Innuttaasut kunngikkormiunik Nuummut tikilluaqqusipput

Nuiaqanngitsumi, seqinnarissumi anorsaalaannguartumilu kunngikkormiut Nuummut tikilluaqquneqarput.

Nuup Saavani kunngi Frederik, dronning Mary marluliaataallu prins Vincent prinsesse Josephine sisamanngornermi ullaakkut nalunaaqutaq qulinut tikimmata meeqqanit utoqqarnut utaqqipput.

Tassani Kommuneqarfik Sermersuumi borgmesterimit Avaaraq Olsenimit (IA) tikilluaqquneqarput, innuttaasullu hundredellit illoqarfiup immikkoortuani pisoqaanerpaami katersuussimasut ilassivaat.

Liv Aurora Jensenip kunngikkormiut ilassiartorniarlugit Nuup Saavanukarsimavoq. Kunngi Frederik qulingiluaata aamma Dronning Margrethep kunngikkormiuunerisa nalaanni aamma ilassiartornikuuai. Meeraalluni Qasigiannguani kunngi Frederik qulingiluaat, tassa kunngip Frederiup aataava, ilassinikuusimavaa.

- Kunngikkormiut uannut pingaaruteqangaarput. Kalaallit Nunaannut immikkut attuumassuteqarput, tamannalu nuannaraara. Eqqaamavara meeraaninni kunngi Frederiup qulingata aataava Qasigiannguaniittoq.

- Meeraallunga ilassinikuuara, aamma dronning Margrethe ilassinikuuara. Maanna kunngi Frederik ilassissavara, tassa inuuninni kunngikkormiut kinguaariit pingajuat, Liv Aurora Jensen Sermitsiamut oqaluttuarpoq.

Kunngikkormiunut asanninneq ingerlaqqittoq

Ammut ingerlalaariarluni Katersugaasiviup eqqaaniippoq Efa Aronsen, utoqqaat illuanni sulisoq. Ileqquusoq malillugu utoqqaat illuanni najugallit arlallit kunngikkormiut tikilluaqquniarlugit Nuup saavanukarsimapput:

- Kunngikkormiunik kunngikkormiullu ilaqutaannik utoqqaat ataqqinnilluinnartut malugisarpakka. Soorunami aamma uanga sunnerneqartarpunga, kunngikkormiunullu ataqqinninneq nuannarinninnerlu uannut sunniuttarpoq. Tikiffiup kusanarnerulaarnissaa kissaatigigaluaqaara, erfalasulerfiit marlussuinnaat inissisimammata. Immaqa kunngitta nutaap tikilluaqqunissaanut Nuup Saava kusassarnerusimasinnaagaluarparput, Efa Aronsen oqarpoq.

Heidi Møller-Fredsbo paninilu arfinilinnik qaammatilik Nuup Saavani ikaartarfiup eqqaani nikorfapput. Kunngikkormiunik tikeraartoqartillugu nuannaarutiginninnermik ilinniartinneqassaaq:

- Kunngikkormiut Kalaallit Nunaannut tikeraaraangata tamatigut malinnaasarpunga. Meeraallunga angajoqqaama dronning Margrethe tikikkaangat ilassiartorniarlugu Nuup Saavanut ilagisarsimavaannga. Maanna meeqqat kunngikkormiut pillugit ilinniartissavakka, kunngikkormiullu tikeraaraangata meeqqat ilagiuaannartassavakka. Kunngikkormiut nuannareqaakka, Heidi Møller-Fredsbo Sermitsiamut oqarpoq.