Inuussutissarsiortup imerniartarfimmi nakuusersimanini nassuerutigigaa – pineqaatissinneqarani mianersoqquneqartoq
Polar Seafoodimik piginneqataasoq pisortaanerlu Bent Friis-Salling Nuummi imerniartarfimmi 2021-mi decembarip qaammataani angutip isaa toorpaa. Taanna pinerluuteqaqqissagaluartap pineqaatissinneqarsimasunut inissiisarfimmiittussassanngortinneqassasoq unnerluussisussaatitaasup marlunngornerup ullaavani piumasaraa, eqqartuussisulli mianersoqqussummik tunivaa.
Assi: Morten Okkels
Kalaallit Nunaanni angutit pisuujunerpaat inuussutissarsiornermilu pisortaanerit pingaarnerit ilaat Nuummi marlunngornermi ullaakkut eqqartuunneqarnera naammassineqarpoq. Bent Friis-Salling 2021-mi decembarip 18-iani nakuusersimasutut unnerluutigineqarpoq, ullumilu Eqqartuussisoqarfik Sermersuumi eqqartuussinermi pisuusutut nalilerneqarsinnaasimalluni.
Bent Friis-Salling Nuummi imerniartarfimmi Daddy’s-imi ulloq taanna 2021-mi billiardertilluni inunnik allanik marlunnik peqqarniitsumik pissusilersortunik naapitsisimalluni nassuiaavoq.
Bent Friis-Sallingip inuup aappaa tikkuarniarlugu isaatigut toortoorsimallugu ilanngullugu oqaatigaa.
Unnerluutiginnissut naapertorlu isimigut toorneqartoq isaata ilua aanaarsimavoq.
Nakuusernerup sakkortussusaa eqqarsaatigalugu eqqartuunneqartoq pinerluuteqaqqissagaluarpat pineqaatissinneqarsimasunut inissiisarfimmiittussassanngortinneqartariaqartoq unnerluussisussaatitaasoq isumaqarpoq. Sulialli suliarineqarnerata sivisussusaa pissutaalluni ulluni 30-ni pineqaatissinneqarsimasunut inissiisarfimmiittussassanngortinneqarnissaa naapertuuttoq taanna oqarpoq.
Taamaattoqanngilarli. Mianersoqqusineq naammattoq eqqartuussisoq Medea Olsen isumaqarpoq. Suliap sivisuumik suliarineqarnera, Bent Friis-Sallingip inuttut atugaasa ajunngitsuunerat aammalu pinerlineqartup ajortumik pinissaa siunertarisimanngimmagu sakkukinnerusumik eqqartuussineq inernilerneqarpoq.
Bent Friis-Sallingip eqqartuussut akueraa. Unnerluussisussaatitaasup eqqartuussut Nunatta Eqqartuussisuuneqarfianut suliareqqitassanngortissanerlugu ulluni 14-ini eqqarsaatiginissaanut piffissaq atorniarpaa.
Taamatut pisoqartillugu eqqartuunneqartup aqqa Sermitsiami saqqummiunneqarneq ajoraluarpoq, Bent Friis-Sallingili nunami inuussutissarsiortut nuimanerpaat ilagimmassuk eqqartuunneqartup aqqa saqqummiunneqarpoq.
