Ittoqqortoormiini nanoq alla pisarineqarpoq
Ittoqqortoormiini sisamanngormat ullaakkut nanoq alla pisarineqarpoq. Tamanna Kalaallit Nunaanni Politiinit uppernarsarneqarpoq, tamatumuunalu aamma imminut illersornissamut malittarisassat malinneqarsimasut taakku ilisimatitsipput.
Nunami sumiiffinni arlalinni nannunik takunnittoqarsimavoq, Ittoqqortoormiinilu imminut illersorniarluni nannut marluk aallaaneqarput.
Aalborg Zoo
Nanoq alla Ittoqqortoormiini sisamanngormat ullaakkut takuneqarpoq – imminullu illersorniarluni aallaaneqarluni. Tamanna Kalaallit Nunaanni Politiini pigaartut pisortaata Jørgen Madsenip Sermitsiamut uppernarsarpaa.
- Ittoqqortoormiini nanoq takuneqarpoq, illoqarfimmiippoq aqqusinernilu angalaarluni. Nanoq takuneqaqqammerluni aallaaneqarpoq. Sisamanngormat ullaakkut nalunaaqutaq 06.40 politiit nalunaarfigineqarput.
- Politiit sumiiffimmiipput pissutsillu misissorlugit, sumillu misissugassamik nassaartoqanngilaq, Jørgen Madsen Sermitsiamut oqarpoq.
Tassa imaappoq nannumik siumuinermut atatillugu imminut illersornissamut malittarisassat malinneqarnersut politiit misissorsimavaat. Piffissami kingullermi Ittoqqortoormiit eqqaanni nannut arlallit takuneqarsimapput.
Sapaatip-akunnerani matumani aappassaanik nannumik aallaasisoqartoq
Sapaatip-akunnerani matumani Ittoqqortoormiini aappassaanik imminut illersorniarluni nannumik aallaasisoqarpoq. Marlunngormat unnukkut nalunaaqutaq 19.30 missaani imminut illersorniarluni nannup aallaaneqarsimaneranik politiit nalunaarfigineqarput.
Qimmit nerisassaannut nanoq qanilliartorsimasoq tamatumalu kingorna arsaattarfiup, meeqqat pinnguarfiata tungaanut, ingerlasoq politiit oqaluttuarput.
Imminut illersorniarluni nanoq kingulleq aallaaneqartoq pillugu Piniarnermut Aalisarnermullu Naalakkersuisoqarfik Kalaallit Nunaanni Politiivisa ilisimatissimavaat, soorluttaaq nannup siulliup aallaaneqarnera pillugu Naalakkersuisoqarfik ilisimatinneqarsimasoq.
