Jens-Frederiup danskit aningaasaateqarfiliorniarnerat alloriarnertut pingaarutilittut taavaa
Danskit naalakkersuisuisa saammaateqatigiinnissamik aningaasaateqarfimmik pilersitsinissamik piareersimanerat ajunngitsuusoq, Naalakkersuisut siulittaasuat isumaqarpoq.
Mette Frederiksenip Jens-Frederik Nielsenillu arnat spiralilersuinermit eqqugaanikut tallimat Nuummi Hans Egedep Illuani pingasunngornermi ullaap tungaani naapereerlugit apersorneqarput.
Assi: Mads Claus Rasmussen / Ritzau Scanpix
- Nassuerutiginninneruvoq alloriarnerullunilu pingaarutilik. Arnat eqqugaasut taarsiiffigineqarnissaannik isumaqarnitsinnut naapertuuppoq, Naalakkersuisut siulittaasuat Jens-Frederik Nielsen (D) tusagassiortunik pingasunngornerup ullaap tungaani katersortitsinermi oqarpoq.
Danskit naalakkersuisuisa saammaateqatigiinnissamik aningaasaateqarfimmik pilersitsiniarlutik sapaatip-akunnerani matumani nalunaarutaat Jens-Frederik Nielsenip nuannaarutigaa. Aningaasaateqarfik arnat spiralilerneqarsimasut taarsiivigineqarsinnaanerannik ilaatigut siunertaqarpoq.
- 1992-ip kingorna akisussaaffik tamanna angerlaannikuuarput, maannalu iliuuseqartoqarnera nuannaarutigalugu, Jens-Frederik Nielsen oqarpoq.
Spiralit amerlanerpaartaat Danmarkimit akisussaaffigineqarmata Jens-Frederik Nielsenip ministeriuneq utoqqatseqatigissagaa inuit nittartakkatigut attaveqaqatigiittarfiisigut isornartorsiorneqarpoq.
Isornartorsiut Naalakkersuisut siulittaasuata isumaqatiginngilaa.
Utoqqatserneq tamanut pingaaruteqarpoq
Apeqqut: Mette Frederiksen sanileralugu pisimasunut akisussaaqataasutut inissinnerit isornartorsiorneqarpoq. Spiraliliinerit 4500-t 1992-illu kingorna 15-it amerlassusaatigut assigiinngissuteqarput. Isornartorsiuineq tamanna qanoq isumaqarfigaajuk?
- Isumaqatiginngilara. Arnat eqqugaasut pillugut akisussaaffimmik tigusisariaqartugut isumaqarpunga, aamma susassaqarfiup angerlaatereernerata kingunerani pisimasut eqqarsaatigalugit. Tamanna pissusissamisoortutut isigaara.
- Utoqqatserneq 1992-ip sioqqullugu tamatumalu kingorna eqqugaasunut tamanut pingaaruteqarpoq, tamannalu uannut pingaarnerpaavoq.
Apeqqut: Ministeriunerup saniani nikorfallutit utoqqatseqataanissat naalagaaffiup 1992 sioqqullugu iliuuserineqartunut akisussaanera assigalugu Namminersornerullutik Oqartussat aamma akisussaassuseqarnerattut paasineqassavoq?
- Susassaqarfiup angerlaatereernerata kingunerani suleriutsip tamatuma nangeqqissimanera pillugu ministeriunerup saniani ullumi utoqqatsernissara pissuteqarpoq. Takinerunngilaq, Jens-Frederik Nielsen oqarpoq.
