Inuussutissarsiutinut tunngasunik ilinniagaqartut unitsitsisartut amerlapput
Inuussutissarsiutinut tunngasuni ilinniarfinni ilinniartut amerlanersaat taamaatitsisarput, arnat 50 procentii angutillu 57,1 procentii suli naammassinatik ilinniarnerminnik unitsitsisarmata.
Ukiuni pingasuni ilinniarnertuunngorniarfimmi ilinniartut arnat affangajaat angutillu 36,6 procentii piffissaq eqqorlugu naammassisarput.
Leiff Josefsen
Inuusuttut ilinniakkamik aallartitsineq ajortut suli amerlapput, tamanna Naalakkersuisut 2023-mut suliffeqarnermut nalunaarusiaanni takuneqarsinnaavoq.
Ilinniakkat aallartinneqartut naammassineqarsimasut Naatsorsueqqissaartarfiup naatsorsorsimavai, tassanilu pingaartumik inuussutissarsiornermut tunngasunik ilinniagaqartut ilinniakkaminnik unitsitsisartut amerlanerpaapput.
Paasissutissat: Kalaallit Nunaanni Naatsorsueqqissaartarfik
Takussutissaq una ukiut pingasut ingerlaneranni ilinniarnertuunngorniarfinni ilinniarsimasunut tunngavoq. Angutit arnallu 50 procentii inorlugit ilinniakkaminnik unitsitsisarput, taamaakkaluartorli ilaat ukiuni tallimani ilinniakkaminnik naammassinninniarsinnaasarput. Inuussutissarsiutinut tunngasunik sivikinnerusumik ilinniagaqartut naammassinninnerpaasarput, amerlanerit ukiut pingasut ingerlaneranni naammassisarlutik.
Inuusuttut Majoriami oqaloqatiginninnissamut takkunneq ajorput
Inuusuttut amerlanerusut ilinniagaqalernissaannik kajumissaarniarlugit Majoriaq inuusuttunik suliffissaaleqisunik ilinniagaqarsimanngitsunillu oqaloqateqarnissamut aggersaasarpoq, aggersagaasulli 52 procentii takkutinngitsoortarput, nalunaarusiami allassimavoq.
Ilinniarnissamut ingerlaariaqqinnissamut pappiaqqatigut aaqqitassaqarnersoq imaluunniit karakteerit qaffassagassaanersut oqaloqatiginninneq qulaajaaneruvoq.
Nunap sumiinneranik peqquteqartumik assigiinngissutit aamma ilinniarnermi atuuttut suliffeqarnermut nalunaarusiap tikkuarpaa. Ilinniarnermik aallartitsineq ilungersunarsinnaasoq nunaqarfimmiut inuusuttut oqariartorput, atuagassarititaasunit atuuttuni aallaaveqartuni.
Suliniutit arlallit
Ajunnginnerusumik ilitsersuineq, ilinniarfeqarfiit nutaat ilinniartullu inissaat nutaat amerlanerit Naalakkersuisoqarfiit akimorlugit suliniutaasut ilisimatitsissutaavoq. Illoqarfinni annerni, aammalumi ilinniarfeqarfiusuni tallimaasuni (Qaqortoq, Nuuk, Sisimiut, Aasiaat aamma Ilulissat) ilinniartut inaannik nutaanik inissiornissaq 2020-imi Naalakkersuisut akuersissutigivaat.
- Ilinniartunut inissiorneq suli ingerlanneqarpoq tulleriissaarinertigut piviusunngortinneqartarluni, suliffeqarnermut nalunaarusiami 59-inik quppernilimmi tamanna atuarneqarsinnaavoq.
Naalakkersuisut suliffeqarnermut periusissiaat suliniutinik immikkoortunik pingasunik imaqartoq Isumaginninnermut, Ilaqutariinnermut, Suliffeqarnermut Nunamullu Namminermut Naalakkersuisoq Jess Svane siuleqummi allappoq:
- Suliffeqarneq imminut napatittoq
- Inuusuttut suliffissaaleqinerat annikinnerusoq
- Ilitsersuineq aamma piginnaanngorsaaneq
- Periusissiarli kisimiissinnaanngilaq. Inuiaqatigiinni unammilligassanik tamakkiisumik isiginnittumik paasinninneq ullumikkut inissisimanitsinni pingaarnerusimanngisaannarpoq. Ingerlatsiviit aaqqissuussallu assigiinngitsut akimorlugit suleqatigiinnerup annertusiartorneranik tamanna isumaqarpoq, siuleqummi Naalakkersuisoq oqarpoq.
