Naalagaaffiit Peqatigiit eqqartuussiviat: Myanmari inuiannik Rohingyanik toqoraavoq

Eqqartuussiviup nunanit tamalaanit peqataaffigineqartup naalagaaffik inuiannik toqoraanermut aatsaat siullerpaamik akisussaatippaa.

Eqqartuussisoqatigiit Naalagaaffiit Peqatigiit eqqartuussiviani eqqartuussisoq Yuji Iwasawa Myanmarip sorsunnermi pinerlunnerinik ikinnerussuteqartunullu Rohingyanut inuiannik toqoraasimaneranik eqqartuussinermi aalajangiineq atuarlugu Haagimi eqqartuussivimmi sisamanngornermi issiavoq.
Saqqummersinneqarpoq

Myanmarimiunut musliminut Rohingyanut ikinnerussuteqartunut inuiannik toqoraasimasut  uppernarsarneqarsimasoq nunat tamalaat eqqartuussiviat Haagimiittoq isumaqarpoq.

Eqqartuussivik 1940-kkunni nazistit inunnik toqoraanersuata kingorna aatsaat sisamassaa nunanit tamalaanit peqataaffigineqartoq inuiannik toqoraasimaneq uppernarsarneqarsimasoq aalajangerpoq.

Aamma eqqartuussiviup naalagaaffik sorsunnermi sualuttumik pinerluttuliornermut siullerpaamik akisussaatippaa.

Rohingyat 10.000-it missaanniittut toqutaasimasut immikkut eqqartuussisut peqatigiiffiat naliliivoq.

Aammattaaq sakkutuut Rohingyanik kinguaassiuutitigut atornerluisarput.

Sakkutuut innuttaasut pinngitsaalillugit arneriffigisarlugillu toquttarlugillu, meeqqat nakuuserfigalugillu Rohingyat illoqarfeeraat ikuallattarpaat.

Tamanna eqqartuussisup Iwasawa Yujip sisamanngornermi aalajangiinerani atuarneqarsinnaavoq.

Sakkutuut kinguaassiuutitigut nakuusernerat, ingammik arnat kinguaassiutaat kipineqartarnerat, eqqartuussisut qullersaasa aamma eqqaavaat.

Nakuusernerup taamaattup "inuiaat meeqqiorusunnerannik piginnaaneqarnermillu timikkut tarnikkullu sanngiillisitsinissaq“ siunertaraa, eqqartuussivimmi aalajangersakkami allassimavoq.

Myanmarimiut iliuusiisa annertussusaat pissusiallu "innuttanik pillaanissamut pisariaqartumit annerungaarput“.

"Myanmarip iliuusaanut nassuiaatissaq tutsuiginartoq tassaasoq Rohingyat ilarpassui nungutinniarlugit siunertaqartoqartoq“, eqqartuussivik isumaqarpoq.

Taamaalilluni inuiannik toqoraanermut inatsisitigut killiliineq naammassineqarpoq, nutaarsiassaqartitsivik Reuters allappoq.

Myanmarip unnerluutiginnissutit taakku ilumuunnginnerarpai.

Nunat tamalaat eqqartuussivianni suliaq ukiuni arfineq-marlunni ingerlavoq.

Gambiap suliaq nunat Islamikkut Suleqatigiinnermut Peqatigiiffimmut (OIC) 2019-imi ilaasortaasut 57-it sinnerlugit eqqartuussivimmut suliassanngortippaa.

Danmark nunallu allat qulit eqqartuussivimmut suliassanngortitsinermut ilanngupput.

Eqqartuussiviit taakkua aalajangiinerat pisussaaffiliivoq, FN-illi eqqartuussisuuneqarfiata qullersaqarfiata aalajangersagaat atuutilersissinnaanngilai.

Aalajangiineq tamanna Myanmarimi maanna præsidentiusup, sakkutuut siusinnerusukkut naalagaasa Min Aung Hlaing-ip, 2021-mi pissaanermik arsaarinnittup tatineqaatigeqqilerpaa.

Myanmarimi sakkutuunut naalagaallunilu naalakkani qaffasinnerpaatut 2017-imi atorfeqarpoq.

Min Aung Hlaing nunat tamalaat eqqartuussivianni (ICC), naalagaaffinnik pinnani inunnik ataasiakkaanik unnerluutiginnittartumi tamatuma saniatigut misissuiffigineqarpoq.

Eqqartuussisoqatigiit sisamanngornermi aalajangiinerat nunat tamalaat akornanni soqutigineqarluarpoq, eqqartuussisoqatigiinnimmi nunat tamalaat akornanni suliamut allamut inuiannik toqoraasimasinnaanermik tunngaveqartumut aamma sunniuteqarsinnaavoq.

Tamanna Israelimut suliakkiissutaavoq Sydafrikap eqqartuussivimmut tunniussaa.

Israel Gazami Hamasimut sorsunnermini Palæstinamiunik toqoraasimasoq Sydafrika isumaqarpoq.

RITZAU/ Reuters

Powered by Labrador CMS