilersaarutit inissipput – ineqarnermut akiliut 2027-miit qaffanneqartalissapput

Naalakkersuisut Namminersorlutik Oqartussat inissiaataasa iluarsartuunnissaannut pilersaarusiaq sukumiisoq maanna saqqummiuppaat.

Suliniut ukiuni 20-ni atuuttussanngorlugu pilersaarutaavoq, Namminersorlutillu Oqartussat inissiaaterpassuisa qanoq innerannik ilisimasallit naliliineri tunngavigalugit suliaalluni.

Aningaasanik amigaateqarneq 2,5 milliarder koruuninik naleqassaaq, pilersaarutillu aningaasalersorneqarnera pingaarnerpaamik nunap karsianit toqqaannartumik tapiissutinit 1 milliarder koruunit missaannik aningaasartaqartussaavoq.

Inissianik iluarsartuussinissamik kinguaattoorutit 2,5 mia. koruuninik naleqartut naliliiffigineqarnikuuvoq. Pilersaarutit aningaasalersorneqarnerat nunatta karsianit 1 mia. koruunit pingaarnertut pissaaq taavalu ineqarnermut akiliutit ukiut 15-it ingerlanerini qaffanneqartarneranit 1,2 mik. koruunit iluarsartuussinissamut aningaasaleeqataassallutik.

Pisariaqartitap 80 procentia amigaataavoq

Attaveqaasersuutinut ineqarnermullu naalakkersuisup Hans Peter Poulsenip pilersaarut pingasunngornermi ualikkut tusagassiortunik katersortitsinermi saqqummiuppaa.

Inissianut akiliutit qaffannissaat naalakkersuisoq naatsorsuinerat naapertorlugit pisariaqarluinnarpoq, ukiumut aserfallatsaaliuinermut 150 millionit koruunit missaanniittut pisariaqartinneqarmata, PA-mik taaneqartartumut - Pilersaarutaasumik Aserfallatsaaliuinissamut - taamaallaat 35 millionit koruunit immikkoortinneqartarmata.

Aningaasaliinissamut pilersaarut naapertorlugu Namminersorlutik Oqartussat inissiaataanni ineqarnermut akiliutit ukiut 15-it ingerlaneranni ukiumut 3,8 procentimik qaffassattassapput.

Ineqarnermut akiliutit pilersaarutit malillugit 2027-miit 2041-mut qaffanneqartassapput, attartortut aningaasaqarnikkut naleqqussaanissaannut piffissaqartinniarlugit, aamma ineqarnermut sillimmasiinermut aaqqissuussaq nutaaq atuutilersinneqassalluni.

Ilaqutariit amerlanerusut ineqarnermut sillimmaserneqarsinnaalissasut taavalu ilaqutariit ineqarnermut akiliutinut qaffasissunut akiliiniarnissamik ajornakusoortunut ikiorserneqarsinnaalernissaat anguniagaavoq.

Pilersaarut ima aningaasalersorneqassaaq

Pilersaarutip aningaasalersorneqarnera tamakkiisoq ima isikkoqarpoq:

• Nunap karsiata iluarsaassinermut aningaasartuutissat katillugit = 1.036,4 mio. kr. (34%)

• Maana inissiaqarfinni PA-miit immikkoortinneqarsimasut = 150 mio. kr.(5 %)
• Manna inissiaqarfinnit ineqarnermut akiliutinit isertitat aqqutigalugit PA-mi uninngasuutigineqartut = 700 mio. kr.(23 %)
• Ineqarnermut akiliutinik naleqqussaaneq - inissiaqarfinniit PA-mi uninngasuutit = 1.194,2 mio. kr.(38 %)

- Qitornagut ernguttallu inissiani attartortittakkani siliaannarissuni aningaasaqarnikkullu piujuartussamik oqimaaqatigiittuni najugaqarsinnaanissaasa qulakkeernissaa siunertaavoq.