Inissiaq oqallitsitsingaatsiartoq
AG-p Nikolaj Heinrich inissiami ataatsimi ukiuni 52-ini najugaqarsimasoq pillugu sapaatip-akunnerata siuliani allaaseraa. Tamanna amerlasoorpassuarnik oqaaseqarfigineqarlunilu isummersorfigineqarpoq.
Utoqqaat, innarluutillit allanilluunniit immikkut pisariaqartitsisut pisortanit ineqartinneqassasut, Pele Broberg, partiimi Naleqqami siulittaasoq, isumaqarpoq.
Asseq toqqorsivimmit: Leiff Josefsen
Nikolaj Heinrich oqaluttuani pillugu uterfigeqqinneqarsimanersoq paasiniarlugu AG-p attaveqarfigeqqippaa. Taamatullu pisoqarsimavoq, taanna akivoq.
- Amerlasuunik taamaaliortoqarpoq. Amerlasoorpassuarnit attaveqarfigineqarpunga, sinerissami, kisianni aamma Danmarkimit. Inissiatta ukiut 30-t qaangiunnerannit pigilernissaanut isumaqatigiissutip malinneqarsimannginnera Danmarkimit ilisarisimasama soraarnerit tupigusuutigaat. Allaat eqqartuussivimmut suliassanngortitsinissannut kajumissaarneqarpunga. Suliami ajugaanissara qularutiginngilluinnarpaat, Nikolaj Heinrich oqaluttuarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
Ukiut ingerlaneranni ineqarnermut akiliutip qaffarujussuarnerat pissutigalugu, atuartartup ataatsip aamma AG-p oldmoney.dk misissussagaa kaammattuutigaa.
Oldmoneymi qanga aningaasat ullutsinni aningaasat nalinginut naatsorsorneqarsinnaapput, aamma aningaasat naleerukkiartornerannut Danmarkimi nioqqutissat akiliutillu nalingisa ineriartornerinut naatsorsuutitut atorneqarsinnaavoq. Naatsorsuinermut atortumik Kalaallit Nunaannut tunngasumik nassaassaqanngilaq.
Qaammammut ineqarnermut akiliutip 1972-imi 825 koruuniusup naqinneratigut, aamma ullumikkut qaammammut ineqarnermut akiliutip 8.314 koruunit naqinnerisigut, ineqarnermut akiliut ullumikkut aningaasat nalingi naapertorlugit 6.487 koruunit missaanniittussaavoq, ukiut ingerlaneranni aningaasat naleerukkiartornerat ilanngunneqarpoq. Nikolaj Heinrich 1.827 koruuninik amerlanerusunik akiliuteqartarpoq.
Utoqqaat innarluutillillu
Naleqqap 2021-mi Inatsisartunut qinersisoqarnerani ilaatigut pisortanut inissianik attartortut inissiamik piginnittunngornissamut periarfissaqarnissaat qineqqusaarutigaa.
Nikolaj Heinrich inissiami najukkamini ukiut qulikkuutaat tallimat sinnerlugit najugaqarpoq.
Leiff Josefsen
- Assersuutigalugu pisortat utoqqarnut, inunnut innarluutilinnut aamma allanut pisariaqartitsisunut inissanik pilersuissasut siunnersuutigaarput, Naleqqami siulittaasoq Pele Broberg oqarpoq, taanna partiini siulittaasuni kisiartaalluni AG-p saaffiginnissutaanut akissuteqarpoq.
Taassuma oqarnera naapertorlugu politikkikkut inissianik tunniussinissamut periusissat amerlapput. SIK-mut ilaasortat soraarnerussutisiassanut aningaasaateqarfimminni nutarterinissamut assingusunilluunniit taarsigassarsinissamut atorsinnaagaat, Pele Brobergip periusissatut siunnersuutigaa.
- Ilaasortat soraarnerussutisiassatik namminneq pigaat, SIK-mi soraarnerussutisiassanut aningaasaateqarfik SISA peqatigalugu nunatsinni ilaasortanut atuisoqarsinnaavoq. Tamanna soorunami inatsisip iluarsinissaanik pisariaqartitsiffiuvoq, immaqalu qallunaat inatsisaannik atuiunnaarnissamik, taanna oqarpoq.
SIK-mut ilaasortaannægitsunut namminneq assingusumik kattunnissaminnik aalajangiussaqarsinnaasut siunnersuutigaa, najugaqartullu kattunnissaminnut iliuusissaqanngippata pisortat aatsaat siunnersuuteqarumaartut.
Paatsoorneq
- Nunatsinni ullutsinni inissianik niuernermi ingerlalluartoqannginneranik oqariartuuteqarnerput attuumassuteqanngitsunit misissueqqissaarnerit uppernarsarpaat, Pele Broberg oqarpoq.
Pisortat inissiaataannit pisortat ”aningaasanik isertitaqarsimanngisaannartut” aamma politikkikkut pisariaqartumik tulleriiaarisoqanngippat equnganerujussuaq iluarsineqarsinnaanngitsoq, taanna isumaqarpoq.
- Tamatuma saniatigut ullutsinni sanaartornermi danskit taarsigassarsititsisarfiinit taarsigassarsiarineqartarput, taamaattumillu sanaartorneq naammassigaangat nunatta aningaasaqarneranut iluaqutaajunnaartarput. Aningaasat nunatsinni kaaviiaartinneqanngillat, taamaallaat sanaartornerup sivikitsup nalaani taamaaliortoqartarpoq, Pele Broberg AG-mut oqarpoq.
