Kalaallit Nunaanni nutaarsiassaqartitsiviit ilungersunartuumiipput
KNR maanna 19-inik sulisussarsiorpoq, taakkunani tusagassiortut amigaatigineqarlutik. Tamanna nunatsinni tusagassiorfinnut ilungersunartorujussuanngorsinnaavoq. KNR-i oqaluttuarisaanermi aatsaat taama tusagassiortunik amigaateqartigivoq, nutaarsiassaqartitsiviit siunissaannut tamanna ernumanartuusoq kingunerlussinnaasorlu, Sermitsiami pisortaanerup oqariartuutigaa.
Emil Stach
Nuna 56.700-inik innuttaassuseqartoq tusagassiortunik amigaateqangaatsiarpoq. Tassa Kalaallit Nunaat.
Nunatsinni nutaarsiassaqartitsiviit angisuut marluupput; Kalaallit Nunaata Radioa aamma Sermitsiaq. Nutaarsiassaqartitsiviit nunatsinni marluinnaammata ataaseq tusialerpat, aappaa aamma tusialissaaq.
Masaana Egedep erseqqissaatigaa KNR-ip iluani pissutsinut akuliunniarnani, oqariartuutiginiarluguli tusagassiuutit nukittuut inuiaqatigiinnut qanoq pingaaruteqartiginersut.
Tamat oqartussaaqataanerannut innarliisoq
Masaana Egede naapertorlugu KNR-ip sanngiillinera nunatsinni tamat oqartussaaqataanerannut kingunerlussinnaasoq. Nunatsinnimi tusagassiorfiit angisuut marluinnaapput, tassa KNR-i aamma Sermitsiaq. Norgemut nunanullu allanut sanilliutissagaanni, Norge kisimiilluni 250-inik tusagassiorfeqarpoq.
- Nutaarsiassaqartitsivik ataaseq sanngiillippat, aamma allat eqqugaassapput, Masaana Egede nassuiaavoq nangillunilu:
- Tamat oqartussaaqataanerannut sanngiillisitsingaatsiassaaq. Nutaarsiassaqartitsiviit inuiaqatigiinni susoqarnersoq alaatsinaattussaavaat, taamaammat nutaarsiassaqartitsiviit nukittuut pisariaqartippagut. Nunatsinni tusagassiorfiit marluinnaapput, tassa KNR aamma Sermitsiaq. Taakkuinnaavugut inuaqatigiit qanoq ingerlanerannik alapernaattussaasugut. Arlaat sanngiillippat aamma aappaa sanngiillissaaq.
Suliffimmik misiliinerit siunissamilu sulilersussat
KNR-imi ukiuni kingullerni atorfiit arlallit inuttaqanngillat. Uuma allaaserisap allannerani atorfiit 19-it inuttassarsiuunneqarput, tassani KNR-ip ilaatigut nutaarsiassaqartitsiviani tusagassiortunik inuttassarsiuunneqarlutik.
Masaana Egedep KNR-i tusagassiortunngornianut pingaaruteqassusaa erseqqissarpaa.
- KNR-i tusagassiornermut pingaaruteqarpoq, tusagassiortunngornianut suliffimmik misiliinissamut periarfissiisarami. Tassani ilinniartunut radiomik, TV-lerinermik allaaserinninnermillu misiliinissamut periarfissiisarami. Suliffimmik misiliiffissatut ajornarsippat, tusagassiorfiit namminersortut siunissami piukkunnartunik nassaarniarnissaminnut ajornakusoortitsilissapput.
- Naak tusagassiorfiit namminersortut periarfissagissaaraluartut, pissutsit piffissami eqqortumi aaqqinneqanngippata ukiualuit qaangiuppata sanngiinnerulersinnaavugut, Masaana Egede, Sermitsiami pisortaanerusoq naggasiivoq.
