KL

DK

Kalaallit Nunaanni aningaasatigut eqqanaarsornissaq Naalagaaffimmit alloriarfigineqarpoq

Danskit naalakkersuisuisa Kalaallit Nunaanni aningaasat naleerukkiartornerannut akiuiniarluni aningaaseriviit aningaasanik katerseqqullugit piumasaqarfigaat. Naatsumik oqaatigalugu aningaasanik atuinerup annikillisinneqalaarnissaa anguniarneqarpoq.

Nationalbankenip pisortaa danskillu naalakkersuisoqarfiisa pisortai arlallit siunnersuisoqatigiinni ilaasortaapput, taakkualu aningaasat naleerukkiartorsinnaaneranut akiuinissamut atugassat pillugit innersuussuteqartarput.
Morten Okkels Tusagassiortoq
Saqqummersinneqarpoq

Kalaallit Nunaanni aningaasaqarnikkut siuariartortoqarpoq, tamannalu soorunami immini nutaarsiassatsialaavoq. Tamatumali saniatigut suliffissat killeqarput, aningaasarpassuarnillu taarsigassarsisoqartarluni. Tamakku aningaasaqarnermut ilisimatuut maluginiartarpaat. Aningaasanik atuivallaarneq ilungersunartunik kinguneqarsinnaammat, minnerunngitsumillu akit qaffakkiartornerannik kinguneqarsinnaammat.

Taamaattumik Kalaallit Nunaanni aningaasatigut isumannaatsumik inissinnissaq anguniarlugu aningaasarissaarnerup nalaani ileqqaarisoqassasoq Danmarkimi inuussutissarsiornermut ministeri Morten Bødskov (Soc.) sapaatip akunnerata siuliani aalajangerpoq. Ileqqaarneqartussat 2026-mi januaarip aallaqqaataani 0,5 procentimut qaffanneqassapput 2026-milu juulip aallaqqaataani 1 procentimut qaffanneqassallutik. Tamannalu qanoq isumaqarpa?

Tamanna isumaqarpoq aningaaseriviit sanaartornermilu taarsigassarsisitsisarfiit aningaasaatimik taarsigassiitigatik ileqqaarissasut ministerip piumasaqarfigai. Taamaasiornikkut qajannaannerulissammata aningaasaqarnikkullu atuivallaartoqarnera pinaveersaartinneqassalluni.

Aaqqissuussaanermi Aarlerinaatit pillugit Nakkutilliisoqatigiit, ilaatigut Danmarkimi aningaaserivimmit aningaasaqarnermullu ministereqarfimmit ilaasortallit, innersuussinerat tunngavigalugu ministeri aalajangertarpoq.

Aarlerinaatit

Ukiuni kingullerni Kalaallit Nunaanni taarsigassarsisitsisarnerit amerleriarujussuarsimapput, taakkualu ilarpassui inissianut tunngassuteqarlutik. Tamanna ilisimaarissallugu pingaaruteqartoq Aaqqissuussaanermi Aarlerinaatit pillugit Nakkutilliisoqatigiit erseqqissaapput. Tassami inissianut uppernarsaatit atorlugit taarsigassarsisitsisarnerit amerliartornerat siornatigut aningaasatigut ajornartorsiortitsilersarsimasut Nakkutilliisoqatigiit pinaveersaartinniarsaraat.

Aaqqissuussaanermut aarlerinaatillit pillugit Nakkutilliisoqatigiit inuussutissarsiornermut ministerimut siunnersuutiminni nangillutik ima allapput:

- Aningaasaqarneq ingerlalluartillugu aningaasarsiornerup taarsigassarsisitsisarnerullu annertusiartuinnarneri ataatsimut isigalugit aningaasaqarnerup navianaateqarnerulernerannik kinguneqartarput.

(Allatut oqaatigalugu: Inuit ingerlalluarnerminni isumalluarpallaarpata ullut ilaanni ajornartoorfinni ajalusoorsinnaapput, assersuutigalugu akiitsoqarpallaalerlutik imaluunniit pigisat naliminnut naapertuukkunnaarlutik.)

– Kalaallit Nunaanni aningaasaateqarfiit aarlerinaatit suusupagisinnaavaat aningaasaqarnikkullu ineriartornerup kingunerisaanik taarsigassarsisitsisarnermut piumasaqaatit qasukkarnerulersimallugit.

– Pisortat suliffeqarfissuat aamma nunap aningaasaqarneranut tapiissutit Kalaallit Nunaata aningaasaqarneranut ’qajannaallisaatitut’ sunniuteqartarput. Naak tamanna aalajaallisitsisaraluartoq, allanngortoqangaatsiassappat Kalaallit Nunaata aningaasaqarneranut sunniuteqarujussuarsinnaavoq namminersortut aningaasaqarnerannut eqquilluni, suliffissaaleqisut amerlillutik akileraarutinillu isertitat ikileriarnerannik kinguneqarluni.

Kalaallit Nunaat attaveqarfigineqaqqaartoq

Taamaattumik aningaasat sipaarniutigineqarsinnaasut unammilligassanut taakkununnga aaqqiissutissatut atorneqarsinnaapput.

Aningaasaqarneq ingerlallualeraangat aningaasanik katersinissamik piumasaqaat annertusisarpoq. Aningaasaqarnermi ajorsiartulissagaluarpat naalagaaffiup tamanna iliuuseqarfiginiarlugu aningaasat katersat atorsinnaavai.

Aningaasanut katersinissamik piumasaqaat atuutilersinneqarnissaat pillugu ministerip aalajangiinera Naalakkersuisunik isumasioqatiginninnerup kingorna pivoq, Inuussutissarsiornermut ministereqarfik erseqqissaavoq.

kontracyklisk kapitalbuffer inuiaqatigiit grønland finans det systemiske risikoråd økonomi morten bødskov samfund

ATORFIIT Se alle jobs

Powered by Labrador CMS