Inupiluit Kalaallit Nunaanni akit qaffasinnerujussuat periarfissatut isigigaat
Ikiaroornartut akisungaatsiarnerat pissutigalugu inupiluit Kalaallit Nunaat niuerfigissallugu ornigisaraat politiit pisortaat oqarpoq.
Arkivfoto: Leiff Josefsen
Aningaasaqarnermut najoqqutassiat nalinginnaasut naapertorlugit, tassa piumaneqarneq neqeroorutigineqartarnerlu apeqqutaatillugit akigitinneqartut aalajangerneqartarmata, "aput" Kalaallit Nunaanni Danmarkimiit akikinnerunarsinnaavoq.
"Aput" pinerluttut silarsuaanni tassaavpq kokaini, taannalu akisunerujussuuvoq. Kalaallit Nunaanni ikiaroornartut akii kunngeqarfiup kujasinnerusortaaniittuniit quleriaammik akisunerusarput, tamannalu pinerlunnianut kajungerineqartorujussuusoq, DR Nyheder allappoq.
- Danmarkimiit aaqqissuussaasumik pinerlunniartartut nakuusernermut, ikiaroornartunik tuniniaanermut, agguaanermut anngiortumillu eqqussuinermut peqataallutik Kalaallit Nunaannut angalasartut nalilerparput, Malik Sandgreen DR Nyhederimut oqarpoq.
Niuerfik orniginartoq
"Aput" Kalaallit Nunaanni gramimut 3500 koruunit aamma 4500 koruunit akornanni akeqartartoq politiit pisortaat oqarpoq, Danmarkimilu nalinginnaasumik 600 koruunit missaannik akeqartarpoq.
Kalaallit Nunaanni hashi grammimut 500-1000 koruunit akornanni akeqartarpoq, Danmarkimili quleriaataanik akikinnerusarluni.
Pinerlunniaqatigiit maani niuerniassallutik orniginartittarpaat, Malik Sandgreen DR Nyhederimut oqarpoq.
Kalaallit Nunaat avinngarusimasumi inissisimanera pissutaalluni akit qaffasipput, inissisimaffiami pissutaalluni nunarsuup sinneranut attaveqarnera killeqarmat ikiaroornartunik assartuinissaq ajornakusoorneruvoq.
Kokain pillugu suliaq angisooq
Kokainimik eqqusseriaraluarnermut Eqqartuussisoqarfik Sermersuumi eqqartuussineq augustip qaammataani naammassineqarpoq. Taanna kokaini pillugu suliamik annertuumik Sermitsiami taagorneqarpoq.
Pingaarnertut eqqartuunneqartup 488,5 grammimik kokainiuteqarneranut tunngavoq, taassumalu annertussussaa Danmarkimi ikiaroornartuleriermik suliani angisuunut sanilliullugu annikinneruvoq. Danmarkimimi ikiaroornartunik kilonik ataatsimik, marlunnik pingasunilluunniit kisitsisitalinnik oqimaatsigisunik eqqartuussinerit nalinginnaanerusarput.
Angut ikiaroornartunik paarsami oqimaassusaata affaata missaat pillugit pinngitsuutinneqarpoq, ukiunilu arfinilinni paarnaarussassanngortinneqarluni.
Kalaallit Nunaanni kokainimut tunngatillugu suliami allami siorna juulimi suliarineqartumi arnaq kokainimik 200 grammimik anngiortumik eqqussisimasutut ukiuni sisamani qaammatinilu arfinilinni parnaarussassanngortinneqarpoq.
Arnap nassuiaataa naapertorlugu ikiaroornartumik Kalaallit Nunaannut anngiortumik eqqussinerminut 40.000 koruuninik neqeroorfigineqarpoq, Danmarkimilu inunnut akiitsoqarnini pissutigalugu taamaliorsimalluni.
Suliani taakkunani inupilunnut attuumassuteqartoqarsimanersoq eqqartuussutini allassimanngilaq.
/ritzau/
