Jens-Frederik Nielsen kunngikkormiut qaaqqusisoralugit nereqatigiinnermi peqataavoq
Pingasunngornermi unnukkut Naalakkersuisut siulittaasuat Kunngi Frederik aamma Dronning Mary qaaqqusisoralugit nereqatigiinnermi peqataavoq. Naalagaaffiit nunallu 41-it naalakkersuinikkut siuttui qaaqqusanut ilaapputtaaq.
Jens-Frederik Nielsenip pingasunngornermi unnukkut kunngi Frederik aamma dronningi Mary qaaqqusisoralugit nerqatigiinnermi peqataavoq.
Assiliisoq: Mads Claus Rasmussen/Ritzau Scanpix
Pingasunngornermi Danmark EU-p ataatsimeersuarneranut aaqqissuisuuvoq, aaqqissuussarlu unnukkullu Københavnimi Amalienborgimi nereqatigiinnermik naggaserneqarpoq.
Nereqatigiinnermi aamma Naalakkersuisut siulittaasuat, Jens-Frederik Nielsen (D), peqataavoq.
Nereqatigiinneq Christian VII's Palæ-mi ingerlanneqarpoq, naalagaaffiit naalakkersuisuisa siuttui 41-it aamma qaaqqusat allattorsimaffianniipput.
Politikerit nereqatigiinnermi ilaatigut sassaalliutigineqarput saarulliit nunatsinneersut, qeqqussat Kattegatsimeersut, kiisalu savaaqqap neqai Danmarkip kitaata sineriaaneersut.
Nereqatigiinneq aallarnerlugu Kunngi Frederik naatsumik oqalugiarpoq, taassuma oqalugiarnermini erseqqissaatigaa ataatsimoorneq pingaaruteqartuusoq Europap nunavittaani eqqissinissaq anguneqarsinnaaqqullugu. Jens-Frederik Nielsen takuneqarsinnaavoq Kunngip talerpiatungaani issiasoq, tassani issiaqataasa ilaat tassaavoq Natop pisortaa Mark Rutte.
Assiliisoq: Mads Claus Rasmussen/Ritzau Scanpix
Politikerit peqataasut ilaatigut tassaapput Frankrigip præsidentia, Emmanuel Macron, Italiap ministeriunera, Giorgia Meloni, kiisalu Tuluit Nunaata ministeriunera, Keir Starmer.
Ministeriuneq Mette Frederiksen (S) natersuaq aappaluttukkorpoq EU-Kommissionip siulittaasua, Ursula von der Leyen peqatigalugu, kiisalu EU-p præsidentia, Antonio Costa, aamma qaaqqusaasut ilagaat.
EU-p præsidentia naapippaa
Jens-Frederik Nielsen aamma qaaqqusaasut ilagaat, Facebookikkullu ullumi siusinnerusukkut nalunaarutigineqarpoq, Naalakkersuisut siulittaasuat pingasunngornermi EU-p præsidentia, António Costa, naapissimagaa.
Tassunga tunngatillugu Naalakkersuisut allappput Kalaallit Nunaat EU-p aningaasatigut patajaatsumik inissisimaneranut namminiussuseqarsinnaaneranullu qulakkeerinneqataasinnaavoq.
- Ataatsimiinnerup takutippaa Kalaallit Nunaata EU-llu suleqatigiinnerat suli ineriartortoq, inuiaqatigiillu ineriartorneranut sunniuteqarluarsinnaasoq.
