Kajumissutsimik ikiuuttartut qulimiguulimmik angallanneqartut

Qamuteralattartut Nuummi peqatigiiffiata Qamutit upalungaarsimanermi kajumissutsimik ikiuuttartuineersut immikkut illuinnartumik sapaatip akunnerata siuliani misigisaqarput – tamatumalu ilutigisaanik Illersornissaqarfimmeersut qanoq suleqatigiinnissamik sungiusaqatigaat, ujaasisoqartillugumi assigisaanilluunniit pinartoqartillugu ikiuuttarnerannut pingaaruteqarmat.

Upalungaarsimanermi kajumissutsimik ikiuuttartut Illersornissaqarfiup qulimiguulianik EH-101-tut ittumik sakkutoorpassuit nunatsinni ulluni makkunani sungiusarnerannut atatillugu nunatsinniittunik angallanneqarput.

- Qamutimeersuusugut iluaqqanut qulingiluanut Nuup Kapisillillu akornanniittunut pilersinneqarnerannullu suleqataaffigisimasatsinnut takuniaanissarput qulimiguulimmik angallanneqarnitsinnut siunertaavoq. Taakkua saniatigut puttaqutinut ilitsiviit tallimat Kangerluarsunnguaniittut aamma takusarpavut, upalungaarsimanermi kajumissutsimik ikiuuttartuneersoq Lars Borris Pedersen oqarpoq.

- Illuaqqat taakku kikkunnulluunniit soorlu unnuiartuutigalutik nunakkut pisuttunut, arpattunut, qamuteralattunut asimiitillutilluunniit silarlussiuleriataartunut atugassiaapput. Nunakkut pisuttut unnuiffigineqakkajuttut, unnuisut allaffigisartagaanni tassa gæstebogini takusinnaavarput. Naqqisigut oqorsarluagaammata issitsillugu aamma unnuiffissaqqikutsoorput.

Qulimiguulimmik putsuarissumi angallanneqartut

Naak qaqqap qaavani putsuarikkaluaqisoq illuaqqat arfineq-pingasut saneqqunnerisigut qujanartumik takusinnaasimavaat. Illuaqqallu ilai silarlummit aserfallassimammata ukiortinnagu iluarsarneqartariaqartut taamaalillutik paasivaat.

- Illuaqqat ilaat anorimit aserfallassimaqaaq, taamaammat iluarsarnissaanut atortussanik sakkussanillu nassarluta qulimiguulimmik kingusinnerusukkut angallanneqaqqikkumaartut neriuutigaarput. Illuaraq taanna 800 meteritut portutigisumiimmat iluarsarnissaanut atortussanik nassarluta qulimiguulimmik angallanneqartigata tikissinnaanngilarput, Lars Borris Pedersen nassuiaavoq.

- Qulimiguulimmi inuttat suliavut pillugit oqaloqatigilluarpavut. Nuup eqqaani nunap qanoq issusianik, qaqqat sorliit innaaqqissuunerannik, suatunngaani putsuarittarneranik allallu siunersivaat, tamaanimi avatangiisit Danmarkimi avatangiisit sungiusimasaaninngarnit allaanerulluinnarmata.

Peqatigiiffiup Qamutit upalungaarsimanermi kajumissutsimik ikiuuttartui 15-iusut Kalaallit Nunaanni Politiit, Illersornissaqarfimmeersut suliffeqarfiillu allat namminersortut qaqqami tammartoqarsimatillugu ajoqusertoqarsimatilluguluunniit ikiuigasuarneranni ikiuuttarput. Pinngortitaq ilisimaaraat apummillu sisoortoqarsimatillugu annaassiniarnermi, ikiueqqaarnermi qamuteralannillu atuinermi najukkaminni pinngortitamut ilisimasatik tunngavigalugit tassa ikiuuttarput. Ukiumut pingasuniit tallimariarlutik pinartoqartillugu annaassiniarnermi tassa ikiortiserineqartarput.

Taakkunannga qulingiluat qulimiguulimmik sapaatip akunnerata siuliani akunnerni pingasuni angallanneqarput. Angallanneqarunnaartigatik qulimiguulimmiit nunamut utimullu ninginneqarput.

- Misigisaq nuannerluni pissanganarpoq, Lars Borris Pedersen oqarpoq.