KL

DK

Johan Danielsen Nukissiorfinni nukissiornermut pisortassatut toqqarneqarpoq

Naalakkersuisut aalajangerput, Johan Danielsen 1. januaari 2025 aallarnerfigalugu Nukissiorfinni nukissiornermut pisortatut (CEO) atorfinitsinneqassasoq. Johan Danielsen Nukissiorfinni nukissiornermut pisortaagallartutut atorfeqarsimavoq.

Naalakkersuisut isumaqarput Nukissiorfiit nutaamik energidirektørissaanik toqqaanerat piginnaasaqarluartumik suliallu iluani pikkorissumik Nukissiorfiit naligiissumik ineriartortissinnaasaanik. Johan Danielsen Uummannami peroriartorpoq Ilisimatusarfimmilu bach.scient.adm.-itut ilinniarsimasuulluni.
Jensine Berthelsen
tusagassiortoq
Saqqummersinneqarpoq

Nukissiorfiit ukiuni arlalinni aningaasaqarnikkut ilungersunartumik inissisimasimavoq. Aningaasaqarnikkut ilungersunartorsiornerit taakku Nukissiorfiit naapertorlugu ilaatigut politikkikkut piumasaqaatinik pissuteqarput, taakkulu suliffeqarfimmit naammassineqarsinnaanngillat, ilaatigut assigiimmik akeqartussaatitaanermut tunngasut.

Tassunga ilanngullugu ilisimaneqarpoq pilersuinermik ingerlatsivik taanna iluarsartuussinermut aserfallatsaaliuinermullu  annertuumik kinguaattooruteqartoq. Kiisalu ilisimaneqarpoq pisortat qullersaat allanngorartunngorsimasut. Kisianni Johan Danielsenimik atorfinitsitsinermikkut Naalakkersuisut naatsorsuutigaat suliffeqarfiup aalaakkaasumik ingerlatsilissasoq.

Cicilie Senderovitz (1. maj 2022-miit 30. september 2024-ip tungaanut pisortaasoq) Nukissiorfinni nukissiornermut pisortatut tunuarmalli, Nukissiorfinni nukissiornermut pisortassaanik toqqaanissaq siunertaralugu atorfimmut inuttassarsiuinerup peqqissaartumik ingerlanneqarnera aallartinneqarpoq, Naalakkersuisut tusagassiuutitigut nalunaarumminni erseqqissaatigaat.

Taamaalillutik Naalakkersuisut ataatsimiititaliap naliliisussap inassuteqaataa tunngavigalugu aalajangerput, Johan Danielsen Nukissiorfinni nukissiornermut pisortaattut 1. januar 2025-miit atorfinitsinneqassasoq.

Nukissiorfinni ingerlaavartumik ingerlatsinissamik naatsorsuutiginninneq

Johan Danielsen aningaasaqarnermik aqutsinermi siuttuunermilu nukittuunik piginnaaneqarfeqarpoq, kiisalu Kalaallit Nunaanni pilersuinermik suliassaqarfimmi annertuunik misilittagaqarluni, Naalakkersuisut ilisarititsipput nangillutillu;

Misilittakkat piginnaaneqarfiillu taakku ilaatigut Tusass-imi naatsorsuuserinermut pisortatut, Air Greenlandimi financial controlleritut kingullermillu Nukissiorfinni pisortaagallartutut atorfeqarnermini inerisarsimavai. Johan Danielsenip Nukissiorfinni nukissiornermut pisortaagallartutut atorfeqarnermini Nukissiorfiit periusissiaata nutaap ilusilersorneqarnerani pingaarutilittut inissisimasimavoq.

- Naalakkersuisut Johan Danielsenip atorfinitsinneqarnera nuannaarutigaat. Naatsorsuutigaara Johan iliuuseqallaqqissutsini pimoorussininilu, kiisalu ataqqinnilluni aqutseriaaseqarnini atorlugit Kalaallit Nunaat tamakkerlugu pilersuinermik isumannaatsumik pilersitsiumaartoq. 

- Johanip atorfinitsinneqarneranut peqatigitillugu qularinngilara, nukissiornermut pisortamik, Kalaallit Nuaanni pilersuinermik suliassaqarfiup ineriartortinneqarnerani suliat ingerlaavarnissaannik qulakkeerisinnaasumik, aammalu Nukissiorfinni oqimaaqatigiinnermik pilersitsisinnaasumik atorfinitsitsilluta. Johanip suleqatigilluarneqarnerata ingerlaqqinnissaanut qilanaarpunga, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

energidirektør samfund kalistat lund naalakkersuisut nukissiorfiit inuiaqatigiit johan danielsen

ATORFIIT Se alle jobs

Powered by Labrador CMS