1,6 milliarder koruunit aningaasarpassuartut nipeqarsinnaapput, kisianni aningaasat Ittoqqortoormiini mittarfissap aammalu Qaqortumi immami itisuumi umiarsualivissap aallartisarneqarnerannut naammapput.
Suliniutit taakku marluk aningaasarpassuarnillu nalillit suliniutigineqarnerisa aallartinneqarnissaasa saniatigut, peqqinnissaqarfimmut aningaasatigut oqilisaassisoqassaaq, nunatsinniimmi Danmarkimi napparsimavinnut suliaritikkiartortartunut aningaasartuutissat naalagaaffimmit akilerneqartalissapput.
1,6 milliarder koruunit aningaasarpassuartut nipeqarsinnaapput, kisianni aningaasat Ittoqqortoormiini mittarfissap aammalu Qaqortumi immami itisuumi umiarsualivissap aallartisarneqarnerannut naammapput.
Suliniutit taakku marluk aningaasarpassuarnillu nalillit suliniutigineqarnerisa aallartinneqarnissaasa saniatigut, peqqinnissaqarfimmut aningaasatigut oqilisaassisoqassaaq, nunatsinniimmi Danmarkimi napparsimavinnut suliaritikkiartortartunut aningaasartuutissat naalagaaffimmit akilerneqartalissapput.
Tasiilamiit pakatsilluni naammagittaalliorneq
Naalakkersuisut naalagaaffiullu isumaqatigiissutiminni suliniutinut tigussaasunut siunnerfeqarnerat, tassa Ittoqqortoormiini Qaqortumilu suliniutinik pingaarnersiuisimanerat pillugu, Tasiilami innuttaasut, pingaartumik inuit attaveqaqatigiittarfii aqqutigalugit, akerliullutik annertuumik naammagittaalliorput.
- Uagununa Tasiilami/Angmagssalimmi mittarfittaartariaqarpugut!!!! ilaatigut taamak qisuariartoqarpoq Naalakkersuisut siulittaasuata, Jens-Frederik Nielsenip, Facebookimi politikerisut nittartagaani, isumaqatigiissutip nutaap avammut tusarliussineranut atatillugu qisuariartoqarpoq.
Jens-Frederik Nielsenilli Tasiilami innuttaasut eqqissisaappai:
- Naalakkersuisooqatigiinnissamut isumaqatigiissutitsinni allassimavoq qinigaaffimmi matumani Tasiilami mittarfiliortoqassasoq allassimavoq, Naalakkersuisuniillu anguniarparput sulissutigalugulu piviusunngortinneqarnissaa.
Isumaqatigiissut nutaaq taanna tunngavigalugu taava tamanna isumaqarpa aningaasassaqarnerulersoq nunarput Tasiilami mittarfissap piviusunngortinnissaa sukkanerusumik pisinnaanngortoq, maanna Naalagaaffiup Ittoqqortoormiini mittarfissaq akilertussanngormagu?
- Tamanna naatsorsuutigineqarsinnaavoq, maanna periarfissaqarnerulerluta inissisimavugut, tassami marlunnik mittarfiliortornissamut aningaasanik nukinnillu atuisussaajunnaarpugut, taamaalillutalu Tasiilami mittarfimmik pilersitsinissamut nukissaqarnerulerluta. Taamaattorli erseqqissaatigissavara misissueqqaarnerit suli ingerlammata, kisianni qularutissaanngilaq Tasiilami mittarfissap piviusunngortinnissaanut alloriarumaartugut.
Immami itisuumi umiarsualivik suminngaaniit puttuppa?
Qaqortumiit sivisuumik kissaatigineqarnikuuvoq naleqquttumik pisariaqartitsinermullu naapertuuttumik umiarsualiveqalernissaq, umiarsuimmi takornariartaatit amerlasuut Qaqortumut tikittarmata.
Kisianni immami itisuumi umiarsualivik nunatsinni inatsisartunit oqaluuserineqarsimanngilaq. Sooq isumaqatigiissummi nutaatut suliniutitut ilanngunneqarpa?
- Nalunngilarput Qaqortoq annertuumik ajornartorsiuteqartoq umiarsualivik mikivallaalersimammat. Takornariaqarneq, pingaartumik matumani umiarsuit takornariartaatit eqqarsaatigalugit umiarsualivimmik pitsaasumik peqarnissaq pingaaruteqarpoq, maanna periarfissaqarlualerpugut umiarsualivimmik pitsaasumik naleqquttumillu piviusunngortitsinissamut.
Dual-Use Ittoqqortoormiini Qaqortumilu
Qanoq annertutigisumik illersornissamut ministeriaqarfik aalajangeeqataava Ittoqqortoormiini Qaqortumilu suliniutit annertuut aallartinneqarnissaanik aalajangiinissinni?
- Isumaqatigiissut manna atsiorneqaqqammertoq statsministerip naalakkersuisullu akornanni isumaqatigiissutaavoq. Kisianni aamma naatsorsuutigineqassaaq illersornissaqarfik suliniutinut taakkununnga annertuumik peqataassammat.
- Assersuutigalugu maanna ittoqqortoormiini mittarfimmik pilersitsinissamik isumaqatigiissuteqarpugut. Aamma nalunngilarput Kangiata Avannaarsuani nunap immikkoortuani illersornissamut killeqarfimmillu alapernaarsuinermut annertusaanissamut pisariaqartitsisoqartoq, taamaattumik Dual-Use, tassa imaappoq innuttaasunut sakkutuunullu atorneqartussamik ittoqqortoormiini mittarfimmik pilersitsisoqassaaq.
- Tamanna aamma Qaqortumi umiarsualiviittaassamut aamma atuutissava?
- Aap! Tamanna Qaqortumi umiarsualivimmut aamma atuutissaaq. Eqqaamassavarput nunarsuarmi pissutsit allanngornikuupput, tamannalu illersornissaqarfiup nunatsinniinnerulertariaqarneranik nukittorsaanissamillu pisariaqartitsiffiuvoq. Kisianni Naalakkersuisut pingaartilluinnarpaat suliniutit tamatigut kalaallit innuttaasunut iluaqutaasssasut, tamannalu qulakkeerparput, Naalakkersuisut siulittaasuat Jens-Frederik Nielsen (D) Sermitsiamut erseqqissaavoq.
