Nuummi
innaallagiamik qamittoorneq ukiutoqaq sioqqullugu illoqarfiup ilaani
akunnerpassuarni unittoortitsisoq kommunimi politikerinut annertuumik
eqqarsaallatsitsivoq.
Tamatumunnga atatillugu kommuni nammineerluni
upalungaarsimanermut periusissiussasoq Siumut IA-lu suleqatigiillutik
siunnersuuteqarput.
Nuummi
innaallagiamik qamittoorneq ukiutoqaq sioqqullugu illoqarfiup ilaani
akunnerpassuarni unittoortitsisoq kommunimi politikerinut annertuumik
eqqarsaallatsitsivoq.
Tamatumunnga atatillugu kommuni nammineerluni
upalungaarsimanermut periusissiussasoq Siumut IA-lu suleqatigiillutik
siunnersuuteqarput.
-
Taamatut ukiukkut sila nillertereernerani innaallagissamik qamittoorneq
siulliunngilaq aamma kingulliunaviarunanngilaq. Taamaattoqartillugu kommunetut
piareersimaffigisariaqarpagut oqquviffissat piareersimanissai upalugaarsimaneq
eqqarsaatigalugu, taakkualu siumoortumik nalunngeriissavagut init sorliunersut
aamma innuttaasut nalussanngilaat sumunnassanerlutik taamaatut issitsillugu
oqquviffissat sumiinnersut, politikerit taakku marluk allapput.
-
Ininut oqquviffissanut piareersimaffigisariaqarparput innallagiaq sillimmat
(nødgenerator) ikkuffeqartariaqartoq piareeqqasumik aamma nødgeneratorit sumi
pissarsiarissanerlugit nalunngereertariararpagut. Kiisalu meerartallit
eqqarsaatigalugu kissartuliorfiusinnaasunik sillimmateqartariaqarpugut
imermillu. il.il, Peter Davidsenip (S) aamma Uju Petersenip (IA)
aalajangiiffissatut siunnersuutaanni ilanngullugu allanneqarpoq.
Taakkuttaaq
minus 10 gradinik ississimasoq eqqaasitsissutigaat.
-
Qujanartumilli kommunemiit iliuuseqartoqarneratigut oqquviffissat
piareersarneqalerput, Peter Davidsenip Uju Petersenillu oqaatigaat, aammattaarlu
oqquiffissat piareeqqanissaat aamma sila ajornerutillugu qanoq oqquiffissanut
assartuisoqarsinnaanera upalugaarsimanikkut piareersimaffigineqassasoq siunnersuutigaat.
Ingerlatsiviup
siunnersuut suliareqqissagaa Illoqarfimmik Ineriartortitsinermut
Sanaartornermullu Ataatsimiititap sapaatip-akunnera kingulleq ataatsimiinnerani
aalajangerneqarpoq.
Pisariaqarluinnartoq
Innaallagiaq
decembarip 28-ani qamittoormat innuttaasut oqquillutillu
toqqissisimasinnaaniassammata Kommuneqarfik Sermersuup Illorsuaq Timersortarfik
kialaarfittut ammarpaa. Dronning Ingridip Napparsimmavissuani nammineq
pisariaqartitsinermi pilersuut atorneqarmat Sana tamarmi kiassarneqarlunilu
innaallagiaqarpoq.
Naalakkersuisup
Kalistat Lundip (IA) ajornartooreernerup kingorna illoqarfimmi suliniutit
nalunaarutigai, tassanilu suliffeqarfiit, pisortat isumaginnittoqarfii
oqartussallu, matumani upalungaarsimasut qatserisartoqarfillu, nersualaarpai.
-
Politiit oqartussanik allanik peqateqarlutik sarfaaruttooqqanerup nalaani
piareersimapput pisut sillimaffiginiarlugit, allappoq, aammali »innaallagissiutinik
sillimmateqarnerup qanoq pisariaqarluinnartiginera« ilanngullugu
eqqaavaa.
Kalaallit
Nunaanni upalungaarsimaneq Naalakkersuisut tunngaviusumik suliassarigaat,
aammali illersornissaqarfik politiillu upalungaarsimasuusut Folketingimi
ilaasortap Aaja Chemnitzip nassuiaatigaa.
- Suliassat
naammassineqartussat assigiinngitsuupput, nukissiuuteqarnermullu tunngatillugu
aamma misissueqqissaarneq iluaqutaasinnaavoq. Akisussaaffiit
agguataarneqarnerat akisussaaffimmik arlaannaalluunniit tigumminninnginneranik
kinguneqarsinnaasoq oqartoqartarpoq. Taamaammat annertunerusumik
misissuisoqarnissaa pilersaarusiortoqarnissaalu immikkut pingaaruteqarpoq, AG-mut
oqarpoq.
