KL

DK

ISUMAGINNINNERMUT MINISTERI

Isumasioqatigiinneq paasisaqarfigilluarpara

Meeqqanik angerlarsimaffiup avataanut inissiisarneq pillugu meeqqanik eqqarsaatigalugit isornartorsiuinerlu naapertorlugu ataavartumik aaqqiissutissarsineq Danmarkimi isumaginninnermut ministerip Sophie Hæstorp Andersenip nuannaarutigaa. Suliat meeqqanut tunngasut 460-it suliareqqinneqarsinnaanngussapput.

Isumaginninnermut ineqarnermullu ministeri Sophie Hæstorp Andersen kalaallit meerartaasa Danmarkimi angerlarsimaffiup avataanut inissinneqartarnerat pillugu isumasioqatigiinnissamut sapaatip-akunnerani kingullermi qaaqquneqarpoq. Iliuuseqarsinnaanani isumasioqatigiinnermi oqarpoq. Maannali sapaatip-akunnera qaangiuttoq misissueriaatsit atorunnaarsippai suliallu misissuutit atorlugit naliliiffigineqareersut suliareqqinneqarnissaannik suliamik aallartitsilluni.
Trine Juncher Jørgensen
TUSAGASSIORTOQ / JOURNALISTI
Saqqummersinneqarpoq

Angajoqqaat piginnaaneri pillugit misissuinermi kalaallit angajoqqaat tarnip pissusaanik misissorneqartarnerat unitsinneqassasoq Danmarkimi isumaginninnermut ineqarnermullu ministeriaqarfik tallimanngormat ualikkut nalunaarpoq. Taarsiullugu immikkoortoq immikkut ilisimasalik kalaallit oqaasiinik kulturiannik paasisimasaqarluartoq kommunit meeqqanut tunngasunik suliaani taamaattuni ikiortalissavai. Immikkoortortaqarfiup nutaap tarnip pissusaanik misissuutit atorlugit aalajangerneqareersut misissussavai suliallu nalilersuiffigineqaqqinnissaat piumasarissallugu.

Aaqqiissutissaq ataavartoq

Angajoqqaat kalaallit, Danmarkimi angajoqqaat piginnaaneri pillugit misissuinermut atatillugu tarnip pissusiinik misissuutit tunngavigalugit meeqqaminnik pinngitsaaliissummik arsaarneqartut, ikiorniarlugit iliuuseqarsinnaanngilasi qanittukkut isumasioqatigiinnermi oqarputit. Sunaana pissutaalluni misissuutit atorunnaarsillugillu suliat naammassineqareersut misissorteqqinniarisi?

– Isumasioqatigiinneq soorunami aamma paasisaqarfigilluarpara, oqaatigissavarali ministerinngoramali aaqqiissutissamik nassaarnissarput pingaartissimallugu. Tarnip pissusianik misissuutit assigiinngitsut atorunnaarsinneqarnissaat pillugu kommuninut allagaqarnikuuvunga, aamma VISO-mi immikkut immikkoortortamik kommunit immikkut ilisimasalinnik paasiniaafigisinnaasaat pilersinnissaanut aningaasanik nassaarsimavunga. Isornartorsiuineq suli ingerlanneqarpoq, aamma Nuummi Københavnimilu akerliussutsimik takutitsinerit maluginiarpakka, naalakkersuisullu siulittaasuata suliaq akuliuffigimmagu. Taamaattumik suli iliuuseqarnerusinnaanersugut paasiniarsimavara. Nuannaarutigeqaaralu maanna ataavartumik aaqqiissutissamik nassaarsimagatta, meeqqat isumagineqarnissaat qulakkeerlugu kisianni aamma isornartorsiuineq naapertorlugu. Aaqqiissut taanna Naalakkersuisut oqaloqatigiuarnerisigut anguneqarpoq. Tamanna nuannaarutigeqaara, isumaginninnermut ineqarnermullu ministeri Sophie Hæstorp Andersen Sermitsiamut oqarpoq.

Suliat suliarineqaqqinnissaat

Suliat suliarineqaqqinnissaannik nalunaaruteqarnersi qanoq paasineqassava? Assersuutigalugu Keira Alexander Kronvoldimut Thistedimeersumut tamanna atuuppa?

– Meeqqat 460-it angerlarsimaffiup avataanut maanna inissinneqarsimapput. Taakkunannga 90-it angajoqqaavi akuersitinnagit inissinneqarsimapput. Suliani 460-ini tarnip pissusaanik misissuutit atorlugit aalajangiisoqarsimappat immikkoortortaqarfiup taakku misissuiffigissavai. Taamaattoqarpat immikkoortortaqarfiup kommunip suliamut paasissutissaatai nalilersortariaqarpai. Misissuutillu suliamut sunniuteqarsimappata kommunip suliaq suliareqqissavaat, Sophie Hæstorp Andersen oqarpoq.

Ministeri naapertorlugu inatsisissatut siunnersuut angajoqqaat piginnaanerinut misissuinermi tarnip pissusaanut misissuutit atorneqarsimasunut meeqqamullu naliliinermi aamma atorneqarsimasunut tunngassuteqarpoq.

Meeqqanut angerlarsimaffiup avataanut inissinneqarsimasunut angajoqqaat taakkualu eqqartuussissuserisui maanna qanoq iliussappat?

– VISIO-p ataani immikkoortortamik immikkut ittumik pilersitsinialerpugut, inatsisissatulli siunnersuut februaarip aallartinnerani saqqummiunneqareerpat kommunit periutsimik allanngortiterillutik aallartissinnaapput, Sophie Hæstorp Andersen oqarpoq.

Inatsisissatut siunnersuut Folketingimi suliarineqarnerata nalaani tusarniaassutigineqassaaq, tamannalu piaarnerpaamik pissasoq naatsorsuutigineqarpoq. Kingusinnerpaamik maajip aallaqqaataani 2025-mi atuutilernissaa siunertarineqarpoq.

social- og boligministeriet sophie hæstorp andersen grønlandske forældre inuiaqatigiit naalakkersuisut psykologiske tests samfund

ATORFIIT Se alle jobs

Powered by Labrador CMS