Jacob Nitter Air Greenlandilu Tuluit Nunaannut Tysklandimullu timmisartuussisalerusuttut
Air Greenlandip pisortaanerata Jacob Nitter Sørensenip timmisartut siunissamilu timmisartuussinerit pillugit takorluukkani silaannakkut angallanneq pillugu atuagassiami nunani tamalaani saqqummersartumi oqaluttuarai.
Europamut aqqutit amerlanerusut siunissami piulissasut Air Greenlandip pisortaanerata neriuutigaa.
Assiliisoq: Morten Okkels
Air Greenland Londonimut, Berlinimut Frankfurtimulluunniit toqqaannartumik ullut ilaanni timmisartuussisalissanerluni?
Atuagassiami Aviation Weekimi Air Greenlandip pisortaanerata Jacob Nitter Sørensenip apersorneqarnera allaaserineqarpoq, tassanilu Air Greenlandip killiffia siunissamullu pilersaarutai oqaluttuaralugit.
Siunissaq ungasinnerusoq eqqarsaatigalugu Europamut aqqutit amerlanerusut takorloorsinnaallugit Jacob Nitter Sørensen apersorneqarnermini ilaatigut oqarpoq. Pissutsit periarfissiippata Londonimut Tysklandimulluunniit aqquteqalernissaa takorloorsinnaavara, oqarpoq.
Jacob Nitter Sørensenip aamma Airbus A320neo, Air Greenlandip Ilulissani mittarfittaarnermut atatillugu pisiarisaa, eqqartorpaa.
Aamma Dash-8-p sooq nunap iluani timmisartuussisarnini sivisuumik ingerlatiinnassaneraa eqqaallugu.
Apersuineq tamarmi tuluttut ingerlavoq, Aviation Weekip nittartagaani akeqanngitsumik atuarneqarsinnaavoq tusarnaarneqarsinnaalluniluunniit.
