Jôrsep ikinngutini toqukkut qimagunnikut eqqaaniarlugit nutaamik immiussivoq

Jôrse Sørensen, nipilersortartoq, erinarsortartoq immiussisartorlu, maannakkut EP-mik nutaamik “Qaamaneq”-mik qulequtalimmik suliaqarpoq.

EP Kuupik Kleistip taalliaa “Qaamaneq” atorlugu taaguuserneqartoq, Jokum Nielsenimit Jôrse Sørensenimillu nipilersuuserneqarpoq.

Erinarsuusiami Majbritt Beckiugaluaq erinarsortoq qatitoortorlu Hans Jørgen Damgaardiugaluaq “Hasju”-mik taaneqartartoq immiussami ilaatinneqarput.

- Taamaalilluni erinarsuut immikkut ittumik isumaqalersinneqarpoq, nipilersuutit, erinnallu ingerlaartuarsinnaanerannik eqqaasitsissutaavoq, tusagassiutinut nalunaarummi taama allappoq.

“Qaamaneq”, Studiosimi Aqissermilu immiunneqarlunilu nipigissarneqartoq, Ulo Musicimit saqqummersinneqartoq Atlantic Musicikkimiillu siammarterneqartoq, nipilersukkanik pingasunik imaqarpoq, taakkunannga marluk taallartaqarlutillu pingajuat nipilersuusiaavoq.