Kalaallit Nunaanni inatsisit atuutsinneqarnerannut aningaasaliineruneq ajornartorsiutinit tatineqarsinnaavoq
Kalaallit Nunaanni inatsisit atuutsinneqarnerannut aningaasaliissutit qaffanneqarneranni pingaarnersiuinerup pilersitaanik piginnaasatigut equsoortitsisoqarsinnaasoq, eqqartuussissuserisut kattuffiat advokatsamfundet naliliivoq.
Inatsisit atuutsinneqarnerannut ministeri Peter Hummelgaard (S) Kalaallit Nunaanniilluni ataasinngornermi tusagassiortunik katersortitsinermi nalunaarpoq, aningaasat ilaatigut atorneqassasut politiinut amerlanerusunut, Nuummi politiit qullersaqarfissaannut nutaamut, it aqqutigalugu pitsaanerusumik tapersersorneqarnissaq aammalu unnerluussisussaatitaasut nukittunerulersinnissaannut atorneqassasut.
Assiliisoq: Christian Klindt Sølbeck/Ritzau Scanpix
Kalaallit Nunaata silaannartaani annertuumilu sermersuup nunaqarfiillu akornanni eqqartuussiveqarneq qaffassarneqassaaq.
Taamaattumik danskit naalakkersuisui 2030-mut 850 millionit koruunit sinnerlugit eqqartuussiveqarnermut immikkoortissavaat Kalaallit Nunaanni politiit eqqartuussisutullu oqartussaasut nukittorsarniarlugit.
Isumassarsiaq tassaavoq, kalaallit innuttaasui Danmarkimi innuttaasunut assingusumik eqqartuussiveqarnikkut isumannaatsuunissaat kiffartuussinissarlu.
Taamatut oqarpoq inatsisit atuutsinneqarnerannut ministeri Peter Hummelgaard (S) ataasinngornermi unnukkut tusagassiortunik katersortitsinermi.
Tigussaasumik unnerluussisussaatitaasut suliamikkut qaffassaavigineqassapput pinerluttulerinermi suliat siunissami Nuummi katersorneqartalernerisigut.
Taamatuttaaq politiit eqqartuussisutut oqartussaasut siunissami inatsisilerituunit taarserneqassapput, taakkulu Kalaallit Nunaata ilisimatusarfianit ilinniartinneqassapput - kandidatitut ilinniagaqarsinnaanermut periarfissaqartillugit.
Eqqartuussissuserisut kattuffiat Advokatsamfundet ukioq kingulleq nalunaarusiamik inerniliinermini oqaatigaa eqqartuussiveqarnikkut isumannaatsuunissaq nunarsuarmi malittarisassat naapertorlugit naatsorsuutigineqartumit appasinnerusoq.
Generalsekretæri Andrew Hjuler Crichton pingaartumik isumaqarpoq, danskit naalakkersuisusa unnerluussisussaatitaasut inatsisitigut piginnaasaannik nukittorsaaniarnerat pitsaasuusoq.
Taamaakkaluartoq ernumassutigineqarpoq, eqqartuussiveqarnikkut piginnaasat qaffasinnerulersinneqanngippata pinerluttulerinermi eqqartuussiveqarnikkut aaqqissuussinermi immikkoortut ilaat kisiat isiginiarneqassappat.
Tassunga atatillugu danskit naalakkersuisui siunertarineqanngitsumik aarlerinartorsiortitsisinnaapput ajornartorsiutinik pilersitsinissaminnut, taanna oqarpoq.
- Illersuisoq, unnerluussisoq eqqartuussisorlu piginnaasatigut assigiimmik qaffasissuseqartussapput.
- Unnerluussisut kisimik qaffaassaavigineqassappata, illersuisut eqqartuussisullu kingullikunngortinneqassapput, taanna oqarpoq.
Taamaasilluni allattoqarfimmi pisortaq "amigaateqarpoq", tamakkiisumik inatsisit atuutsinneqarnerannut tunngatillugu suliaqartut aallartinneraniit naammassineranut isiginiarneqarnissaannik.
- Aarleqqutigaarput, siornatigut Danmarkimi kukkusutaasimasoq uteqqinneqarsinnaammat, Andrew Hjuler Crichton oqarpoq.
Kalaallit Nunaanni Politiit 2030-mut ukiumut suliarisinnaasat naatsorsorneranni 31-nik ilaneqassapput atortussanillu nutaanik pilersorneqassallutik - ilaatigut imaatigut nakkutiginninnermut atortussanik.
Taamatuttaaq Politiit isertortumik paasiniaasartui, PET, Atlantikup avannaani annertunerusumik peqataanissaat nukittorsarneqassaaq.
Taakku saniatigut aningaasaliisoqarpoq eqqartuussiviit digitaliserneqarnissaannut, eqqartuussivikkoortumik nalunaarsuisarneq nutarsarneqassaaq inatsisinillu nutarterisoqassaaq, Kalaallit Nunaat ullumikkut kinguarsimanerummat.
Aningaasaliissutit 2026-imut aningaasanut inatsisissatut siunnersuummi ilaapput.
/ritzau/
