Inuit 53-it Siumut sinnerlugu Inatsisartunut sassarput
Sassartut kiinnat nutaat 32-it, taakkunannga kattuffinni siulittaasut marluk, tassaasut Jess G. Berthelsen (SIK) aamma Nikkulaat Jeremiassen (KNAPK) kiisalu 2021-mi Inatsisartunut qinersinermi sassaqataanikut 21-it sassaqqipput.
Siumup siulittaasuata, Erik Jensenip aammalu siulittaasut tulliisa marluk, Vivian Motzfeldtip kiisalu Hans Peter Poulsenip partiip qineqqusaarutai aammalu Inatsisartunut sassartitassai marlunngornermi saqqummiuppaat.
Assi: Oscar Scott Carl
Inatsisartuni qinersinermi kingullermi 2021-mi Siumup nunatsinni partiini annersaanini annaavaa.
Taamaakkaluartoq partiitut unammisartagatoqqani Inuit Ataqatigiit 2022-mi suleqatigilerpaa, naalakkersuisooqatigiinnerlu qinigaaffiup sinnera naallugu attanneqarluni.
Amerlassuseq pingaarnerunngilaq
Maluginiarnarmat parteersuup Siumup sassartitai sassarsinnaasut tamakkerlugit amerlassuseqanngitsut, tassa 62-iunngitsut apeqqutigigatsigu, siulittaasoq, Erik Jensen ima akivoq:
- Amerlassuseq pingaarnerunngilaq, pitsaassuserli pingaarneruvoq. Sassartitagut sineriak tamakkerlugu aggerfeqarput, uangalu sassartitagut tamaasa tatigilluinnarpakka.
Taamaattorli aamma Erik Jensenip ilanngullugu erseqqissaatigaa nunatsinni oqalliseriaaseq sakkortuumik ingerlanneqartoq inuttarsiuinertaqaqisorlu peqataaffigiumanagit sassartussaaagaluartut arlallit tunuartitertarsimasut.
Siulittaasup tulliata Vivian Motzfeldtip ilanngullugu erseqqissaatigaa sassartussaagaluit arlallit nunatsinni qinikkatut sulinermi atugassarititaasut, pingaartumik meeqqiornerup nalaaniileruttortunut atugassarititaasut pitsaanngitsut aamma pissutaaqataasut tunuartiinnartoqartarneranut.
Aatsitassarsiorneq uuliasiornerlu ersinngillat
Siumut Inuit Ataqatigiinnik suleqateqalerami aatsitassarsiornerup uuliasiornerullu tungaatigut politikkiminik pilliuteqartariaqarsimasoq qineqqusaarummi saqqummiunneqartumi aatsitassarsiorneq uuliasiornerlu ersinnginnerat suleqatigiinnerup nanginneqarnissaanik siunnerfeqarnertut paasisariaqarnersoq apeqqutigaarput:
- Siumup anguniagaani erseqqissumik allassimavoq aatsitassarsiornerup inerisarneqarnissaa anguniagarigipput. Taamatuttaaq uuliasiortoqarsinnaanera ammaffigaarput, piumasaqaatilli sakkortuut inunnut pinngortitamut avatangiisinullu mianerinneqqissaarneq innarliinnginnissarlu qitiujuaannassaaq.
- Taamaattorli aamma Siumumi politikkitsinnik allannguinikuuvugut, innuttaasut tusarnaaratsigit. Taamaammat uranitalinnik aatsitassarsiorsinnaanermut tunngatillugu maanna piumasaraarput inoqarfinni qanittumi tamanna siunnerfigineqassappat, pinngitsoorani innuttaasut tassani najugaqartut tusaaneqassasut piumanngippatalu pinngitsaalineqassanngitsut anguniakkatsinnut ilanngunnikuuarput, Jensen nassuiaavoq.
Atugarissaarneq nangittumik sulissutigineqassaaq
Siumut naalakkersuisooqatigiinnik pilersitsiniartoqalerpat pinngitsoorani sulissutigineqartariaqartunik piumasaqaatissaminik siunnerfeqarnersoq apeqqutigaarput.
- Qularnaatsumik oqaatigisinnaavarput naalagaaffinngornissamut tunngatillugu suliassat qinigaaffimmi aggersumi initoorujussuussaaq. Tamatumalu saniatigut nunatsinni inuuniarnerup oqinnerulersinneqarnissaanik sulissutiginninneq nanginneqassaaq.
- Takoreerparpummi qanorluunniit ajunngitsumik siunertaqarluta nunatsinni oqilisaassiniarnerput nunarsuarmi akinit tatisimaneqarnera qanoq sakkortusinnaatiginersoq, allaat oqilisaanerigaluit ilai siunertamisut sunniuteqanngitsoorlutik, taamaammat aamma taassuma nangittumik sulissutigineqarnissaa avaqqunneqarsinnaanngilaq.
Siumup qineqqusaarutaasa sinneri aammalu sassartitaasa aqqi partiip nittartagaani takuneqarsinnaaliivissut saqqummiussisoqarnerani aamma erseqqissaatigineqarpoq.
