Islandimi napparsimmavik Covid-19-imik tuniluuffiusoq
Islandimi universitetip napparsimmavissuani, Landspítalimi, Covid-19-imik tunillatsittut amerliartuinnarnerat pissutigalugu maanna tuniluuttoqarsinnaaneranik pinaveersaartitsinermik iliuuseqartoqalerpoq.
Toqqorsivimmit assilisaq: Leiff Josefsen
Islandimi napparsimmavimmi immikkoortortani arfineq-pingasuni napparsimasut sulisullu Covid-19-imik tunillatsissimapput. Juulip 16-ianni napparsimasut 32-t sumiiffinni assigiinngitsuni pingasuni mattusimatinneqarsimapput, Islandimi tusagassiorfik Iceland Review allappoq.
Tuniluunneq akiorniarlugu ullumi pingasunngornermiit suliniutit arlallit atuutsinneqassasut aalajangerneqarpoq, tusagassiorfik allappoq, malittarisassallu ukuupput:
Suliniutit
Napparsimmavimmi sulisut napparsimasunik, uninngasunik pulaartunillu tamanik attaveqarfiginnissatillutik kiinnamikkut assiaquteqartariaqarput. Sulisulli anersaartornermikkut tunillatsissimanerminnut ersiuteqanngikkunik sulisut akornanni kiinnamut assiaquteqartariaqartassanngillat.
Pulaartut tamarmik assatik tunillannartuiartassavaat.
Pulaartarnerit sivikillillugit ullut tamaasa nalunaaqutaq 17.00-19.00 aamma sapaatip-akunnerata naanerani nalunaaqutaq 15.00-18.00 pulaartoqarsinnaavoq.
Meeqqat aqqaneq-marluk inorlugit ukiullit napparsimmavimmut pulaaqquneqanngillat, ataatsikkullu marluinnaat pulaaqqusaapput.
