ISSITTUMI SIUNNERSUISOQATIGIIFFIK
Issittumi innuttaasut sammineqarnerulissapput
Issittumi nunap inoqqaavi najugaqartiterput nunat killeqarfii akimorlugit. Inuiaqatigiit atugaat unammillernartuupput, silap pissusaata allanngoriartornera kisiat pissutiginagu, aammali issittormiut inuunerannut tunngasunik ilisimasaqarnerup annikitsuinnaanera pissutigalugu, taamaalillunilu siunissami atugassaalerumaartussat pillugit ilisimasat annikillutik. Taamaattumik Kalaallit Nunaat naalagaaffiuk sinnerlugu pilersaaruteqarpoq Issittumi innuttaasut sammineqarnerulissasut Issittumi Siunnersuisoqatigiinni siulittaasuunerup nalaani.
Katuap inersuaaraa ulikkaaveqqavoq tallimanngornermi, nunanut allanut tunngasunut Naalakkersuisoq, Vivian Motzfeldt (S) suleriaasissatut pilersaarut pillugu saqqummiussimmat minnerunngitsumillu issittumi aallartitaq nutaaq ilisaritimmagu.
Assi: Jensine Berthelsen
Kalaallit Nunaannit sivisuumik kissaatigineqarpoq naalagaaffeqatigiit iluani Issittumi pissutsinut siuttuunissaq. Ukiut arlallit diplomatiskimik isumaqatigiinniarnerillu ingerlareersullu, tassanilu aamma najummatsisimanartorsiortoqartareersorlu, Kalaallit Nunaat kissaatigisimasaminik angusaqarpoq, minnerunngitsumik Issittumi Siunnersuisoqatigiinni sulineq pillugu aammalu Issittumi aallartitap toqqarneqartarneranut tunngatillugu.
Tallimanngormat Vivian Motzfeldt naalagaaffeqatigiit sinnerlugit suliassatut pilersaarutit saqqummiuppai, taakkulu atuutissapput naalagaaffeqatigiit siunnersuisoqatigiinni siulittaasuuffigisaanni ukiuni marlunni.
- Naalagaaffeqatigiit Issittortaatut, ukiut arlallit unammilligassanut akiuuttareerluta, tassa Issittumi Siunnersuisoqatigiit pilersinneqarmatali ukiut 30-nngulersut matuma siorna, maanna iluatsipparput Issittumi pissutsinut tunngatillugu siuttuunissarput, minnerunngitsumillu Kalaallit Nunaat maanna pisinnaatitaaffeqalerpoq Issittumi aallartitamik toqqaanissamut, taamaattumik Kalaallit Nunaannut sivisuumik utaqqineqarsimasumik alloriarneruvoq annertooq, Vivian Motzfeldt Sermitsiamut oqarpoq.
Issittormiut annertuumik sammineqassapput
Issittumi Siunnersuisoqatigiit nunanik arfineq pingasunik ilaasortaqartarput, tassaasut Canada, Danmarki, Finlandi, Islandi, Norge, Rusland, Sverige aamma USA. Taakkua saniatigut ataavartumik peqataasoqartarpoq, taakkununnga ilaalluni ICC.
Vivian Motzfeldt naqissusiivoq Issittumi Siunnersuisoqatigiit sulineranni qitiusoq issittoq, tassanilu sutigut tamatigut atugassarititaasut, taamaattumik Issittormiut sammineqarnerunissaat pissusissamisoortuusoq:
- Uagut, Issittumi najugaqartut, misilittagaqarpugut sumiiffimmi tassani inuuniarnermik, taannalu kinguaariinnit siuaasatsinnit pisimavarput. Taamaattumik isumaqarpunga eqqortuusoq ersarissumillu ersersissallugu soqutigisavut anguniakkavullu, aamma nunat killeqarfiisa akimorlugit, pingaartumik Issittumi Siunnersuisoqatigiit aqqutigalugit sulissutiginninnissarput.
Issittumi Siunnersuisoqatigiit ukiuni 30-nngulersuni atuunnerani, ukiuni taakkunani ilisimasanik annertuunik katersisoqarnikuuvoq sulilu katersisoqarluni, pingaartumik silap allanngoriartornerata pinngortitamut avatangiisinullu sunniutai pillugit, tamatumalu peqatigisaanik periarfissat nutaat ammarneqartussat sikup aakkiartornera ilutigalugu.
Taamaattorli Issittumi innuttaasut atugaat, Vivian Motzfeldtip oqarnera naapertorlugu, annikitsuinnarmik sammineqarput, tamannalu allanngortinniarneqassasoq:
- Issittumi Siunnersuisoqatigiit issittoq tamaat isigalugu suliniutai assigiinngitsut ingerlaavartumik ingerlanneqarput, tamannalu soorunami ingerlaannassaaq. Tamatuma saniatigut minnerunngitsumillu kunngeqarfiup aalajangerpaa ukkatarisassat aalajangersimasut tallimat sammineqassasut, taakkulu tamarmik Issittumi innuttaasut inuuniarnerannut attuumassuteqarlutik massakkut siunissamilu.
Kenneth Høegh aallartitatut naleqqulluinnarmat toqqagaavoq
Vivian Motzfeldt naammagisimaarlinnilluarpoq Kenneth Høegh maanna kunngeqarfiup Issittumi aallartitarilermagu:
- Kenneth Høegh Issittumi Siunnersuisoqatigiit sulineranik misilittagaqarluarpoq, ukiuni arlalissuarni diplomatiskimik assigiinngitsutigut suliaqartarsimavoq, taamaattumillu eqqortuuvoq kunngeqarfiup siulittaasuunerani taassuma nunat ilaasortaasut arfineq pingasut issittumi aallartitai siuttuuffigisussanngormagit.
Kenneth Høegh nammineq, sivisuumik siulittaasuuffiup nikinnissaanut tunngatillugu piareersarnermi annertuumik suleqataareersimasoq, Issittumi siunnersuisoqatigiit atorfilittatigut suleqatigiinneranni, kunngeqarfiullu siulittaasuunerani aqutsinissaminut piareersimalluinnarpoq:
- Massakkorpiaq pingaarnertut sammissavarput Norgep kunngeqarfiullu Danmarkip siulittaasutut nikinnissaanut piareersarnerup ingerlanneqarnissaa, taanna pissaaq maajip 12-iani Tromsømi. Tamatuma kingorna sulinissamut pilersaarut aallartissavarput, tassungalu qilanaarpunga.
