Sara Næss Elleskov Ilisimatusarfimmi ph.d-nngorniarpoq. Ph.d-mik suliniummini kalaallit timaasa ilisimatusarfigineqarnerat saqqummersinneqarnerallu pissusissamisoornersoq kiisalu misigissutsikkut inuiaqatigiilerinermullu tunngasunik misissueqqissaarluni ingerlatissavaa.
Uummannap eqqaani nunattalu sinnerani apersuinerit apeqqutinillu immersuinermi misissuinerit tunngavigalugit suliniummini kinguaariit siuaasaminnut isiginnittaasiat tusarniaavigerusuppaa.
Sara Næss Elleskov Ilisimatusarfimmi ph.d-nngorniarpoq. Ph.d-mik suliniummini kalaallit timaasa ilisimatusarfigineqarnerat saqqummersinneqarnerallu pissusissamisoornersoq kiisalu misigissutsikkut inuiaqatigiilerinermullu tunngasunik misissueqqissaarluni ingerlatissavaa.
Uummannap eqqaani nunattalu sinnerani apersuinerit apeqqutinillu immersuinermi misissuinerit tunngavigalugit suliniummini kinguaariit siuaasaminnut isiginnittaasiat tusarniaavigerusuppaa.
Sara Næss Elleskov Københavnip Universitetiani itsarnisarsiornermi cand.mag.-itut ilinniagaqarlunilu ullumikkut Ilisimatusarfimmi ph.d.-nngorniarpoq. Suliffeqarfinni nuimasuni soorlu Nationalmuseet-imi, Københavnip Katersugaasiviani Odensemilu toqungasut timaannik misissuisarfimmi (ADBOU), siusinnerusukkut itsarnisarsiuutut, uumassusililerisutut kiisalu inuup inuiaqatigiillu pissusiinik misissuisutut suliaqartarsimavoq.
Assi: Emil Stach, Justin Case Productions.
SARA NÆSS ELLESKOVIP PH.D-A
Sara Næss Elleskov ph.d-nngorniarnini maanna qiterpaarpaa, 2027/2028-milu ukiukkut naammassissalluni naatsorsuutigaa, tamatumalu nalaani ilisimatusarnerminit paasisani saqqummiutissavai.
Siunertaq: Inuit toqungasut timaasa, ingammik 1500-kkunni Qilakitsummi timit paniinnarnikut arfineq pingasut, misissorneqarnerannut saqqumisinneqarnerannulu kalaallit isiginnittaasiat paasiniarpaa.
Periuseq: Uummannami allagaatinik katersuineq apersuinerillu tunngavigalugit inuit namminneq oqaasii, misigissusii silarsuarmullu isiginnittaasiat katersorneqarput.
Anguniagaq: Ilisimatusarnermi oqaluttuarisaanermut tunngasut kitaamiunit pissaaneqarfiginerannut unammillerneq, nunasiaateqarunnaarnissamik periusissiaq siuarsarlugu aamma nunap inoqqaavi pillugit ilisimatusarnerup ileqqussatigut najoqqutassianik pissaaneqarnikkullu pissutsinut tunngatillugu pisariaqartumik oqallitsitsineq.
Suliat: Uummannami misissuineq, illoqarfimmi innuttaasunik aaqqissuussinerit kiisalu Nunatta Katersugaasiviani ilisimatuunut assigiinngitsunik sammisaqartitsineq.
Ilinniarfik: Inunnik Ilisimatusarnikkut Pinngortitalerinermillu Ilisimatusarfik
Ukioq aallartiffia: 2024
Immikkoortoq: Ph.d.-mik suliniut
Suliniummi kalaallit toqusimasut timaannik ilisimatusarnerup kalaallinit aallaaveqarnerulernissaa anguniarneqarpoq. Ilisimatuussutsikkut misissuinerit kisimik sammineqannginnissaat, aammali timit toqunikut Kalaallit Nunaanni innuttaasunut takutitassiarineqarnerini kulturikkut, oqaluttuarisaanermi inuttullu naleqartitat eqqarsaatigineqartassasut anguniarneqarpoq.
- Inuit pissusiinik ilisimatuutut uumassusililerisutullu sulininni tamanna aallartippoq. Danmarkimi kalaallit toqusimasut timaat pillugit ukiorpassuarni misissuisarnitsinni ilisimatusarnermilu naligiinngilluinnartoqarsimasoq paasilerpara. Oqaluttuarisaanerup ingerlanerani kikkut kalaallinik siuaasalinnik ilisimatusarsinnaatitaasimanersut eqqunngitsumik oqaatigineqartarsimavoq.
- Tamanna erseqqissumik paasisaqarfigerusullugu ilinniakkama ingerlateqqittariaqarneranik misigisimavunga. Taamaammallu ilisimatusarnerup aqqutaa toqqarpara. Kalaallit siuaasai pillugit ilisimatusarneq qanoq paasineqarsinnaava?
Sara Næss Elleskov ph.d-nngorniarluni ilisimatusarnermini kinguaariit misigissusaat oqariartuutaalu sooq pingaarnerpaatinniarlugit taama aalajangersimanini pillugu taama oqarpoq.
Killissamik annertuumik qaangiineq: Niaqqunik tammajuitsussarsineq
Sara Næss Elleskov Københavnimi Panum Instituttimi naqqup iluani oqaluttuarisaanerup alannguanik taartumik naapitsinermini itisuumik eqqarsalerpoq. Kalaallit saarnginik katersisarneq taamanikkut ileqquusoq tupigusuutigalugulu nuanniilliutigaa.
- Kalaallit timaasa sinnikuannik taama amerlatigisunik danskit katersugaasivianni katersisoqarsimanera sunnerneqaatigaara. Naak nunasiaateqarsimanerup oqaluttuarisaanera uagut nammattariaqanngikkipput danskit amerlasuut isumaqaraluartut tamanna ullutsinni suli isumaqarpoq. Kalaallit siuaasaannik ilisimatusarnermut tunngatillugu suli immikkut pisinnaatitaaffeqarusullutalu oqartussaassuseqarnerorusuppugut.
- Taamaammat siuaasannik Danmarkimiittunik suliaqarnerma ingerlatiinnarnissaa ajornakusoortippara. Tamassuma qanoq isumaqarneranik paasisaqarnissara akisussaaffittut isigaara, Næss Elleskov oqarpoq.
Nunasiaanerup oqaluttuarisaaneranik allannguiniarneq taamanikkut ilisimatuussutsikkut ammip qalipaataanik tunngaveqartumik nikassaanermut tunngaannarani toqusimasunilli ataqqinninngitsumik pinninnerusoq Sara Næss Elleskov isumaqarpoq.
- Itsaq nunap inoqqaavi pillugit ilisimatusarneq nalinginnaasumik ammip qalipaataa tunngavigalugu immikkoortitsinermik ilisarnaateqarsimavoq. Piffissamili nutaajunerusumi pisartut – assersuutigalugu inuit aasaanerani sulinngiffeqarnerminni ilivitoqqaniit niaqqunik tigusisarnerat allaalluinnarpoq. Tamanna paasiuminaatsittarpara, isumaqarpungalu killissamik qaangiilluinnarnerusoq. Uanga siuaasannut taama pisoqarsimagaluarpat akuerineqarnavianngikkaluarpoq, Sara Næss Elleskov oqaluttuarpoq.
Qilakitsormiut
Toqungasut qanoq iliorluni saqqummersinneqassanersut ph.d-nngorniartumut apeqqutaasorujussuuvoq. Pingaartumik Qilakitsormiut toqungasut arfineq-pingasut tusaamasat ullumikkut Nuummi Københavnimilu siammarsimasut pillugit akerleriittunik misigissuseqarfigai.
- Akunnattumik misigissuseqarfigaakka. Paasisat annertusigaluttuinnartillugit, innuttaasullu qanoq isumaqarnerat namminerlu uanga eqqarsaatikka aallaavigalugit isumaga allanngorartuarpoq.
Inuit paniinnarnikut sisamat saniatigut Qilakitsummi ilivitoqqaniit atisat assigiinngitsut Nunatta Katersugaasiviani saqqummersinneqarput.
Assi: Emil Stach, Justin Case Productions.
- Timit paniinnarnikut ilaasa saqqummersinneqarnissaat inuppassuarnut pingaaruteqartoq ilisimavara. Inuit siuaasatik pulaartarlugillu taakku timai atisaalu immikkuullarissumik aserfallatsaalineqarsimasut pillugit paasisassarsiorfigisarpaat. Tamannali pissutigalugu timit paniinnarnikut avissaartinneqarput. Tamatumunnga tunngatillugu timit paniinnarnikut tamarmik assigiimmik aserfallatsaalineqarsinnaannginnerat ajornartorsiutaavoq. Taamaammat aserfallatsaalineqarnerpaat ataqqiniarlugit ilaannaat saqqummersinneqartarput.
- Neriuppungali timit paniinnarnikut tamarmik Kalaallit Nunaanni ataatsimoorsinneqalissasut – aamma siunissami pilersaarutaasoq ilisimavara , Næss Elleskov oqarpoq.
Uummannap eqqaani qeqertaasami Nuussuarmi Qilakitsumi aggusti 2024.
Assi: Sara Næss Elleskov
Ilisimatusarneq amerlanertigut matoqqasumik ingerlanneqartarmat ilisimatusartoq naapertorlugu katersugaasivinni ilisimatusarfinnilu katersugaatit pillugit inuppassuit ilisimasakippallaarput.
- Inunnit annerusumik eqqarsaatigineqarneq ajornera tamanut saqqummiunneqannginneranut pissutaasoq isumaqarpunga.
- Tamannali ilisimatuussutsikkut immikkut ittumik pissarsiarineqarsinnaasimannginnera pissutaasoq isumaqarpunga. Kalaallit timaasa paniinnarnikut oqaluttuarisaanerat pillugu ullumikkut ilisimatusarneq pinngortitamik ilisimatuussutsikkut periutsit pigisagut atuagassiani annerusuni soorlu Naturemi saqqummersinneqartunik tunngaveqarnerpaavoq.
- Ilisimatusarnermi paasisat qaqutiguinnaq paasiuminartumik nassuiarneqartarlutillu tamanut saqqummiunneqartarput, Sara Næss Elleskov nassuiaavoq.
Kalaallit Nunaanni amerlanerussuteqarneq pissutigalugu pereersut eqqarsaatigiunnaarlugit nutaarluinnarnik periarfissaqalersugut
Sara Næss Elleskov inuit timaat pillugit oqallinnermi aaqqiissutissarsiorniarluni nunat killeqarfiit avataanni isumassarsiorpoq.
- Nunat allat nunap inoqqaavisa utertinneqarnerannik inuiaqatigiinnullu ilanngutiteqqinnissaannik qanoq suliaqarnersut ilinniarfiginiarlugit suleqatigaakka.
Kalaallit Nunaannili pissutsit issittumi nunanit allanit allaanerulluinnarmata nunani allani periutsit assiliinnarlugit periuseqarnissaq ajornaatsuinnaanngilaq.
- Kalaallit Nunaat, Canada, Alaska Sibirialu assigiissuterpassuaqaraluartut Naalagaaffeqatigiinnerup danskillu nunasiaateqarsimanerata ilisimatusarnermut sunniuteqarluarsimanerat erseqqissartariaqarparput.
- Aammattaaq Kalaallit Nunaat amerlanerussuteqartut kalaaliuneri pissutigalugit nunanit allanit allaanerulluinnarpoq. Nunani allani nunap inoqqaavi sumiiffinni aalajangersimasuni ikittuinnaasarput. Tamanna pissutigalugu kulturikkut kingornussagut pillugit politikkikkut aalajangiisoqartillugu allaanerulluinnartumik inissisimaffeqarlutalu sunniuteqarsinnaavugut, Sara Næss Elleskov oqarpoq.
Ilisimatusarneq siammarterumagaa
Kalaallit Nunaanni ilisimatusarnermik suliaqartut amerliartoraluartut ilisimatuussutsikkut aalajangiiniarnermi inuiaqatigiit ikinnerussuteqartut sumiginnarneqartarput. Sara Næss Elleskov taama isumaqarpoq, taassumalu tunngaviusumik allannguinissaq ujartorpaa.
- Ilisimatusarnerup qitiusumik ingerlanneqarnera ajornartorsiutigaarput, ilisimatusarnerilli amerlanerit Nuummi ingerlanneqartarput. Sinerissami angalasarninni najukkami innuttaasut ilisimatusarnermut sunniuteqarsinnaanerat killeqartoq maluginiartarpara. Ilisimatusarnerup siammarternissaa inuillu Nuummi najugaqanngitsut oqaaseqartissinnaanissaat uannut pingaaruteqarpoq.
Sammisaq tamanna mianernangaaraluartoq Sara Næss Elleskovip ph.d-nngorniarluni suliniummi nunaqavissut kulturikkullu ingerlatsiviit akornanni aaqqiagiinngilersitsisinnaasutut ernumassutiginngilaa, suliniutilli ataatsimoortitsilersinnaanera naatsorsuutigaa.
- Suliniutima innuttaasut kulturikkullu ingerlatsiviit aaqqiagiinngissuteqarnerannik misigisaqarfiginngilara, akerlianilli attaveqatigiinnermik pilersitsisutut isigaara. Tamanna timit panernikut pillugu qanoq isiginnittaaseqartariaqarnitsinnik oqaloqatigiinnermik nutaamik aallarniutaavoq.
- Inuit timaat panernikut taakku ilisimatuussutsikkut misissugassaannaanngitsutut siuaasatsitulli isigisariaqarpagut. Inuit uumassusillit misigissusiisigut isumaasigullu sunnerneqarsimasutut, Sara Næss Elleskov oqarpoq.
