KL

DK

Kalaallit EU nuannarinerulersimavaat

Ilisimatusarfimmi nalunaarusiami nutaami kalaallit EU-mik isiginninnerat allanngorsimasoq allaaserineqarpoq, maannalu angertut naaggaartuniit amerlanerupput.

EU-p Kalaallit Nunaannut soqutiginninnera pissutaava? — Assi EU-p kommissioniani siulittaasup Ursula von der Leyenip Nuummi tikeraarneranit.
Morten Okkels Tusagassiortoq
Saqqummersinneqarpoq

Kalaallit Nunaanni EU-mut ilaasortaaneq pillugu taasisoqassappat illit qanoq taasissagaluarpit?

Inuit 702-t immikkut toqqarneqarsimasut apeqqutimmut akitineqarput, taakkualu 60 procentii angerput 40 procentiilu naaggaarlutik.

2021-mi misissuinermi assigisumi inernerit killormorluinnaq ipput.

Kalaallit Nunaanni innuttaasut EU-mut tunngatillugu isumaat ukiualuit ingerlaneranni allanngorujussuarsimarpasipput.

EU pillugu apeqqut misissuinerup annertuup, ingammik nunanut allanut politikkimut isiginnittaatsinik misissuinermik nalunaarusiami ’The Second Foreign and Security Policy Opinion Poll in Greenland’-imi saqqummiunneqartup, ilagaa.

Rasmus Leander Nielsenimit aamma Maria Ackrénimit, Ilisimatursarfimmi Nasiffimmiit – Nunanut allanut sillimaniarnermullu misissuisarfimmit, suliarineqarpoq.

Qulartut amerlasut

Nalunaarusiamik suliaqartut paasissutissanik katersineq 2024-mi upernaakkut pisimasoq maluginiaqquaat. Tassani EU-p allaffiata nutaap Nuummi ammarneqarnera aamma EU-p kommissionip siulittaasuata Ursula von der Leyenip tikeraarnera tusagassiuutitigut sammineqarput. Taamaattumik imaassinnaavoq Kalaallit Nunaata EU pillugu isumaa sunnerneqarsimasoq, naak 1985-imi aninikuugaluartoq.

Aammattaaq erseqqissarpaat 60 procentit 40 procentillu taamaallaat aappimik naamimillu akissuteqartut nalunaarsorneqarmata. Inuit 702-t aperineqartut tallimararterutaat qanoq akissanerlutik naluaat. Qulartut kisitsisinut ilanngukkutsigit aperineqartut affaat aappeerput.

EU pillugu apersuinerup saniatigut misissuinermi Kalaallit Nunaannut suna navianartorsiortitsinerpaatut isigineqarnerasoq, Kalaallit Nunaata kina suleqatiginerusariaqarneraa, nunallu soorlu Ruslandi Kinalu qanoq isumaqarfigineraat ilaatigut apeqqutigineqarput.

Nalunaarusiaq sisamanngornermi ualikkut tamanut saqqummiunneqareerpat Ilisimatusarfiup misissuinerup inerneri tamanut saqqummiutissavai.

grønland folkeafstemning eu-medlemskab ilisimatursarfik ursula von der leyen samfund inuiaqatigiit

ATORFIIT Se alle jobs

Powered by Labrador CMS