POLITIIT ULLOQ UNNUARLU NALUNAARUSIAAT
Inuit arlallit imminnut navianartorsiortipput
Sila nillertereerpoq issilereerlunilumi. Kisianni Kalaallit Nunaanni Politiit suliassani arlalissuarni orniguttariaqarsimapput, inuit aalakoorpallaarlutik imminut aqussinnaajunnaarsimallutik maaniinnaq silami nalasunik. - Iluatsitsipput innuttaasoqatiminnit politiinilluunniit nakkutilliilluni angalasunit nassaarineqaramik, nassaarineqanngitsuugunik kingunerlorujussuarsinnaammat, Kalaallit Nunaanni Politiit nakkutilliisuisa pisortaat, Aputsiaq Hansen oqarpoq.
Kalaallit Nunaanni Politiit ulloq unnuarlu kingulleq assut ulapissimapput, ilaatigut inuit aalakoorpallaarlutik imminnut aqussinnaajunnaarsimasut, sumi tamaani silami nalasut ikiorsimasaat ikigisassaanngillat.
Asseq toqqorsivimmit: Leiff Josefsen
Kalaallit Nunaanni Politiit nakkutilliisuutitaasa pisortaat, Aputsiaq Hansen, ulloq unnuarlu kingullermi politiit nalunaarutaannit suliat suusimaneri pillugit tulleriaarilluni saqqummiussivoq.
Ulloq unnuarlu kingulleq inuit imminnut aqussinnaasimanngitsut silami sumi tamaaniittut, aqqusinerni angerlarsimaffinnilu eqqissiviilliornerit aammalu silami angerlarsimaffinnilu persuttaanerit amerlasuut orniguffigisariaqarsimavaat, ataatsimullu oqaatigalugu suliarpassuit tamarmik imigassamik aalakoornartutorsimanermut tunngassuteqarput.
- Soorunami inuit namminneq aalajangissavaat imigassamik aalakoornartutorusunnerlutik, kisianni kaammattuutigaarput imigassamik aalakoornartumik atuissagaanni imminut aqussinnaaneq eqqumaffigineqartuaannassasoq, imminummi aqussinnaajunnaaraanni imminut allanullu aamma ulorianartorsiortitsisoqarsinnaasoq eqqaamasassaavoq.
Matumani Aputsiaq Hansen innersuussivoq politiit inuit amerlasuut imigassamik aalakoornartutorsimanerup kingunerisaanik imminnut aqussinnaasimanngitsut, silami issilluni nillertumi nalasut nassaarineqartut arlalissuusimanerat. Taakku innuttaasoqatiminnit imaluunniit politiit nakkutilliillutik angalaarneranni nassaarineqarsimapput politiinillu ikiorneqarlutik.
- Soorunami ikiortussaavagut, kisianni aamma oqartoqarsinnaavoq iluatsitsisut nassaarineqaramik, tassami innuttaasunit politiinilluunniit nassaarineqanngitsuugunik kingunerlutsitserujussuarsinnaagaluarmata, Kalaallit Nunaanni Politiit nakkutilliisuisa pisortaat, Aputsiaq Hansen oqarpoq.
Aammattaaq ulloq unnuarlu suliaminnut allattorsimaffimmit tulleriaarinerani maluginiarnarpoq persuttaanerit imminullu toqunnissamik sioorasaarinerit amerlasimasut.
- Ulloq unnuarlu kingulleq aamma nuna tamakkerlugu silami angerlarsimaffinniluunniit persuttaanerit amerlapput. Angerlarsimaffinni eqqissiviilliortoqarfiusuni ataasiakkaani meerartaqarfiupput. Meeqqat sulianut akuugaangata politiit sumiiffimmi naliliisarput, isumaginnittoqarfimmut saaffiginnissuteqartoqassanersoq isumaginninnermilu suliassanngortitsisoqassanersoq. Pisumi pineqartumi angerlarsimaffimmi persuttaasoq aserorterisorlu takkunnitsinni qimagussimavoq, kisianni suliaq ingerlateqqinneqassaaq.
Taakku saniatigut aamma sumiiffinni assigiinngitsuni aserorterinerit, aalakoornartumik imersimalluni umiatsiartoqarsimaneranik pasitsaassaqarnerit aammalu tillinniariaraluarnerit arlallit politiinit orniguffigineqarsimasut sulianut ilaasimapput.
