Isumaginninnermut Aqutsisoqarfiup kommunit isumaginninnermut tunngasuni tapersersorpai

Tina Evaldsen Isumaginninnermut Aqutsisoqarfimmi, Katuap illuatungaani P.H. Lundsteensvejimiittumi, 2023-mi februaarip aallaqqaataanili pisortaavoq. Isumaginninnermut Aqutsisoqarfiup Meeqqanut Inuusuttunullu naalakkersuisoqarfiup ataaniittup nuna tamakkerlugu meeqqanut inuusuttunullu paaqqinnittarfinnut, inunnut innarluutilinnut ulloq unnuarlu sullissivinnut, kommuninik suleqateqarluni isumaginninnikkut suliffeqarfiit allilerneqarnerannut, inuttut atugarliortunut pitsaaliuinermut katsorsaanernullu, kommuninut, suliffeqarfinnut il.il. ilitsersuinerit pikkorissartitsinerillu isumagisarai. 

– Kommunit meeqqanik inuusuttunillu angerlarsimaffiup avataanut inissiisarnerup pinaveersaartinnissaanut tapersersorneqarnissaat pingaarnertut suliassaraarput. Tamanna assigiinngitsutigut suliarineqartarpoq, soorlu siusissukkut iliuuseqarnikkut, MANU, ilaqutariinnut tapersersuinikkut, katsorsaanerit pikkorissarnerillu kiisalu sulianik suliaqartunut siunnersuinerit ilitsersuinerillu aqqutigalugit, Tina Evaldsen oqarpoq.

Kalaallit qallunaallu suleqatigiinnerat 

Meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit suleqatigiillutik suliniutaat 16-it Isumaginninnermik Aqutsisoqarfiup piffissami 2020-miit 2023-mut piviusunngortinnissaat akisussaaffigaat. Suleqatigiinneq suliniutinik amerlasuunik piffissap sivikitsup iluani ataatsikkut piviusunngortitsinissamik kinguneqartoq.

– Oqartussaasoqarfiit assigiinngitsut Danmarkimik suleqateqarnerisa naammassiartornerat ukiumi kingullermi sammineqarluarpoq. Isumaginninnermik Aqutsisoqarfiup suliniutit kommunini iluatsilluarsimasut nunatsinnilu ajunngitsumik sunniuteqarsimasut tunngavilernissaat atuutilersinnissaallu suliassaraa. Aamma periusissianik iliuusissatut pilersaarutinillu aqutsisoqarfiup tunngavigisassaanik suliaqarnermut piffissaq atorsimavarput.

Aaqqiissutissat ataqatigiinnerat

Tina Evaldsenip oqarnera naapertorlugu suliniuterpassuit aaqqissuussaasumik naammassineqarnissaanullu piffissamik killigititaqarnerat kalaallit qallunaallu suleqatigiinnerannut pitsaasuuvoq.

– Suliniutit tamarmik immikkut nassuiaateqarmata piffissarlu aallaqqaammut unammillernarmat Isumaginninnermik Aqutsisoqarfimmi suliniutit assigiissuteqarfiinik nassaarnissatsinnut piffissap atortariaqarnissaa uannut pingaaruteqarsimavoq. Isumaqarluartumillu eqqarsaatiginninnissamut piffissaqartariaqaratta. Immikkoortortaqarfiit akimorlugit ataqatigiissunik aaqqiissutissanik nassaarnissarput piffissami kingullermi sulissutigaarput, Tina Evaldsen oqarpoq, nangillunilu:

– Suliniutit kommuninut innersuussutigisavut suliamut tunngasuunissaat, kommunillu pisariaqartitaanut atugarisanullu naapertuunnissaat, pitsaasuunissaat atuutilernissaallu pingaaruteqarluinnarpoq.

Ilaqutariinni aqqutissioqatigiinneq

Ilaqutariinni aqqutissioqatigiinneq Kalaallit Nunaanni iluaqutaalluartut ilagaat.

– Periuseq taanna tassaavoq ilaqutariit meeqqallu attaveqaataalu atorlugit ingerlanneqartartoq. Ataatsimoorluni meeqqap qanoq tapersersorneqarnissaa pillugu pilersaarusiortoqartarluni. Aamma pingaaruteqarpoq oqaatigissallugu meeraq inuusuttuararluunniit aqqutissioqatigiinnermi peqataatinneqartarnera taamaalillunilu qanoq pisoqassaneranut tunngatillugu oqaaseqarsinnaasarluni. Taamaalilluni isumaginnittoqarfik oqartussaasullu allat ungasissumiittut ilaqutariit sinnerlugit aalajangiisanngillat, kommunili, najukkami pisinnaasat, attaveqaatit ilaqutariillu aalajangiisarlutik.

Isumaginninnermik Aqutsisoqarfiup ilaqutariinnik aqqutissiuussisarnermut pikkorissartitsineq suliassaraa, taamaalilluni ilaqutariit aqqutissiorneqarnissaannik najukkami sulisoqarsinnaalissalluni.

- Anguniagaavorlu meeqqap angerlarsimaffiup avataanut inissinneqarnissaraluata pinaveersaartinnissaa. Meeqqat angerlarsimaffiup avataanut inissinneqarnissaa ilaatigut pisariaqarluinnarsinnaavoq, ilaannulli meeqqamut ilaqutariinnulluunniit pitsaanerpaajuneq ajorluni. Aaqqiissutit digitaliusut

Sumiiffippassuarni sulisussaaleqineq unammilligassaavoq. Kommunini peqqinnissaqarfinnilu. Aamma sulisut taarseraannerujussuat suliniutit piviusunngortinnissaannut ajornakusoortitsisinnaapput.

Taamaattumik Isumaginninnermut Aqutsisoqarfik digitalimik aaqqiissutissanik ineriartortitsivoq, taamaalilluni ilisimasat sakkussallu kommuninut allanullu sakkussat katsorsaariaatsillu assigiinngitsut Isumaginninnermut Aqutsisoqarfiup neqeroorutai aaneqariaannanngorlugit.

– Isumaginninnermut Aqutsisoqarfik politikkikkut aqunneqarpoq. Politikkikkut aalajangerneqartut malillugit sulisarpugut. Tamatuma saniatigut kommunit sulinerat isumaginninnermilu ilisimasat ataqatigiissartussaallugit. Sulisut kommunit pisariaqartitaannik piviusunillu paasinninnissaat pingaaruteqarpoq. Tassa allaffissornikkut suliassaqarfiit ingerlakkivut taaneqarneqarsinnaavoq, kisianni aamma naleqqussarsinnaasariaqarluta, Tina Evaldsen oqarpoq