Sisimiut avannaatunginnguani nuna ikuallattoq aqunneqarsinnaalersimavoq

Sisimiut avannaatunginnguani Kangerluarsuk Ungallermi, nunap ikuallannera siaruariartorunnaarluni aamaannanngorsimalluni pujuliortoq aqunneqarsinnaalersimasoq, Inunnguaq Lundblad, Qeqqata Kommuniani upalungaarsimasut pisortaat ilisimatitsivoq.

Nuna sanimut kilometerinik ataatsimik isorartutigisumik ikuallassimavoq.

- Anorlilerpat nunap ikuallannera ikummarisseqqissinnaavoq, neriuppunga anorlilissanngitsoq, Inunnguaq Lundblad oqarpoq.

Inunnguaq Lundbladip paasisai malillugit, Kangerluarsuk Ungallermi nunap ikuallannera, inuup mianersuaalliorluni innermik atuineranit aallartissimavoq.

Ikiuukkiartortoqassanersoq ullumi aaliangerneqassaaq

Sisimiuni qatserisartut nunap ikuallanneranik qamisaanertik ullumi qanoq ingerlanersoq takoreerunikku, illoqarfimmit allaminngaanniit qatserisartunik ikiuukkiartortussanik tikittoqassanersoq naliliiffigissavaat.

AAMMA ATUARUK

Sisimiut avannaatungaani nuna ikuallattoq

- Nuummiit qatserisartut tallimat aamma Maniitsumiit qatserisartut tallimat, upalungaarsimasullu aqutsisoqarfianniit ataaseq ikiuukkiartorlutik tikeriataarnissaminnut piareersimatinneqarput, Inunnguaq Lundblad oqarpoq.

Nunami innermik atuinissaq mianersuutigeqquneqartoq

Aputikissimanerata siallertannginneratalu kingunerisaanik nuna panertorujussuummat, innuttaasut nunami innermik atuissagunik mianersussasut kaammattuutigineqarpoq.

- Pingaaruteqarpoq nunami innermik atuisoqarnaveersaarnissaa, innermillu atuisoqassaguni nunap ikuallalersinnaanera mianersuutigineqartariaqarpoq, Inunnguaq Lundblad oqarpoq.