Islandimi ukiut inuuffiit appariarput
Islandimi innuttaasulerinermit kisitsisaatit nutaat naapertorlugit ukiut inuuffiit 2022-mit 2023-mut apparsimapput.
Assiliisoq: Leiff Josefsen
2023-mi Islandimi agguaqatigiissillugu angutit ukiut 80,7-it arnallu 83,8-it inuusarput. Taakku 2022-mit 2023-mut appariarnerulaarput, angutit ukiut 0,4-t arnallu ukiut 0,1-it ukiut inuuffii appariarmata, Islandimi tusagassiorfik Iceland Review allappoq.
Islandimi ukiut inuuffigisassatut naatsorsuutigineqartut 1985-imiilli angutinut ukiut arfinilingajannik arnanullu ukiut sisamat qaffariarsimasut, tusagassiorfik ilisimatitsivoq.
Kalaallit Nunaanni ukiut 71-it
Ukiut marluk matuma siorna aviisimi AG-mi Kalaallit Nunaanni ukiut inuuffiit allaaserineqarput, Kalaallit Nunaannilu ukiut inuuffigisassatut naatsorsuutigineqartut 71-iusut tassani allassimavoq, taamanikkut Naatsorsueqqissaartarfik taama ilisimatitsivoq.
Naalagaaffiit Peqatigiinnit nunani assigiinngitsuni ukiut inuuffiit allattukkatut takussutissiarineqartumi Kalaallit Nunaat 125-mi inissisimavoq. Savalimmiuni ukiut inuuffiit taamanikkut 84-iunerinik naatsorsorneqarpoq, FN-ip allattorsimaffiani nuna normu 3-tut inissisimalluni.
2022-mi FN-ip allattorsimaffiani tassani Norge Islandilu tallimaattut inissipput, ukiut inuuffiit 83-iullutik.
