KOALITIONSDANNELSE 2025
Jens-Frederik: Kalaallit Nunaat uagut nunagaarput tamannalu ataqqineqartariaqarpoq
Demokraatits siulittaasuat, Jens-Frederik Nielsen avataaniit inuiaqatigiit kalaallit tatineqarnerat pillugu erseqqilluinnartumik oqariartuuteqarpoq: - Maanna naalakkersuisooqatigiinnik taamak siammasitsigisunik pilersitsinitsigut ersarissumik naqissuserparput nunarsuarmioqatitta kikkulluunniit nalornissutigissanngikkaat Kalaallit Nunaat ataatsimoortoq, Inatsisartut inissititerlutik ataatsimeereerpata Naalakkersuisunut siulittaasunngortussaq oqarpoq.
Partiit siulittaasui sisamat, tassa Jens-Frederik Nielsen (D), Múte Bourup Egede (IA), Vivian Motzfeldt (S) aamma Aqqalu C. Jerimiassen (A) atsioqatigiinneq sioqqutitsiarlugu, tallimanngornermi ullaap tungaani Katuami pisumi,.
Assiliisoq: Jensine Berthelsen
Naalakkersuisooqatigiilertussat aalajangiusimavaat partiit akornanni USA-mut tunngatillugu ataatsimoorussinertik attatiinnarneqassasoq. Taakku ataatsimoorlutik naqissuserpaat Kalaallit Nunaat tuniniagaanngitsoq aammalu Kalaallit Nunaat USA-mut ilanngunnissamut kissaateqanngitsoq.
- Kalaallit nunanaminni inuupput tamannalu ataqqineqartariaqarpoq, pingaartumik ikinngutit aamma iligiit akornanni. Taamaattumik pisariaqarpoq, aallartikkutta piaarnerpaamik, ikinngutivut aamma iligut, pingaartumik USA, oqaloqatigineqarnissaat.
- Kalaallit Nunaata nunanik allanik suleqateqarnera ingerlaannassasoq kissaatigaarput, kisianni tamanna uagutsinnik aallaaveqassaaq, aammalu tamanna naalakkersuisooqatigiilersussani pingaartilluinnarparput.
Danmarkimut isumaqatigiinniarnerit aallartinneqassapput
Naalakkersuisooqatigiinnissamik isumaqatigiissummi naqissuserneqarpoq, naalakkersuisooqatigiit piaartumik Danmarkimut isumaqatigiinniuteqarlutik aallartissasut:
- Inatsisartuni inissitsiterluni ataatsimiinnerup kingorna siunissami suleqatigiinnissamut sinaakkutinik
nutartikkanik muteerninillu pilersitsinissaq siunertaralugu, qallunaat naalagaaffiannik Naalakkersuisut
isumaqatiginninniarlutik aallartissapput. Pissutsit taamaaginnartinneqarnerat periarfissaanngilaq.
Siunissaq qanoq ittoq ornipparput?
- Suleqatigiinneq naligiiffiunerusoq, Kalaallit Nunaanni inuiaqatigiinnut iluaqutaanerusoq, aammalu qulakkeerneqassaaq Kalaallit Nunaat Danmarkip pissusaanut kalitaaginnassanngitsoq, kisianni naligiinnerup aqqani, Kalaallit Nunaata imminut pineqartilluni siuttuunissaanik inissaqartitsisoq.
Naalakkersuisut siulittaasussaata, Jens-Frederik Nielsenip, ilanngullugu erseqqissaatigaa, piumasaqaatip taassuma anguniarnissaanut atatillugu unammilligassat ilisimaarigitsik, taamaattorli partiit maanna suleqatigiilersut tamarmik suliassamut piareersimasut.
Naalakkersuisooqatigiit ukiuni tulliuttuni sisamani patajaatsumik aqutsissapput
Jens-Frederik Nielsen aperigatsinni naalakkersuisooqatigiilersut patajaassusissaat nalilersorsimaneraa, akivoq:
- Naalakkersuisooqatigiinnissamik isumaqatigiinniarnerit sukumiisorujussuarmik ingerlannikuuagut, qularinngilaralu isumaqatigiissuterput ukiuni sisamani attanneqarsinnaassuseqartoq, tamannalu upperilluinnarpara. Suleqatigiinnerput tatigeqatigiinnermik ataqqeqatigiinnermillu tunngaveqassasoq isumaqatigiissutigaarput.
- Unammilligassat angisuut siunitsinniittut ilisimaarilluinnarpavut, ataatsimoorlutalu unammilligassanut tamakkununnga ataatsimooqatigiittussaavugut, tamannalu pingaaruteqarluinnartuuvoq, piffissamimi matumani siunissatsinnilu aggertumi ataatsimooqatigiinnissarput aatsaat taamak pisariaqartigivoq, Naalakkersuisut siulittaasussaat, Jens-Frederik Nielsen, Sermitsiarmut erseqqissaavoq.
Innuttaasunik oqaloqateqarnerulernissaq neriorsuutigineqarpoq
Inuit qarasaasiatigut attaveqaqatigiittarfianni, maluginiagassaavoq, nunatsinni innuttaasoqartoq, Donald Trumpimut amerikamiullu Kalaallit Nunaat tigusinnaagaat oqariartortunik.
Tamannalu partiit ataatsimoorlutik nunap innuttaasullu illersorneqarnissaat pillugu isumaqatigiinnerannut naapertuutinngilaq. Taamaattumik Naalakkersuisunut siulittaasunngortussaq aperaarput, qanoq ilillutik ataatsimoornissamik qulakkeerinninniarnersut, aamma nunami innuttaasut ataatsimoornermut peqataanissaat qanoq qulakkeersimaniarneraat:
- Pingaaruteqartorujussuuvoq innuttaasut sulinitsinni peqataatinneqarnissaat. Nalunngilarput piffissami kingullermi tamanna ajornakusoorsimasoq, tassami naalakkersuisooqatigiinnik pilersitsisoqarnissaa pillugu isumaqatigiinniarnerit ingerlanneqarput, aammalu Naalakkersuisuugallartut ingerlatsinerisa nalaanni, kisianni taamaakkaluartoq ataatsimoornerput pillugu oqariartuuteqartuarpugut, aamma nunarput ineriartorsinnaanngilaq innuttaasut naammaginartumik peqataanngippata.
- Taamaattumik suliassaavoq pingaaruteqartorujussuaq, tassa innuttaasut peqataatinneqarnissaat, tamannalu pingaarnersiuinitsinni salliutitassatsinnut ilaalluinnarpoq, tassa nunatsinni innuttaasut sumiikkaluartulluunniit akuutinneqarnissaat, suliarlu inissititerneq naammasseriarpat aallartissavarput, Jens-Frederik Nielsen Sermitsiarmut oqarpoq.
