ULLOQ UNNUARLU KINGULLERMI PISUT
Inuusuttuaraq imigassartorsimasoq napparsimmavissuarmi eqqissiviilliortitsisoq
Inuusuttuaraq Nuummi napparsimmavimmi eqqissiviilliortitsisoq politiinullu marlunnut nakuusertoq marlunngornermi tigusarineqarpoq.
Assi: Leiff Josefsen
Ulloq unnuarlu kingulleq Nuummi sinerissamilu politiit suliassaqangaatsiarsimapput.
Pigaartut pisortaata Poul Kreutzmannip Sermitsiamut tamanna oqaluttuaraa.
Imigassartorsimasut eqqissiviilliortitsinerannit arlallit peqquteqarput. Marlunngornermi ullaakkut nalunaaqutaq 08.22 politiit Nuummi ajoqusersimasut nakorsiartarfianni eqqissiviilliortoqarneranik nalunaarfigineqarput.
Angutip inuusuttup 18-it inorlugit ukiullip aalakoorluni sulisut kamaffigisimavai.
Politiit takkummata aamma taakku kamaffigineqarsimapput. Angut inuusuttoq tigusarineqarpoq politiinullu marlunnut nakuusersimasutut nakorsiartarfimmilu sulisunut nakuusersimasutut unnerluutigineqarluni.
Biilit marluk aporsimasut
Marlunngornermi ualikkut nalunaaqutaq 14.26 politiit nalunaarfigineqarput Inspektørbakkenip aamma H.J. Rinksvejip nalaani aqqusinikkut angallannermi ajutoortoqarsimasoq.
Pigaartut pisortaat oqaluttuarpoq biilit marluk aporsimasut, pisumullu orniguttut amerlasimasut.
Annertunerusumik ajoqusertoqanngilaq, arnali ataaseq Sanamut ingerlanneqartariaqarsimavoq.
Nuussuarmi niuertarfimmi eqqissiviilliortitsisoq
Ullup ingerlanerani politiit arlaleriarlutik Nuup ilaanut Nuussuarmut orniguttariaqartarsimapput.
Inuit aalakoortut pisiniarfiup Akikip silataani eqqissiviilliortitsisimapput, ilaallu politiinit tigusarineqarsimavoq, aalakoorpallaarsimasutut politiinillu mitaatiginnittutut unnerluutigineqarluni.
Aalakoorluni biilernermillu allagartaqarani biilertoq politiinit unnuap qeqqa qaangilaaraa aamma unitsinneqarpoq.
Poul Kreutzmann oqaluttuarpoq ilaasut ilaat aamma akiligassinneqarnissaminik naatsorsuuteqartariaqassasoq, biilersinnaanermut allagartaqaraluarluni aalakoortup biilersinnaaneranik akuersisimanini pillugu. Ilaasoq aamma aalakoorsimavoq.
Tillinniat tigusarineqartut - ujaasineq suli ingerlavoq
Politiit pingasunngornermi ullaakkut arfernup missaani nalunaarfigineqarput Nuummi pisiniarfimmi tillinniartoqarsimasoq, pigaartullu pisortaat oqaluttuarpoq politiit ornigutipallassimasut.
Politiit qimmiat politiinut ikiuuppoq, pinerluttullu marluk unitsinneqarsimallutik, maannalu tigusarineqarput, suliarlu politiinit maanna suliarineqarluni.
Pigaartut pisortaat Poul Kreutzmann aamma oqaluttuarpoq Maniitsup eqqaani angummik 59-inik ukiulimmik ujaasineq suli ingerlanneqartoq, ajoraluartumilli ujaarineqartoq suli nassaarineqarsimanngitsoq.
