Jørgen Boassen: Amerikamiut milliardærit Kalaallit Nunaanni aningaasaleerusupput
Jørgen Boassen, Trumpimik tapersersuisutut ilisimaneqartoq,Kujataanukalerpoq Tom Dans, Trumpip US Arctic Research Commissionimut pisortanngorteqqammigaa peqatigalugu. - Amerikamiut aningaasaatilissuit amerlasuut Kalaallit Nunaanni suliffeqarfinnut aningaasaliinissaminnut soqutiginnipput, aammalu kalaallit suliffeqarfiisa aningaasaliinissaat soqutigisorujussuuaat, Jørgen Boassen Sermitsiamut oqaluttuarpoq.
Jørgen Boassen, USA-mi tusaamasanngorsimasoq, Trump-ip illersortaanut attaveqaateqarnermi saniatigut, aamma amerikamiunik aningaasaatilissuarnik, kalaallit suliffeqarfiutaannik aningaasaliinissaminnut soqutiginnittunik, attaveqaateqarpoq. Maanna taanna Tom Dansimik peqateqarluni Kujataanukartussanngorpoq.
Assiliisoq: Arnaq Nielsen
Nunatta naalakkersuinikkut siuttuisa, Naalakkersuisut aamma danskit naalakkersuisuisa suli USA-mit "Kalaallit Nunaata pisiarineqarnissaanut" neqeroorummik takusaqarsimanngikkaluartut, maanna ersarissivoq nunatsinnut amerikamiut sorsuutiginninnerat timitalersorneqarluni aallartittoq.
Jørgen Boassen naapertorlugu, kalaallit suliffeqarfiutaat amerlasuut saaffiginnittartut imaaginnavipput, qanoq ilillutik amerikamiut aningaasaliisartut attavigisinnaaneraat paasiniarlugu:
- Kalaallit suliffeqarfiutaat nunatsinni sumi tamaneersut uannut saaffiginneqattaaginnavipput, taakkulu paasiniartarpaat qanoq ilillutik amerikamiut aningaasaliisartut attavigisinnaanerlugit, aningaasatigut taperserneqarnissartik kissaatigalugu. Tamanna attaveqarfigisannut saqqummiuppara, malitsigisaanillu suliffeqarfiit amerlasuut, Kujataaniittut siulliullugit oqaloqatigiartulerpagut periarfissanik saqqummiussiffigalugit pisariaqartitaannillu paasiniaaffigalugit, Jørgen Boassen oqaluttuarpoq.
Jørgen Boassen Kujataanut aallassaaq Trumpip issittumi soqutigisanik ingerlatsisua, Tom Dans, ilagalugu.
Aammattaaq pisortat suliffeqarfiutaat pulaarneqassapput
Suliffeqarfiit namminersortut kisimik pulaarneqassanngillat, amerikamiut aningaasaatilissuit sinnerlugit angalasut Kujataaniinneranni. Aamma pisortat suliffeqarfiutaat, assersuutigalugu Neqi A/S aamma Great Greenland A/S Boassenimit Dansimillu pulaarneqassapput.
- Pisortat suliffeqarfiutaannut pulaarnissatsinnut atatillugu, siulersuisut oqaloqatigerusussimagaluarpagut, kisianni taakkunanit akuersaanngitsumik pineqarpugut. Assersuutigalugu amerikamiut puisit amiinik tunisassianik soqutiginnittorujussuupput, tamatumunngalu atatillugu misiliutinik USA-mut nassarusukkaluarpagut, tamannali itigartinneqarpoq politikkikkut inissisimanerup suli nalunartumiinnera pissutaatinneqarluni.
Taamaattorli kujataani suliffeqarfiit kisimik amerikamiut aningaasaliisartuinik soqutiginnissimarpasinngillat:
- Siullermik Kujataani suliffeqarfiit arlallit ornillugit oqaloqatigissavagut, kisianni Kalaallit Nunaanni sumi tamani suliffeqarfiit namminersortut soqutiginnittut amerlaqaat, Avannaaniit kujataata tungaanut kiisalu kangiani, amerikamiut aningaasaliisartuinik oqaloqateqarusuttut imaaginnavipput, amerikamiullu suliffeqarfinnut aningaasaliinissaminnut soqutiginninnerat annertuvoq, Jørgen Boassen oqarpoq.
