Inuk nakuuserfigineqarlunilu tilliffigineqartoq

Kalaallit Nunaanni Politiit ulloq unnuarlu kingulleq pisunik assigiinngitsunik nalunaarfigineqarlutillu suliaqartut pigaartut pisortaat Aputsiaq Hansen pingasunngornermi ullaakkut oqarpoq.

Ilaatigut marlunngornermi unnukkut nalunaaqutaq 22.20 tillinniartoqarneranik politiit nalunaarfigineqarput.

Pisoq Nuummi bussini pivoq, tassani inuk nakuuserfigineqarlunilu pigisaanik arlalinnik tilliffigineqarsimavoq. Suliaq politiinit maanna misissuiffigineqarpoq.

Nuummi ullup ataatsip ingerlanerani pinngitsaaliisoqarsimanera aamma nalunaarutigineqarpoq. Suliaq taanna aamma misissuiffigineqarmat pigaartut pisortaat annerusumik paasissutisseerusunngilaq.

Nuummi umiarsualiviup eqqaani pisiniarfimmi nalunaaqutaq 03.34 kalerrisaarut aallartimmat politiit tillinniartoqariaraluarsimasoq aamma paasivaat. Tillinniariaraluarneq iluatsinngilaq tillittoqaranilu.

Inunnik kissaatiginngisamik sumiiffimmiittuni, angerlarsimaffinni aqqusinernilu eqqissiviilliortunik nalunaaruteqartoqarsimasoq pigaartut pisortaat nangilluni oqarpoq.