Issittumi piginnaasanik annertusaanissaq pillugu nalornineq

– Suut qaquguluunniit pinissaat ilisimanagu piareersarneq ajornakusoorpoq, Sulisitsisuni pisortaq Christian Keldsen Issittumi piginnaasanik annertusaanissaq pillugu ullumi Illersornissamut ministereqarfiup suliffissuaqarnermut ulluini, Ballerup Super Arenami aqagu naggaserneqartussani, oqallinnermi oqarpoq.

Politikerinit kisiartaalluni oqallinnermi peqataasoq tassaavoq illersornissaq pillugu oqaaseqartartoq Carsten Bach Liberal Alliancemeersoq. Oqalliseqataasut allat taassaapput major Nikolaj Lundsteen Issittumi Sakkutooqarfimmit, Danmarkimi illersornissamut suliffissuaqarfiit pisortaat Joachim Finkielman aamma Christian Keldsen Sulisitsisuneersoq.

Major Lundsteenip uku eqqaavai:

- Angorusutarput suli angunngilarput.

Issittumi piginnaasanik annertusaanissap piviusunngortinnissaanut qaqugukkut qanorlu pisoqassanersoq oqaatigisinnaanngilaa.

- Umiarsuit nakkutilliisullu Kalaallit Nunaannut angalasinnaanerannut pissutaasoq tassaavoq inuttat piginnaanerat umiarsuup qanoq issusiaanngitsoq, umiarsuarnik aserfallatsaaliuisoqannginnera assersuutigaa.

Politikkikkut aalajangiisoqarnissaa ujartorneqartoq

Kalaallit Nunaanni illersornissaq pillugu politikkikkut aalajangiisoqarnissaa amigaataasoq oqarpoq.

Carsten Bachip Liberal Alliancemeersup isumaqatigaa.

Qaqugu iliuuseqartoqassanersoq apeqqummut Naalakkersuisut sunik pilersaaruteqarnersut nalugini Carsten Bach akivoq:

– Sakkutuut imarsiortut pillugit pilersaarutit Issittumilu sakkutuut imarsiortut sorliit atorneqarnissaat politikkikkut oqallisigineqarput, maannamulli oqalunnerinnaapput. Naluarput qaqugu susoqassanersoq. Simon Kollerup aperisariaqarparsi, oqarpoq.

Illersornissaqarfimmut sullissisoqassanersoq Sulisitsisut aperineqarput.

- Aap, kisianni qaqugu, sumi qanorlu annertutigisumik sulisoqassanersoq ilisimanagu ajornakusoortarpoq, Christian Keldsen akivoq, taassumalu pilersaarutit aalajangersimasut ujartorpai.

– Danmarkimi USA-milu illersornissaqarfiit ukiorpassuarni suleqatigisarsimavavut. Kissaatigigaluarparput erseqqinnerusumik iliuuseqartoqarnissaa. Sunaluunniit ilisimanngikkutsigu illersornissaqarfiup Kalaallit Nunaanni inuussutissarsiornermit pisariaqartitaanut qanoq iliuuseqarsinnaanitsinnik paasinninnissarput ajornakusoortipparput. Kisianni arlaannik pisoqarpat piareersimajumaarpugut, Christian Keldsen neriorsuivoq.

Neqerooruteqartitsisarneq isumaqatigiinngissutigigaat

Dansk Industrimeersoq Joachim Finkielman kalaallit suliffeqarfiutaannik atuinissaq pillugu aamma oqaaseqarpoq.

Kalaallit Nunaanni suliffeqarfiit minnerit peqataatinniaannarlugit neqeroorutit ilusilersorneqassasut taanna isumaqanngilaq.

– Aamma eqqarsaatigineqarsinnaavoq qallunaat kalaallillu suliffeqarfiisa suleqatigiilernissaat, oqarpoq.

Ajoraluartumik oqallinnissamut periarfissaqarpianngitsoq, aamma suliariumannittussarsiuussinerit qanoq ingerlanneqartarnerat pillugu Joachim Finkielman isumaqatiginerpaanagu Christian Keldsen oqarpoq.

– Isumaqarpugut pingaaruteqartoq neqeroorutit ataatsimoortinneqarnissaat, taamaalillutik kalaallit suliffeqarfii peqataanissamut piviusorsiortumik periarfissaqarniassammata. Tamanna aamma danskit naalakkersuisuisa Naalakkersuisullu isumaqatigiissutaanni allassimavoq, nangilluni oqarpoq.

Suliffeqarfiit avataaneersut Kalaallit Nunaanni niuerniarpata, tamanna kalaallit suliffeqarfii immikkut piginnaasaqarmata suleqatigalugit pissasoq Joachim Finkielmanip oqarnera Christian Keldsenip isumaqatigaa. Taassuma oqallinnermi aamma tikkuarpaa.

Issittumi piginnaasanik annertusaanissamut aningaasaliissutit 1,5 milliardit koruuniusut Trine Bramsenimit 2021-mi saqqummiunneqarput, 2024-milu upernaakkut kalaallit folketingimi ilaasortat naapertorlugit Kangerlussuarmi Issittumi tunngaviusumik ilinniarfimmut 15,6 millionit koruuniinnaat atorneqarsimapput.

Illersornissaqarfiup ullorititaani Issittumi piginnaasanik annertusaanissaq pillugu oqallinnermi politikerit amerlanerusut peqataannginnerannut pissutaavoq Illersornissamut ataatsimiititaliap Kalaallit Nunaannut angalanera.