Kommune Kujalleq imigassanik aalakoornartortalimmik tuniniaaqqilernissamut taasivoq – imigassanut kimittuunut inerteqquteqarneq atuutiinnassaaq
Kommune Kujallermi aalakoornartortalimmik imigassamut inerteqquteqarnerup atuutiinnarnissaa pillugu sisamanngornermi kommunalbestyrelsimi, taasissutigineqassaaq.
Kommunalbestyrelsip ajornartorsiutit ammasumik oqallisigimammatigit imigassamillu inerteqquteqarnerup suliarineqarnerani ajunngitsumik siunertaqartumik eqqarsarsimasutut Borgmesterip Malene Vahl Rasmussenip (D) qutsavigai.
Assi: Oscar Scott Carl
Kommune Kujallermi imigassamik oktobarip aappaaniilli sassaalliisoqarsinnaajunnaarlunilu, tuniniaasoqarsinnaajunnaarpoq. Inerteqqut tamanna atorunnaarsinneqassasoq, kommunalbestyrelsit ataatsimiinnerminni aalajangerput.
imigassamik aalakoornartulimmik tuniniaaneq sassaallernerlu ammaqqinneqarnissaat pillugu borgmesteri Naalakkersuisunut qinnuiginninnissaa, ataatsimiinnermi kommunalbestyrelsi aalajangerpoq.
Imigassamik tuniniaanerup 2027-mi januaarip aallaqqaataani aatsaat ammaqqinnissaa, Borgmesterip inassutigaa, kommunalbestyrelsenili amerlanerussuteqartut piaartumik ammaqqittoqarnissaanik kissaateqarnerisigut tamanna itigartitsissutigineqarpoq.
Imigassaq pillugu piumasaqaatit innersuussutillu arlallit ammaaqqinnermut atatillugu atuutilersinneqartassapput.
Imigassalli 22,09 procentimik kimittunerusullu tuniniarneqarsinnaanera killilersorneqassasoq kommunalbestyrelsip kissaatigaa. Imigassat soorlu vodka whiskeyluunniit tuniniarneqarnissaat inerteqqutaaginnassaaq.
Suliffeqarfiit imigassamik nioqquteqarsinnaanermut akuersissutillit inerteqquteqarnerup nalaani annaasaqarsimanerminnik taarsiiffigitinnissamut qinnuteqarsinnaanissaat anguniarlugu aningaasaateqarfiup pilersinneqarnissaa aamma akuersissutigineqarpoq.
Imigassaq pillugu ajorluinnartunik pisoqartareersorlu, ilaatigut Nanortalimmi toqutsisoqarnerup kingunerisaanik imigassamik, inerteqquteqarneq atuutilersinneqarpoq.
Ilaasortat pingasut eqqartukkamut attuumassuteqarpallaartut
Imigassamik inerteqquteqarneq pillugu oqaluuserisassap suliarineqarnerani kommunalbestyrelsimi ilaasortat pingasut suliamut attuumassuteqarpallaarnerat pissutigalugu, ataatsimiittarfimmit aneqquneqarput. Ilaasortat taakku suliffeqarfinnut imigassamik tuniniaanissamut akuersissutilinnut qanigisaasuummata.
Tusarniaanermi akissutit kiisalu imigassamik ammaasseqqinnissamut pilersaarutinut siunnersuutit oqaluuseriniarlugit nalilersorniarlugillu kommunalbestyrelsi ataatsimiinnginnermi immikkut sammisaqartitsilluni ullormik ingerlatsisoq Borgmester Malene Vahl Rasmussen (D) oqaluuserisassap suliarineqarneranut atatillugu ilisimatitsivoq.
Borgmesterip kommunimi suliffeqarfiit inerteqquteqarnerup nalaani iliuusai pillugit qutsavigai:
– Suliffeqarfinnut qujanaq kommunimi qiimaannarnissarput pillugu iliuuseqarnissinnut. Qujanarlu aaqqiissutissanik ujartuinissinnut.
– Kommunalbestyrelsi aamma qujanaq ajornartorsiutit ammasumik oqallisigisarmatigit imigassamillu inerteqquteqarnerup suliarinerani siuarsaaqataammata, Malene Vahl Rasmussen oqarpoq.
Borgmesteri: Hashimik atornerluineq annertunerulersimasinnaasoq
Imigassamik inerteqquteqarnerup nalaani meeqqat toqqissisimanerulertut kommunip maluginiaraa borgmesterip oqaatigaa. Ajornartorsiutilli allat takussutissaqartut, soorlu inerteqqutaasumik imigassanik tuniniaaneq, angerlarsimaffinni immiorneq, eqqiaanermi spritip imerneqartarnera, inuiaqatigiinnilu hashimik atornerluineq, imigassamik inerteqquteqarnerup nalaani annertuseriaateqarsimasinnaavoq.
Kommunalbestyrelsimili ilaasortat tamarmik aalajangiinissamut piareersimasutut misiginngillat:
– Aalajangiinerup taama annertutigisup aalajangiiffiginissaanut piareersimananga misigivunga, siunnersuutit tusarniaanermilu akissutit misissornissaannut piffissaqannginnatta. Ukiullu killigititaasut 21-nut qaffanneqassasut siunnersuutit sisamaanni aamma allassimavoq. Inatsisitigulli taama pisinnaatitaaffeqarpugut? Suliami isummernissannut piareersimanngilanga, Karen Marie Kyed Frederiksen (D) oqarpoq.
Siunnersuutit 18-it oqaluuserisaassani ilanngunneqarsimasut pillugit kommunalbestyrelsi aalajangiissanngitsoq borgmester Malene Vahl Rasmussen nassuiaavoq. Ingerlatsivimmit suliarineqarsimasut innersuussutit sisamat pillugit isummernissamut kommunalbestyrelsi taamaallaat pisussaaffeqarpoq.
Kiguneqaataasut suliniaqatigiiffiup Task Forcep malinnaavigissavaat
Imigassamik aalakoornartortalimmik ammaasseqqinnissap kingunerisassai nalilersorniarlugit immikkuttaaq suleqatigiissitaq (Task Force) pilersinneqarnissaa kommunalbestyrelsip akuersissutigaa.
Immikkut suleqatigiissitaq qaammatit pingasut qaangiunneranni, kiisalu qaammatit arfinillit qaangiunneranni, innersuussutinik saqqummiussissaaq. Taamaalilluni kommunalbestyrelsi imigassamik tuniniaaqqilernissamut pilersaarutip qanoq ingerlaqqinnissaa nalilersorsinnaassavaa.
Immikkut suleqatigiissitami ilaasortat tassaapput isumaginninnermut ingerlatsivimmeersut, peqqinnissaqarfimmeersut, politiinit kiisalu Isumaginninnermut Naalakkersuisoqarfimmeersut.