Innuttaassuseq: Islandimi oqaatsit piumasaqaatigineqartut

Islandimiutut misilitsinnermi allattariarsornerinnaanngilaq, sisamanilli immikkoortortaqarluni; tusarnaarneq, atuarneq, allanneq oqalunnerlu, Islandimi tusagassiorfik Iceland Review allappoq.

Misilitsinnermi qinnuteqartut Islandimi ulluinnarni inuunerminni qanoq atugaqarsinnaanerat, ilaatigut oqaloqatigiinnernut peqataasinnaanerat, oqaloqatigiinnernik paasinnissinnaanerat tv-milu radiomilu oqaluuserineqartunik pingaarnernik malinnaasinnaanerat paasiniarneqartarpoq.

Misilitsinneq

Islandimi Ilinniartitaanermut Atuarfeqarnermullu Pisortaqarfiup oqaatsinut misilitsinnermi uku misiliutigisarpai:

• atuarfimmi, suliffimmi inuttullu inuunermi ulluinnarni atukkani piginnaasat
• ilimaginngisamik pisoqartillugu imminut annaassinnaaneq
• sammisani ilisimasani oqaloqatigiinnermi peqataasinnaanermut oqaatsitigut piginnaasat
• inuit oqaloqatigiinnerini paasiuminartuni paasinnissinnaaneq
• sammisanut ilisimasaqarfigisanut tunngasunik oqaatsit nalinginnaasut atorlugit naatsumik atuarsinnaaneq
• sammisat nalunngisat pillugit oqaatsit paasiuminartut atorlugit naatsunik allassinnaaneq
• tusagassiuutitigut assigiinngitsorpassuarni, soorlu tv-kkut radiukkullu, sammineqartut pingaarnerit paasisinnaaneri

Islandimi innuttaassuseqalernissamut qinnuteqarneq pisariuvoq, tusagassiivik allappoq, ilisimatitsissutigalugulu innuttaassuseqalernissamik qinnuteqartoqarniaraanni ukiuni arfineq-marlunni nunami najugaqareersimanissaq nalinginnaasumik piumasaqaataasoq.

Immikkut pisinnaatitaaffiit

Islandimiumut katisimaneq arlalitsigut immikkut pisinnaatitaaffik periarfissiisarpoq, aamma Islandimi innuttaassuseqalernissamut nalilersorneqarsinnaanermut sunniuteqartarpoq. Inunnut allanut nunanit avannarlerneersunut aamma tamanna atuuppoq.

Islandimi 2009-miilli nunami innuttaassuseqalerusuttunut oqaatsit misilitsissutigineqartarput.