Inuusuttut kommunalbestyrelsii innersuussipput: Atuartut 7. - 10. klassimiittut nal. 9.00 atuariartortassapput
- Sininneq inuusuttunut pingaaruteqarpoq, taama inuusuttut kommunalbestyrelsii innersuussutiminni, Kommuneqarfik Sermersuumi kommunalbestyrelsimut tunniussaminni tunngavilersuipput. Inuusuttut kommunalbestyrelsiisa innersuutigaat atuartut 7. - 10. klassimiittut nal. 9.00 atuariartortalissasut.
Inuusuttut kommunalbestyrelsii Nuummi ataatsimiinnerat Nuummi ukioq manna februaarip 13-ani, 15-ani aamma 16-ani ingerlanneqarpoq.
Assiliisoq: Kommuneqarfik Sermersooq
Kommuneqarfik Sermersuumi Inuusuttunut kommunalbestyrelsi kommunalbestyrelsimut arlalinnik innersuussuteqarpor inuusuttut atugaasa pitsanngorsarneqarnissaat siunertaralugu.
Siunnersuutit pingaarnerit ilagaat nalunaaquttap atuariartorfiusartup allanngortinnissaa, inuusuttut sininnerulaarsinnaanissaat, taamaalillutillu atuarfimmi ingerlalluarnerusinnaanissamut angusaqarluarnissamullu periarfissinneqarnissaat, siunertaralugu.
- Sininneq inuusuttunut pingaaruteqarluinnarpoq, taama allassimavoq innersuussutini inuusuttut kommunalbestyrelsiinut ilaasortanit 23-nit atsiorneqarsimasuni, ilaatigut Paamiuniit, Ittoqqortoormiiniit, Kulusummiit, Kuummiit, Qeqertarsuatsiaaniit, Tasiilamiit, Isertumiit, Tiilerilaamiit aamma Nuummiit.
Inuusuttut kommunalbestyrelsiat innersuussuteqarpoq 7. klassimiit 10. klassimut atuartut ullaakkut qulingiluanut atuariartortalernissaannik, nalinginnaasumik arfineq-pingasunut atuariartortarneq atorunnaarsillugu. Innersuussut taanna meeqqat pisinnaatitaaffiini artikel 3-mi, meeqqat soqutigisaat, qasuersaarnissaat sunngiffimmilu sammisaqarnissaannut tunngasumit, tunngavilersorneqarpoq.
Innersuussutit allat
Meeqqat atuarfianni nalunaaquttap atuariartortarfiup allanngortinneqarnissaata saniatigut inuusuttut atugarissaarnerunissaannut siunnersuutit allat pingasut innersuussutigineqarput.
Innersuussutit tassaapput 9-16-inik ukiullit akornanni ikinngutigiinnermik siuarsaasussanik qinngasaarisartullu ikilisinnissaannut siunertaqartumik naapeqatigiittarfimmik pilersitsineq, pinerlunnermik pinaveersaartitsinermik iliuuseqarniarnermillu angajoqqaat meeqqallu silami sammisaqarnissaannut naapittarfimmik pilersitsineq, kiisalu Qeqertarsuatsiaani sunngiffimmi ornittakkamik nutaamik pilersitsineq, Qeqertarsuatsiaani sunngiffimmi ornittagaq pisariaqartitanut naleqqukkunnaarsimanera pissutigalugu.
Inassuteqaatit taakku Kommuneqarfik Sermersuumi kommunalbestyrelsip ullumi pingasunngornermi maajip 15-ani 2024-mi ataatsimiinnermini kommunalbestyrelsemit oqaluuserineqassapput.
