KL

DK

Inuussutissarsiortut nersualaarinnittut: Politiit pisunut piareersimapput

Sulisitsisut Peqatigiiffiata innaallagiaaruttoqarnerani Kalaallit Nunaanni Politiit suleqatigilluarsimanerat naammagisimaarluarpaa.

Sulisitsisut pisortaata Christian Keldsenip Nuummi innaallagiaaruttoqarmat politiit inuussutissarsiortunik akuliutsitsipallassimanerat nuannaarutigaa.
Jesper Hansen freelance tusagassiortoq
Saqqummersinneqarpoq

Nuummi arfininngormat ullaap tungaaniit ullup annersaani innaallagiaaruttoqareersorlu Sulisitsisut pisortaata Christian Keldsenip Kalaallit Nunaanni Politiit nersualaarpai. Politiit pissutsit iliuuseqarfiginiarneranni inussutissarsiortunik ingerlaanneq peqataatitsinerat nersualaarneqarpoq.

- Politiit nersualaarpakka pissutsini makkunani piareersimalluarsimammata inuussutissarsiortullu ingerlaannaq akulerutsillugit. Politiit oqaloqatigilluarpavut suliffeqarfinnillu generatorinik pilersuisinnaasunik assartuisinnaasunillu innersuussisarsinnaasimalluta, Christian Keldsen Sermitsiaq.AG-mut oqarpoq.

- Innaallagiaaruttoqarnerani pisunik piareersimaffiginninnerit takullugit toqqissisimanaqaaq.

Suleqatigiilluartut

- Politiinut ingerlaannaq ornigukkama Nukissiorfiit pisortartaavat taakaniippoq, taanna soorunami aamma soorunami siusissukkut akuuvoq pisunillu aqutseqataalluni. Aamma isumaqarpunga aaqqiissutissanik siunnersuuteqarsinnaasut tamarmik suleqatigiilluartut, Christian Keldsen oqarpoq.

- Suliffeqarfiit ilaasortaasut ataavartumik attaveqarfigisaakkavut aamma sukkasuumik sulillutik aallartipput.

- Inuussutissarsiortut ilarpassuannut akunnerni arlaqanngitsuni innaallagiaqannginneq akisusinnaavoq ajornartorsiortitsilersinnaallunilu. Ingammik niuertut neriniartarfiillu eqqugaapput. Nioqqutissanik qerititsivinniittoqarpoq nillataartitsivinniittoqarlunilu akunnerillu arlaqanngitsut qaangiuppata igiinnarneqartariaqalertussanik, taamaammallu annaasaqaataassallutik tamatumalu saniatigut kaaviiaartitanik annaasaqaataassallutik. Atortorissaarutit akisuut ilaat innaallagissap ikeqqinniarnerani ajoquserneqartut maanna aamma misigaarput.

Illoqarfiit pingaarnersaat ajutooriaannaasoq

- Nuummi qanoq eqqugaariataarsinnaatiginersugut pissutsit takutippaat, aamma illoqarfissuartut qanoq avinngarusimatiginersugut. Taama immikkuullaritsiginngilagut, aamma silarsuarmi sumiiffinni allani illoqarfiit pingaarnersaanni innaallagiaaruttoqarsinnaanera pisarpoq, Christian Keldsen nassuiaavoq.

- Uagulli allaanerussuteqarpugut, innaallagiaq allamut ingerlatissinnaannginnatsigu, qanittumilu aaqqiissutissat nammineerluta nassaarisariaqartaratsigit. Qujaniarta sillimmateqarmat, 2021-milu innaallagiaarunnerup kingorna taassuma qanoq pilersuisuinnaatiginera aamma eqqumaffigineqalersimasoq maluginiarpara. Isumannaallisaanermut tunngatillugu taamatut pisoqartillugu ilinniarfigineqartuaannarpoq.

Paasissutissat qanoq annertutiginerat pillugu isumat assigiinngitsuujuaannarput, kisianni isumaqarpunga Nukissiorfiit Facebookikkut paasissutisseeqattaarnerat ajunngilluinnartoq aamma tusagassiuutit taamaaliorput. Mobilikkut attaveqaatit ilaat artorsarput, taamaattumillu aaqqiissutissatsinnik isumassarsiortariaqarluta, qujanartumilli illoqarfik ima angitiginngilaq sianinngikkaluarluta naaperiaannaasaratta.

– Christian Keldsen, Sulisitsisut pisortaat

Pitsaanerusinnaavugut

- Illoqarfik immikkoortukkaarluni ikikkiartuaarpoq, tamatumalu kingunerisaanik sumiiffiit ilaat ikumapput ilaallu suli qaminngallutik. Malugisimavarput inuppassuit biilillu orsersortarfiit pisiniarfiillu ammasunukaasut, taamaalillunilu pisiniarfiit silataanni aqqusinernilu tulleriiaartoqarluni. Tamanna pinngitsoortinniartariaqarpoq. Taamaattumik pitsaassaaq sumiiffiit tamanut ammasut soorlu pisiniarfiit ingerlaannaq ammarnissaat, tassami inuit pisariaqartitatik assigiinngitsut piniarlugit taakkununnga orniguttarput.

- Qujanartumik sukkasuumik qaangiuppoq, kisiannili akisusimavoq — ilimagisariaqarparpullu sillimmasiisarfiit maannakkut suliassaqalersimasut.

samfund nuuk christian keldsen strømafbrydelse grønlands erhverv inuiaqatigiit nukissiorfiit

ATORFIIT Se alle jobs

Powered by Labrador CMS