ISSITTUMI SAKKUTUUT AAMMA KALAALLIT NUNAANNI POLITIIT
Inunnik pingasunik ujaasineq suli ingerlasoq
Qeqertarsuup tunuani inuit pingasut ataasinngornerup unnuaani ujaarineqalerput, ujaasinerlu suli ingerlavoq. Ataasinngornermi umiatsiaaraq Poca nassaarineqarpoq, taannalu ujarneqartunut attuumassuteqarsinnaasoq ilisimatitsissutigineqarpoq, taamaattorli maqaasineqartut suli nassaarineqanngillat.
Foto: Arktisk Kommando
Ataasinngornermi unnuakkut Issittumi Sakkutooqarfik aamma Kalaallit Nunaanni Politiit Qeqertarsuup tunuani inunnik pingasunik annaassiniarlutik ujaasillutillu aallartipput.
Inuit maqaasineqartut suli nassaarineqanngillat. Kisianni Issittumi Sakkutooqarfik Kalaallit Nunaanni Politiilu nalunaarput umiatsiaaraq Poca, ujaasineqartunut attuumassuteqarsinnaasoq innuttaasunit ujaasinermi peqataasunit nassaarineqarsimasoq.
Ujaasineq suli ingerlavoq
Issittumi Sakkutooqarfik Facebook-imi quppernerminni nalunaarpoq ujaasineq sumiiffimmi ingerlanneqartoq SEAHAWK-helikopterimik Challenger-imillu timmisartumik.
Ualeq manna nalunaaqutaq tallimat qaangilaaraa Sermitsiaq Issittumi Sakkutooqarfimmut oqaloqatiginnippoq, taakkulu uppernarsarpaat maqaasineqartut suli nassaarineqarsimanngitsut ujaasinerlu nanginneqartoq.
Issittumi Sakkutooqarfik kaammattuivoq innuttaasut paasissutissanik pigisaqarunik Kalaallit Nunaanni Politiinut 701448-mut attaveqaqqullugit.
Kiisalu Issittumi Sakkutooqarfik nalunaarpoq suliaq pillugu Facebook-imi quppernerminni paasissutissanik nutarterisassallutik.
