Inuit 25-t asimi ikiueqqaartartunngortut

Takornariartitsisarfik Two Ravens National Outdoor Leadership School aamma Kommuneqarfik Sermersooq suleqatigalugit Wilderness First Responderitut, tassa asimi ikiueqqaartartutut, pikkorissartitsivoq, tassanilu inuit 25-t nunanit tamalaanit akuerisaasumik Wilderness First Responderitut allagartartaarput.

Thorlak Skifte Nielsenip, Two Ravensimik piginneqataasup, Wilderness First Responderisut ukiut sisamat matuma siorna allagartartaareernikuugaluarluni pikkorissaqqinniarluni aalajangerpaa.

- Pinngortitami ukioq kaajallallugu sulisarama tikeraartunut, suleqatinnut uannullu akisussaaffeqarlunga. Pinngortitami isumannaatsuuneq ataasiaannarluni ilikkarneqarneq ajorpoq; sungiusartuartariaqarparput, Thorlak Skifte Nielsen oqarpoq.

Ilinniartitsinermi periutsit ilisimasallu nutaat tungaatigut allanngortoqarsimasoq, taamaammallu nutaanik paasisaqartuarnissani iliuuserisassanillu malinneqqissaartuarnissani pingaartillugit erseqqissarpaa.

- Ukiut sisamat ingerlaneranni ineriartortoqarsimaqaaq, ilinniartitseriaatsinut ilisimasanullu nutaanut tunngatillugu, taamaammat nutaanut malinnaanissara suliatigullu pikkorissarluarnissara uannut pingaaruteqarpoq, Thorlak Skifte Nielsen oqarpoq.

Pinaveersaartitsineq ikiueqqaarnertut pitsaanerpaatut

Thorlak Skifte Nielsenip ikiueqqaarnermik misilittakkaminik atuisariaqarsimanermik misigisaqarsimanngikkaluarluni tamanna sungiusarsimanerup piareersimasimanerullu iluaqutaaneranut uppernarsaatitut isigaa.

- Ikiueqqaarnermik piginnaasannik atuisariaqarlunga misiginikuunngisaannarpara, tamannalu sungiusarsimanermut, tamanik isumaginnissinnaanermut eqqorluartumillu periaaseqarnermut toqqaannartumik pissutaasoq isumaqarpunga. Pissutsit maluginiarnissaat ilikkarsinnaallugulu pinaveersaartitsinissamik eqqarsarsinnaagaanni ulorianartorsiornissaq pinaveersaartinneqarsinnaavoq, taanna oqarpoq.

Peqataasut assigiinngiiaarnerusut

Pikkorissartut ukioq manna assigiinngitsorpassuupput. Pinngortitami suliaqartut – takornarianik angallassisartut, silami angalasartut annaassiniartartullu – aammali pinngortitamik soqutiginnittut nalinginnaasut piareersarluarsimanerusut peqataapput.

- Tamanna isumaliortaatsimi pingaarutilittut allannguuteqarneruvoq: Qaqqani immamilu isumannaatsuuneq atortunut piginnaanernullu tunngassuteqaannanngilaq; aallartinnani eqqarsartaatsikkut piareersimanissaq pingaaruteqarpoq, Thorlak Skifte Nielsen oqarpoq.

Pikkorissartitsinermi, Idaho Rescue Training-imi ilinniartitsisunit misilittagaqarluartunit ingerlanneqartumi, peqataasut teorii tunngavigalugu sungiusarnermikkut aamma misiliilluni sungiusaanikkut ilaatigut napparsimasunik nalilersuisarneq, timiminnik nilloriartortoortunik ikiuineq, napisimasut allanillu silami ajutoornerit pillugit ikiuineq kiisalu pissutsini ajornakusoortuni qimarngussuineq ilikkarpaat. Peqataasuttaaq pisuussutit pinngortitami pissarsiarineqarsinnaasut atorlugit aaqqiissutissanik misileraaneq misilippaat.

Pikkorissarnermi ikiortissarsiorneq ungasippallaartillugu isumannaatsumik iluaqutaasumillu iliuuseqarnissamut sakkussat aalajangersimasut pissarsiarineqarput — taakkulu kajumissutsiminnik ikiuisartunut, inuussutissarsiutigalugu angallassisartunut asimiittartunullu nalinginnaasunut iluaqutaangaarput.

- Neriuppunga tamanna Kalaallit Nunaanni ukiumoortumik WFR-imik pikkorissartitsisarnermut aallarniutaasoq – peqataanissarlu tamatsinnut inassutigilluinnarpara, pikkorissaqataasoq Lasse Nymand oqarpoq.

Inuit amerlanerusut taamatut pikkorissaqataasarnerat ajunngitsumik takussutissaasoq Thorlak Skifte isumaqarpoq. – Taamatut pikkorissarumasut amerliartortillugit tamanna inuit imminut allanullu akisussaanerminnik paasinnilernerannut ersiutaasoq isumaqarpunga.

Takornariaqarnerujartortillugu siuariartorneq

Kalaallit Nunaanni takornariat amerliartortillugit pinngortitami isumannaatsuunissamik upalungaarsimanissamillu ilisimasaqarneq pingaaruteqarneruleriartuinnartoq Thorlak Skifte isumaqarpoq.

- Inuit pinngortitaliartartut amerliartorput, tamannalu isumannaallisaaneq eqqumaffiginngikkaanni isumannartuusinnaavoq. Amerlanerusut eqqortumik periaaseqarpata kikkunnut tamanut isumannaatsuunerulissasoq taanna oqarpoq.

Taamaammat takornarialerisut angallassisartullu siunissami isumannaallisaanermik pingaartitsinerulerumaartut neriuutigaa.

Nuummi takornariaqarnerup isumannaannerulernissaanut alloriaat

Pikkorissaaneq Kommuneqarfik Sermersuumut ataasiaannarluni iliuuseqarnerinnaanngilaq, illoqarfiilli pingaarnersaata issittumi takornariaqarnerup isumannaatsuuneranut siuttuunissaa anguniarlugu alloriarneruvoq. 

Nunaqavissut nunanillu allaneersut asimiikkaangamik toqqissisimallutik angalasinnaanissaat – Nuullu siunissami Issittumi takornarianut ingerlassisunik ilinniarluarnerpaanik peqartutut nittarsaanneqarsinnaanissaa anguniarneqarpoq.

- Takornariarfissatut tikeraatta toqqissisimallutik Kalaallit Nunaat paasisaqarfigissagaat qulakkeerusupparput. Pikkorissartitsinerup tamatuma nunap immikkoortuani isumannaallisaanerup qaffassarnissaanut najukkamilu ingerlatsisut nukittorsarnissaannut pingaarutilittut alloriarneruvoq, Bea Husum Terkildsen, Kommuneqarfik Sermersuumi Visit Nuuk-mi takornariartitsisarnermut pisortaq oqarpoq.