-Kalaallit Nunaata oqartussaaqataanera pingaaruteqarpoq, ingammik ukioq manna. Taamaammat politikerit kalaallit sapinngisamik amerlanerpaat isumaat paaserusullugit uagullu isumarput paasitikkusullugu naapikkumasimavagut.
Bryndís Haraldsdottírip, Nunat Avannarliit Siunnersuisoqatigiivini præsidentip, tullersortini Oddný Harðardóttir aamma siunnersuisoqatigiinni pisortaq Kristina Háfoss peqatigalugit sapaatip-akunnera kingulleq ulluni pingasuni Nuummiinnermini Naalakkersuisunut Inatsisartunullu ilaasortanik naapeqateqarnerminut tunuliaqutaasoq taama nassuiarpaa.
-Kalaallit Nunaata oqartussaaqataanera pingaaruteqarpoq, ingammik ukioq manna. Taamaammat politikerit kalaallit sapinngisamik amerlanerpaat isumaat paaserusullugit uagullu isumarput paasitikkusullugu naapikkumasimavagut.
Bryndís Haraldsdottírip, Nunat Avannarliit Siunnersuisoqatigiivini præsidentip, tullersortini Oddný Harðardóttir aamma siunnersuisoqatigiinni pisortaq Kristina Háfoss peqatigalugit sapaatip-akunnera kingulleq ulluni pingasuni Nuummiinnermini Naalakkersuisunut Inatsisartunullu ilaasortanik naapeqateqarnerminut tunuliaqutaasoq taama nassuiarpaa.
Helsingforsimi isumaqatigiissutip nutarsarnissaanut allanngortinnissaanullu suliaq, Nunat Avannarliit tunngaviusumik inatsisaattut taaneqartartoq, ukiup siulianili suleqatigiissitanit ingerlanneqartoq, oktobarip naanerani Reykjavikimi ataatsimiinnermi eqqartorneqassasoq taakku nassuiaapput.
Nunat Avannarliit Siunnersuisoqatigiivisa 2024-mi ataatsimiinnissaat Reykjavikimi oktobarip 28-aniit 31-anut ingerlanneqassaaq. Ataatsimiinneq ukiut tamaasa sapaatip-akunnerani 44-mi præsidentiusunit ingerlanneqartarpoq. Ataatsimiinneq nunani avannarlerni naalakkersuinermi suleqatigiinnermi aalajangiiffiusartut pingaarnersaraat.
Isumaqatigiissutip ullutsinnut naleqqussarnissaanut ilanngullugu nunat namminersortut Nunat Avannarliit Siunnersuisoqatigiivini qanoq inissisimallutillu ilaasortaanissaat, tassa kalaallit nunat avannarliit ataatsimiinnerinut peqataajumajunnaarnerisa tunngavia, suliamut ilaavoq, tamannalu AG-p arlaleriarluni allaaserinikuuaa.
Aporaaffiuvoq, siulittaasoqarfilli naapertorlugu Nunat Avannarliit Siunnersuisoqatigiivini ilaasortat Mariane Paviasen (IA) aamma Doris J. Jensen (S) ikiortigalugit Danmarkilu aqqutigalugu isumaqatigiissuteqarpoq.
Kalaallit Nunaat oktobarimi ataatsimiinnissamut peqataassanersoq siulittaasoqarfik aperineqarmat Bryndís Haraldsdottír ima akivoq:
- Akuersissummik ersarissumik pinngilagut. Inissisimaffiali paasisinnaavarput, Helsingforsimilu isumaqatigiissummi allannguutinunt atatilllugu aqutsisoqarfiup innersuutai utaqqigai naatsorsuutigaarput. Taamaammat isumalluarniarsaralutalu oktobarimi Reykjavikimi takunissaa neriuutigaarput.
Kalaallit Nunaata ataatsimiinnermut peqataanissaanut tunngavissat pingaarutillit ilaat tassaavoq ukioq manna ataatsimiinnissami sammisaq tassaassammat ”Issittumi eqqissineq isumannaatsuunerlu.”
- Nunat arfineq-pingasut tamarmik naapillutik Issittumi eqqissineq isumannaatsuunerlu eqqartussagaat neriuutigaarput, Oddný Harðardóttir naqissusiivoq.
Helsingforsimi isumaqatigiissut 1990-ikkut qiteqquttulli kingullermik allanngortinneqarami nunanut allanut, illersornermut innuttaasut sillimaniarnerannulluunniit tunngasunik allassimasoqanngilaq. Kisiannili nunarsuaq – Nunallu Avannarliit inissisimanerat – allanngornikuuvoq.
Minnerunngitsumik Sverigep Finlandillu NATO-mut ilanngunnerat Ukrainemilu sorsunneq.
- Ataatsimiinnissaq pingaaruteqarpoq, tassanilu oqaluttuarisaanermut pingaarutilinnik aalajangiisoqartussaavoq. Helsingforsimi isumaqatigiissut pillugu eqqartuinermi Kalaallit Nunaat pisariaqartipparput, Kristina Háfoss oqarpoq.
Oqalugiaat uisitsisoq
Naalakkersuisuni siulittaasup nunani avannarlerni suleqatigiinnerup ”naleqquttuunnginneranik” siorna oqaaseqarnera Nunat Avannarliit Siunnersuisoqatigiivini ilaasortanit tupaallaatigineqarpoq.
- Mútep (B. Egede, aaqq.) ukiup ataatsip matuma siorna oqalugiaataa Nunat Avannarliit Siunnersuisoqatigiivini ilaasortanut uisitsivoq, Oddný Harðardóttir oqarpoq.
Múte B. Egede Nunat Avannarliit Siunnersuisoqatigiivisa ukiumoortumik ataatsimiinneranni, siorna Olsomi ingerlanneqartumi, oqalugiarnermini taamak oqarpoq. Oqalugiarnermi tassanittaaq Kalaallit Nunaat ikinngutigiinnermi pimoorunneqarnianngippat aamma peqataatinneqarnissaat tusaaneqarnissaallu qulakkeernianngippassuk, peqataanertik nalilersoqqittariaqarlugu Naalakkersuisut siulittaasuat ataatsimeeqataasunut mianersoqqusivoq.
Tamannalu ukioq manna piviusunngorpoq, tassani Kalaallit Nunaat nunat avannarliit naalakkersuisuisa siulittaasui Stockholmimi aasaq manna ataatsimiimmata ilaatinneqanngereerlutik Nordisk Ministerrådimi ataatsimiinnernut ilaanngikkallarniarlutik aalajangerput.
Sverigep Nordisk Ministerrådimi siulittaasuutitaqarnermini nunat namminersortut ataatsimiinnermut nunanut allanut, isumannaallisaanermut illersornermullu tunngasumut qaaqquniarnagit aalajangerpaa. Aalajangiinermi Nunat Avannarliit Siunnersuisoqatigiivini siulittaasoqarfimmut attuumassuteqanngilaq, præsidenti tullersortaalu naqissusiipput.
- Sverigep aalajangerpaa. Naluara sooq. Islandip nunat arfineq-pingasut tamaasa qaaqqujuaannarnikuuai, Bryndís Haraldsdottír oqarpoq.
