KL

DK

Kalaallit Nunaanni illersornissamut milliartinilikkaanik aningaasaliisoqassaaq 

Naatsorsuutigineqarpoq "milliardit qulikkaat sinnerlugit" nunatsinni illersornissaqarfimmut atorneqassasut, ilaatigut sakkutuut umiarsuinut nutaanut marlunnut dronernullu nutaanut atorneqssasut, illersornissamut ministeri Troels Lund Poulsen Jyllands-Postenimut oqarpoq.

Illersornissamut ministeri naapertorlugu naalagaaffiup Danmarkip milliardilikkaanik aningaasaliinissani aallartissavaa ilaatigut sakkutuut umiarsuinik marlunnik nutaanik pisinikkut.
Thomas Munk Veirum
tusagassiortoq
Saqqummersinneqarpoq

Ulloq unnuarlu ataaseq qaangiuttoq Donald Trumpip oqaaseqaataa Kalaallit Nunaannik piginnittuunerup aqunneqarnerullu pingaaruteqarneranut tunngasoq, Danmarkimi naalakkersuisut Kalaallit Nunaanni illersornissaqarfimmut aningaasaliissuteqarnissamik annertuunik pilersaaruteqarput.

Taamak marlunngornermi allappoq Jyllands-Posten.

Tassa illersornissamut ministeri Troels Lund Poulsen, danskit aviisiannut aningaasaliissutit nutaat pillugit oqaloqatigineqartoq, ilaatigut sakkutuut umiarsuaannk marlunnik dronernillu nutaanik pissarsinissaq pineqarpoq. Aningaasaliissutit ilaatigut makkununnga atorneqassasut oqaatigineqarpoq:

  • Sakkutuut umiarsui nutaat marluk
  • Dronet ungasissumukartinneqarsinnaasut marluk 
  • Issittumi Sakkutuut Nuummi sulisuisa amerlineqarnerat,
  • Sirius-patruljemi qimussertartunik qimussinillu marlunnik ilaneqarnissaat, paasiniaasarnermik suleqatigiinnerup annertusarneqarnera, tamatumalu saniatigut issittumi tunngaviusumik ilinniarfimmi ilinniarsinnaasut amerlineqarnissaat
  • Kangerlussuarmi mittarfiup pitsanngorsarneqarnera, timmisartunik sorsuutinik F35-nik ingerlatitsisinnaanngorlugu.

Illersornissamut ministerip taavaa "Ilungersunartorsiornermi quianartoq", nalunaarut Trumpsip USA-miit Kalaallit Nunaata USA-p isumannaatsuuneranut pingaaruteqarneranik nalunaarutaa peqatigalugu saqqummiunneqarmat.

Sapaatiummat præsidentinngortussaq Truth Socialimi attaveqaqatigiittarfimmini allappoq:

- Nunami isumannaallisaaneq aammalu minnerunngitsumik nunarsuarmi  kiffaanngissuseq eqqarsaatigalugit USA-p Kalaallit Nunaannik piginnittuunissaa aqutsinissaalu pingaaruteqarluinnartutut isigaara.

Troels Lund Poulsen Jyllands-Postenimut Trumpip oqaaseqarnera pillugu oqarpoq:

- Trumpimut akissutigisara tassaavoq Naalakkersuisut siulittaasuata  (Mute Bourup Egede, aaqq.) oqaasiinut assingusoq. Kalaallit Nunaat naalagaaffeqatigiinnerup allamut paarlaannissaanik kissaateqanngilaq. Kisianni Kalaallit Nunaata nammineq aalajangigassaraa, Troels Lund Poulsen aviisimut oqarpoq.

inuiaqatigiit forsvaret donald trump investeringer troels lund poulsen samfund

ATORFIIT Se alle jobs

Powered by Labrador CMS